Pagtahod sa Kababayen-an Diha sa Kongregasyon

ALANG sa mga Kristohanon ang Bibliya maoy nagtukod sa teokratikanhong panagsunod sa pagkaulo, uban kang Kristo nga nagpasakop sa Diyos, ang lalaki nagpasakop kang Kristo, ug ang babaye nagpasakop sa iyang bana. (1 Corinto 11:3) Hinuon, kini nga pagpasakop wala magpasabot sa pagkadiktador. Ang pagkaulo diha sa pamilya wala gayod tukora pinaagi sa kabangisan, sa lawasnon, mental, o binaba nga paagi. Dugang pa, ang Kristohanon nga pagkaulo may kinutoban ug wala magkahulogan nga ang usa ka bana mahimong diktador nga maghunahuna nga dili siya masayop.a Ang pagkahibalo kon sa unsang paagi ug kanus-a moingong “Sori, husto ka” makatabang sa daghang kaminyoon nga mahimong makapahayahay ug malungtaron. Bisan pa, pagkadali nga ang maong mga pahayag sa pagpaubos masangit sa tunlan!​—Colosas 3:12-14, 18.

Sa ilang panambag sa kaminyoon, ang Kristohanong mga apostol nga si Pablo ug Pedro sa kanunay nagpahinumdom kanato sa panig-ingnan ni Kristo. Ang pagtahod maangkon tungod sa makapahayahay nga panig-ingnan sa bana samtang ginasunod niya ang sulundan nga gihatag ni Kristo, sanglit “ang usa ka bana maoy ulo sa iyang asawa maingon nga si Kristo mao usab ang ulo sa kongregasyon, tungod kay siya mao ang manluluwas sa maong lawas.”​—Efeso 5:23.

Ang tambag ni Pedro ngadto sa mga bana maoy tin-aw: “Kamong mga bana, magpadayon kamo sa pagpakig-ipon sa samang paagi sa [inyong mga asawa] sumala sa kahibalo.” (1 Pedro 3:7) Ang usa ka modernong hubad nga Kinatsila nagabatbat sa laing paagi sa maong mga hunahuna, nga nagaingon: “Mahitungod sa mga bana: magpakitag taktika diha sa inyong giambitan nga kinabuhi, nga magpakitag pagkamahunahunaon alang sa asawa.” Kining mga pahayaga nagpasabot ug daghang butang, apil ang pagkasensitibo diha sa relasyon sa panagtiayon. Ang usa ka bana angay dili mag-isip sa iyang asawa ingong usa ka galamiton lamang alang sa katagbawan sa sekso. Usa ka asawa nga nakaagom ug pag-abusar sa pagkabata misulat: “Nanghinaot ako nga labaw ang inyong ikasulti mahitungod sa pagpaluyo nga ikahatag sa bana sa asawa nga nakabaton niini nga kasinatian. Ang kinahanglang mahibaloan sa kadaghanan namong mga asawa mao nga kami tinuod nga gihigugma ug gitagad, dili lamang nga kami anaa aron sa pagtagbaw sa lawasnong mga pangibog o ingong tig-atiman sa balay, nga walay pagmahal.”b Ang kaminyoon gitukod sa Diyos aron ang mga bana ug mga asawa mahimong mga kauban ug katimbang sa usag usa. Kini maoy pagtimbayayong ug pagtamod sa usag usa.​—Genesis 2:18; Proverbio 31:28, 29.

Sa Unsang Paagi “Mahuyang nga Panudlanan”?

