Mga Saksi ni Jehova ‘Itugyan Ngadto sa Lokal nga mga Hukmanan’

ANG Kristiyanidad gisupak sukad pa sa pagsugod niini. Sa naghatag ug mga instruksiyon sa iyang mga disipulo, si Jesus mipasidaan: “Magbantay kamo sa mga tawo; kay kamo igatugyan nila ngadto sa lokal nga mga hukmanan, ug kamo ilang pagahampakon sa sulod sa ilang mga sinagoga. Ug, tungod kanako kamo pagataralon ngadto sa atubangan sa mga gobernador ug sa mga hari, aron makapamatuod kamo ngadto kanila ug sa mga nasod.” (Mateo 10:17, 18) Diha sa kadaghanang nasod karong adlawa, ang pagsupak sa Gingharian milabaw pa kay sa malalangong paagi sa malaglagong balod sa paglutos nga mitungha human gilayon sa pagpatay kang Jesus. Niining malisod nga kalibotan nga atong gipuy-an, ang mga isyu nga gibangon sa mga kaaway milapas pa diha sa pagsangyaw sa maayong balita sa Gingharian.

Mga Butang Labot sa Pag-angkon sa Anak

Ang usa ka hukmanan diin ang pipila ka mga Saksi ni Jehova dugang ug dugang nga gitugyan mao ang hukmanan sa pamilya. Sa Austria, Belgium, Canada, Pransiya, Norway, ang Tinipong Bansa, ug ubang mga nasod, usa ka gamayng pundok sa mga magsusupak naningkamot sa paghimo sa relihiyon nga pangunang isyu sa paghukom sa mga isyu nga nalangkit sa kon kinsay moangkon sa anak sa dihang ang matinumanong mga Saksi ni Jehova bulagan sa dili-magtutuo nga kapikas. Tungod lang sa ilang pagkahimong mga Saksi ni Jehova, ang mga ginikanang Saksi napildi sa pag-angkon sa ilang mga anak.

Ang usa ka Saksi napildi sa pag-angkon sa iyang tres-anyos nga anak nga lalaki ug gidid-an bisan sa paghisgot sa relihiyon sa panahon sa mga pagduaw nga gitugot. Ang Legal Department sa Watchtower Society miapelar niini nga mando sa korte ug napildi diha sa mga korte sa apelasyon. Usa ka apelasyon ang gihimo diha sa Ohio State Supreme Court. Makapalipay, sa Abril 15, 1992, ang korte mihukom nga pabor sa kagawasan sa mga Saksi. Ang 11-ka-panid nga opinyon maoy usa ka dakong tamparos sa gitawag nga ekspertong saksi, nga sa aktuwal maoy usa ka gipalagpot nga indibiduwal nga nag-angkong usa ka sikolohista. Ang korte miingon nga siya “mipamatuod, sumala sa kahubitan nga iyang gisulat, nga komun ang sakit sa hunahuna diha sa mga Saksi ni Jehova kay sa kasagarang populasyon. Kini nga testimoniya maoy usa ka maandakon nga pagsulay sa paghatag ug mapihigong larawan nga ingon niana ang tibuok nga relihiyon. . . . [K]ining usa ra ka istadistikanhon nga ebidensiya walay-kahulogan.”

Ang korte misugo ug bag-ong bista, nga nag-ingon: “Ang [p]ag-angkon sa anak mahimong dili ihikaw ngadto sa usa ka ginikanan tungod lamang kay dili siya modasig sa iyang anak sa pagsaludo sa bandera, sa pagsaulog ug mga piyesta opisyal, o sa pakigbahin sa ekstrakarikular nga mga kalihokan. Among gibaligtad ang mando sa hukmanang naghusay sa pag-angkon ug sa pagduaw sa bata tungod kay kining mga desisyona dili-hustong gibase sa relihiyosong mga pagtulon-an [sa ginikanan].” Ingong resulta, nalipay kining inahana nga mitambong sa Memoryal sa kamatayon ni Kristo sa Abril 17 uban sa iyang anak nga lalaki diha sa Kingdom Hall.

