Angay Bang Manugal ang mga Kristohanon?

ANGAY bang manugal ang Kristohanon aron makabaton ug butang ilis sa wala? Dili, kay ang Pulong sa Diyos nagadasig kaniya sa paghago aron makabuhi sa kaugalingon ug sa iyang pamilya: “‘Kon adunay dili buot mobuhat, ayaw siyag pakan-a.’ . . . Pinaagi sa pagbuhat nga mahilomon sila magakaon ug pagkaon nga ila mismong gihagoan.”​—2 Tesalonica 3:10, 12.

Usa ka sosyologo nagtawag sa loteriya nga ‘usa ka paagi nga ginapadato sa daghan nga pobreng mga tawo ang pipila,’ ug matuod kini sa panugal sa katibuk-an. Ang usa ka Kristohanon buot bang madato sa kapildihan niadtong lugos makaabot niana? Ang mga Kristohanon angay ‘maghigugma sa ilang mga silingan sama sa ilang kaugalingon.’ (Marcos 12:31) Apan ang panugal magadasig sa kahakog inay sa gugma, kadili-matinagdanon inay sa kaluoy.

Ang panugal sa kasagaran gitukmod sa kamaibogon​—kadalo​—usa ka espiritu nga dili angay sa Kristiyanidad. Sa Roma 7:7, si Pablo miingon: “Dili ka magkaibog.” Ang pulong “pagkaibog” nagkahulogan nga “pagpangandoy, paghingagpas.” Dili ba kana nagabatbat sa sobrang tinguha sa sugarol sa pagdaog sa kuwarta sa iyang silingan? Ang ingong tinguha wala mahiuyon sa Kristohanong mithi sa pagpaambit ug pagpanghatag.

Ang Bibliya nagaingon: “Ang gugma sa salapi mao ang gamot sa tanang matang sa makadaot nga mga butang, ug pinaagi sa pagpangab-ot sa maong gugma ang pipila . . . nalagbaslagbasan sa ilang kaugalingon ug daghang kasakit.” (1 Timoteo 6:10) Kini nagabatbat sa kahimtang sa lunod-patay nga sugarol, kay naulipon sa usa ka bisyo nga nagaduslak kaniya sa kasakitan, sa balikbalik.

Si Jesus miingon nga ang mga tawo mailhan pinaagi sa “ilang mga bunga.” (Mateo 7:20) Gawas sa kagul-anan nga maagoman sa lunod-patayng mga sugarol ug sa ilang mga pamilya, ang panugal dugay nang nalangkit sa panglimbong ug sa krimen. Ang The New Encyclopædia Britannica nagaingon: “Dako sa kaulawan nga gilanggikit sa panugal maoy sangpotanan sa pagkalimbongan sa mga tigpasiugda niini.” Ang organisadong krimen gilanggikit sa legal ug ilegal nga mga sugal. Ang usa ka Kristohanon buot bang mosuportar sa maong industriya, bisan sa dili laktud nga paagi?

Sumala sa gipatin-aw diha sa ikaduhang artikulo niini nga serye, ang panugal kasagarang nalangkit sa matuotuohon nga pagpangita sa suwerteng mga numero, suwerteng mga adlaw, o suwerteng mga yugto. Ang Diyosa sa Suwerte giulitawhan sa kasiglohan sa mga sugarol nga ikag nga makabaton sa iyang pabor. Siya gitawag Fortuna sa mga Romano, ug ang siyudad sa Roma sa ngadtongadto nakabatog 26 ka templo nga gipatindog alang sa iyang kadungganan.

Ang propetang si Isaias naghisgot sa usa ka susamang diyosa, gitawag gadh, nga gisimba sa apostatang mga Israelinhon. Siya misulat: “Kamo nga katawhan mao ang nagabiya kang Jehova, . . . nga nagahikay sa usa ka lamesa alang sa diyosa sa Maayong Suwerte [Hebreohanon, gadh].” (Isaias 65:11) Sa kataposang adlaw sa tuig, kostumbre ang pag-andam alang sa diyosa sa Maayong Suwerte sa usa ka lamesa nga puno sa lainlaing matang sa pagkaon. Sa maong paagi ang mga tawong karaan naglaom nga maseguro ang maayong suwerte sa umaabot nga tuig.

Ang Diyos wala mouyon niadtong sa kawalay-alamag nagsalig sa gadh, o Diyosa sa Suwerte, sa pagsulbad sa ilang mga suliran. Ang pagsalig sa suwerte katumbas sa pagbiya sa matuod nga Diyos, si Jehova. Inay kay mosunod sa kapritso sa Kapalaran, ang mga Kristohanon angay mosalig sa matuod nga Diyos, si Jehova, ang Usa nga nagsaad kanato ug bahandi nga dako pag bili, ang Usa nga dili gayod magpakyas kanato.