Si Pedro nagtambag usab sa mga bana nga hatagan ug kadungganan ang ilang mga asawa “maingon nga ngadto sa mahuyang nga panudlanan, ang babaye.” (1 Pedro 3:7) Unsay buot ipasabot ni Pedro sa pag-ingon nga ang babaye maoy “mahuyang nga panudlanan”? Sa pagkatinuod, sa kasagaran, ang babaye sa lawas mahuyang kay sa lalaki. Ang kalainan sa gambalay sa bukog ug sa kaunoran mao ang hinungdan niana. Apan kon maghisgot kitag sulodnon moral nga kalig-on, nan ang babaye dili gayod mas huyang kay sa lalaki. Ang kababayen-an sa daghang katuigan nakaagwanta ug mga kahimtang nga dili maantos sa kadaghanang lalaki bisan sa makadiyut​—apil ang pagpasipala sa mabangis o palahubog nga kapikas. Ug hunahunaa kon unsay ginaantos sa usa ka babaye aron manganak, lakip ang mga oras sa pagbati panahon sa pag-anak! Si bisan kinsang sensitibo nga bana nga nakasaksi sa milagro sa pag-anak mosangpot nga bation ug mas dakong pagtahod sa iyang asawa ug sa iyang sulodnong kalig-on.

Mahitungod niining sulodnon moral nga kalig-on, si Hannah Levy-Haas, usa ka Hudiya nga priso sa Ravensbrück Nazi nga kampo konsentrasyon misulat diha sa iyang talaadlawan niadtong 1944: “Usa ka butang dinhi nga nakapalagot kaayo nako, ug kana mao ang pagtan-aw nga ang mga lalaki mas huyang ug dili makaagwanta ug kalisdanan kay sa mga babaye​—sa lawasnon ug sagad sa moral usab. Kay dili makapugong sa ilang kaugalingon, sila nagapadayag ug kakulang sa moral nga kalig-on nga ang usa bation lamang ug kaluoy kanila.”​—Mothers in the Fatherland, ni Claudia Koonz.

Kini nga kasinatian nagailustrar nga walay lig-ong pasikaranan ang pagpihig batok sa kababayen-an tungod lang kay tingali sa lawasnon sila mas huyang. Si Edwin Reischauer misulat: “Sa modernong panahon, sa kasagaran gituohan nga ang kababayen-an adunay labaw nga determinasyon ug mental nga kalig-on kay sa mga lalaki.” (The Japanese) Ang maong kalig-on magamit diha sa Kristohanong kongregasyon sa dihang ang hamtong nga kababayen-an tingali makaarang sa pagtabang sa ubang mga babaye nga nagaantos ug grabeng emosyonal nga kasakitan. Sa pagkatinuod, sa pila ka kahimtang mas sayon nga ang usa ka babayeng gipasipad-an modangop sa usa ka babayeng hamtong alang sa dihadiha nga kahupayan kay sa ngadto sa usa ka lalaki. Kon motungha ang panginahanglan, ang Kristohanong ansiano tingali makonsulta alang sa dugang nga giya.​—1 Timoteo 5:9, 10; Santiago 5:14, 15.

Ang dihadihang pagsalikway sa mga reaksiyon sa babaye ingon nga pagkaemosyonal, nga magpasangil niana sa panahon sa “binulan” makapalagot sa daghang babaye. Si Betty, usa ka matinumanong Kristohanon mipahayag: “Kami nasayod, sumala sa gisulat ni apostol Pedro, nga sa pila ka bahin kami mao ang ‘mahuyang nga panudlanan,’ ang babaye, nga may mas tandogong kahulmahan sa lawas. Apan wala kana magkahulogan nga ang usa ka kapatas o superbisor kinahanglang mahimong manunuton ug amahanon, nga magpasangil sa matag reaksiyon sa babaye sa among binulan. Kami intelihente ug buot nga pamatian uban sa pagtahod.”

Dili tanang babaye emosyonal, maingon nga dili tanan nga lalaki ang dili emosyonal. Ang matag tawo pagaisipon nga usa ka indibiduwal. Si Betty, nga gikutlo sa nangagi, nagsulti sa Pagmata!: “Dili ako moangay nga klasipikahon pinasukad sa sekso. Ako nakakitag mga lalaki nga naghilak ug sapoton. Ug adunay mga babaye nga gahi sama sa bato. Busa papamatia ang mga lalaki kanamo nga dili madapigon nga dili maghunahuna sa pagkababaye o pagkalalaki.”

