Nadiskobrehan ba Nila ang Impiyerno?
NAMATIKDAN mo ba nga ang doktrina sa impiyernong-kalayo daw nagakawala sa dili pa dugay? Tingali dili kini makalahutay niining maduhaduhaon nga panahong atong gikinabuhian. O tingali dugang ug dugang mga tawo ang nakaamgo nga ang ideya sa pagsakit sa tawo diha sa kalayo sa walay kataposan dili mosibo sa matarong ug mahigugmaong Diyos nga gilarawan diha sa Bibliya. Bisan unsa pa ang katarongan sa dili-pagtuo, ang pipila ka lider sa relihiyon mibalos nga nagpakitag kawalay-paglaom. Palandonga ang usa ka kaso niining bahina.
Sa Tinipong Bansa, ang usa ka nasodnon “Kristohanon” nga sistema sa telebisyon ug ang usa ka ebanghelikal nga sulat-balita sa dili pa dugay mitaho nga nadiskobrehan sa mga siyentipiko ang “impiyerno” samtang nangalot sa Siberia! Gituis sa pagsumaryo sa magasing Biblical Archaeology Review ang usa sa maong asoy.
Gikaingon, nga usa ka tem sa mga siyentipikong Finlandes ug Norwego didto sa Siberia naglungag ug lalom hangtod sa salog sa yuta ingong usa ka eksperimento. Sila nakurat gayod sa dihang, sa daghang milya sa ilalom, ang barina misugod sa pagtuyok diha sa basiyo nga espasyo! Misamot pa ang ilang kahibulong sa dihang nakaplagan nila nga ang temperatura didto sa ubos maoy kapin sa 1,100 degrees Centigrade! Labi pa silang nahibulong, hinunoa, sa dihang gitunton nila diha sa lungag ang usa ka mikropono ug unya nakadungog ug libo-libo—tingali milyonmilyon—nga mga tingog sa tawo, ang tanan nagtiyabaw sa kasakit! Nangaluya kaayo ang mga siyentipiko, nagpadayon ang estorya, nga daghan ang miabandonar sa proyekto. Ang uban gipanumpa sa dili pagtug-an, samtang ang uban nakombirter gikan sa pagka atiyesta ngadto sa “Kristiyanidad” tungod niini nga ebidensiya sa impiyerno.
Dili ikahibulong, kadtong mipatik ug misubli niini nga estorya miangkon nga kini maayong pagkadokumento. Si Rich Buhler, tagdumala sa usa ka programa sa radyo, misulat diha sa Christianity Today nga siya ug ang iyang kawani naningkamot sa pagsubay sa maong mga report. Sa gituki, usa ka tinubdan nawagtang sa nagkagubot ang mga sugilanong napatik nga gikutlo gikan sa mga sulat nga mikutlo gikan sa samang walay-kalig-onang mga artikulo.
Ang laing tinubdan mao ang usa ka sulat gikan sa usa ka tawong Norwego kinsa, sa dihang gisukna, prangkang miangkon nga ang iyang sulat mini. Iyang gipadala kini tungod kay nagtuo siya nga segurado kining tuohan ug ipatik. Walay duhaduha iyang naamgohan ang makasubong kamatuoran sa daghang relihiyosong mga organisasyon—sila motuo sa gusto nilang tuohan.
Diha sa Hebreohanong Kasulatan sa Bibliya ang pulong “impiyerno” gihubad gikan sa Hebreohanong pulong nga sheol. Kini makita sa 65 ka higayon ug diha sa Authorized King James nga bersiyon sa Bibliya gihubad sa 31 ka higayon nga “impiyerno,” 31 ka higayon nga “lubnganan,” ug 3 ka higayon nga “lungag.” Diha sa Gregong Kasulatan niana nga bersiyon sa Bibliya ang pulong “impiyerno” gihubad gikan sa Gregong pulong nga Hades diha sa tanang napulo ka dapit nga makita kini. Ang sheol ug hades nagkahulogan sa komun nga lubnganan sa katawhan, ug wala gayoy kalabotan sa kasakit o kalayonhong pagsakit o ngadto kang bisan kinsa nga nagpuyo sa daghang milya sa ilalom sa yuta sa Siberia!
[Picture Credit Line sa panid 31]
Picture Book of Devils, Demons and Witchcraft/Ernst ug Johanna Lehner/Dover