Unsay Gikinahanglan Alang sa Kausaban?

Aron adunay kausaban ngadto sa pagkamaayo, ang pila nag-ingon nga dili igo nga ang kababayen-an mokampanya alang sa ilang mga katungod ug sa hustisya; ni igo nga ang mga lalaki mohimog basta lang nga lihok sa pagtahod alang sa kababayen-an. Sa matag kultura ug kahimtang, ang mga lalaki kinahanglang magsusi sa ilang papel diha sa kahimtang ug magsukna sa ilang kaugalingon kon unsay ilang mahimo aron himoon nga mas malipayon ug mas hayahay ang kinabuhi alang sa kababayen-an.​—Mateo 11:28, 29.

Ang manunulat ug magbabalak nga si Katha Pollitt misulat diha sa Time: “Hinuon, ang kadaghanang lalaki dili manglugos o mamun-og o mopatay. Apan kana wala magkahulogan, ingon nga daghan kaayo kanila morag naghunahuna, nga sila walay labot sa kabangisan batok sa kababayen-an. Matag usa kanato sa atong adlaw-adlaw nga kinabuhi nagatabang sa pag-umol sa kultural nga mga ideya ug mga pangagpas nga nagabatbat sa mga kinutoban sa ikatugot. . . . Ako naghisgot sa mga lalaki nga nagahimog pila ka seryosong pagsusi-sa-kaugalingon, nga nagahagit sa ilang mga pagpihig ug mga pribilehiyo, nga nagdawat sa ilang dakong bahin sa tulubagon sa daotang kahimtang nga atong nasudlan.”

Apan bisan pag ang mga lalaki sa tibuok nga kalibotan mohimog dako kaayong kausaban sa ilang mga tinamdan bahin sa kababayen-an, sa gihapon kini dili kompletong kasulbaran sa mga inhustisya nga nagasakit sa katawhan. Ngano? Kay ang mga lalaki nagahimog mga inhustisya ug mga paglinuog dili lamang diha sa kababayen-an kondili diha sa ilang isigkatawo. Ang gubat, kabangisan, pagpatay, mga pundok armado, ug terorismo nagalungtad gihapon diha sa daghan nga kanasoran. Ang gikinahanglan mao ang bug-os bag-o nga sistema sa pagmando alang sa tibuok nga yuta. Ug bag-ong edukasyon alang sa tanang tawo. Ug kana mao ang gisaad sa Diyos pinaagi sa pagmando sa iyang Gingharian gikan sa langit ibabaw sa yuta. Sa maong panahon lamang nga molungtad ang tinuod nga hustisya ug panag-angay alang sa tanan​—mga lalaki, mga babaye, ug kabataan. Sa maong panahon lamang molungtad ang tinuod nga pagtahod sa usag usa tali sa mga lalaki ug mga babaye. Ang Bibliya nagapahayag niini ning paagiha sa Isaias 54:13: “Ang tanan nimong mga anak lalaki [ug mga anak babaye] maoy mga tawo nga tinudloan ni Jehova, ug ang kalinaw sa imong mga anak lalaki [ug mga anak babaye] magmadagayaon.” Oo, ang tukma nga edukasyon sa matarong nga mga prinsipyo ni Jehova makaamot sa usa ka bag-ong kalibotan nga may pagtahod sa usag usa.

[Mga footnote]

[Hulagway sa panid 16]

Kasagaran ang usa ka babayeng hamtong makahatag ug makatabang nga tambag

[Hulagway sa panid 17]

Ang pag-ambit sa mga buluhaton sa balay maoy usa ka paagi nga ang bana makapakitag pagtahod sa iyang asawa