Ang Legal Department sa sangang buhatan sa Canada sa Watch Tower Society dunay duha ka kaso karon nga pending diha sa Korte Suprema sa Canada sa sama nga isyu. Ang sanga sa Austria nalangkit sa makapukaw nga kadaogan diha sa usa ka kaso atubangan sa Uropanhong Komisyon sa Tawhanong mga Katungod. Dugang pa, ang Belgium, Pransiya, ug Norway mitaho ug dili pa dugay nga mga kadaogan sa hukmanan alang sa nahasol nga mga Saksi sa ubang mga kaso sa pag-angkon sa anak diin ang relihiyon mao ang sentro sa atake. Diha sa matag higayon, sama sa giingon ni Jesus, kini nahimong usa ka pamatuod dili lamang sa hukmanan ug sa mga abogado kondili sa mga nasod pinaagi sa publisidad nga nahimo sa palumagian sa balita.

Isyu sa Dugo

Laing butang nga ginaatubang sa mga Saksi mao ang isyu sa dugo. Bisan pa sa bag-o nga mga kadaogan alang sa relihiyosong kagawasan ug personal nga kaugalingnan sa mga Saksi ni Jehova sa mga Korte Suprema sa Florida, Illinois, Massachusettes, ug New York ug bisan pa sa walay-hunong nga mga paningkamot sa Hospital Information Services ug sa daghang hospital liaison committees sa mga Saksi ni Jehova sa tibuok nasod, kini nga isyu kanunay nga mopatim-aw. Apan, ang mga tigtagana sa pag-atiman sa panglawas nakahibalo bahin kanato, ug ang ubang mga ospital naningkamot sa pag-ila dayon sa mga pasyente nga mga Saksi ni Jehova.

Gitahod sa pormal nga bista sa korte sa San Diego ang baroganan sa usa ka Hapon nga Saksi sa California. Siya nag-antos sa aneurysm sa utok ug nawad-an ug panimuot. Ang iyang hustong pagkapirma nga Medical Directive ug ang testimoniya sa usa ka pediatrisyan nga nangutana kaniya pag-ayo bahin sa isyu sa dugo sa dihang iyang nakontak siya diha sa pultahan-ug-pultahan nga buluhaton igo na sa pagkombinsir sa huwes nga ang walay-panimuot nga Saksi dili modawat ug dugo bisan sa unsang mga kahimtang.

Usa ka kaso sa Long Island diin ang usa ka Saksi gigapos ug gidugangan ug dugo samtang ang iyang bana gidala nga giposasan gipasaka na sa New York High Court sa Legal Department sa Watchtower Society. Usa ka desisyon nga pabor sa personal nga mga katungod sa mga Saksi ni Jehova ang nakuha, ug ang kaso karon nagpadayon diha sa pasiuna-nga-bista nga paagi diha sa usa ka sibil nga sumbong. Usa ka sumbong alang sa 16-anyos ug ang iyang inahan diha sa pederal nga hukmanan sa Atlanta hapit nang magbista. Ang batang lalaki gihigtan ug gidugangan ug dugo sa walo ka oras. Ang husay aron makuha ang usa ka sugo sa hukmanan nga nag-awtorisar niini nga buhat gikuptan niining ospitala ug nakuha nga wala magpahibalo sa batang lalaki o sa iyang inahan. Dunay daghan pang mga kaso nga naghulat sa mga korte sa apelasyon ug may bag-ong mga kaso ang nanagpanungha adlaw-adlaw. Ang mga pakig-away ginadaog, apan ang pakigbisog alang sa tawhanong mga katungod wala pa matapos. Ang mga Saksi ni Jehova naglantaw kang Jehova nga Diyos nga mobindikar sa iyang kasugoan bahin niining isyuha, sa iyang tukmang panahon.

Sukad sa 1943 dihay pipila ka mga Saksi ni Jehova sa Tinipong Bansa nga gitugyan atubangan sa lokal nga mga hukmanan bahin sa isyu sa pagsangyaw. Ugaling, matag semana ang Watchtower Society nakadawat ug daghang mga tawag ug mga sulat gikan sa mga lawas sa mga ansiano nga nangayog tabang sa dihang makaatubang ug mga problema ang mga Saksi ni Jehova diha sa ilang publiko nga pagministeryo. Ang usa ka taho gikan sa estado sa Washington may kataw-anang resulta. Gisiradoan sa usa ka nasukong tagbalay ang iyang kinoralan nga propidad nga giparkingan sa mga sakyanan sa mga Saksi, aron dili sila makagawas ug gitawag ang mga polis. Ang iyang masuk-anong mga pagsinggit ug mga panghulga sa kapintasan nagpahinabo kanila sa maalamong paghulat sa sulod sa ilang awto. Sa dihang miabot ang mga sakyanan sa polis, inay dakpon ang mga Saksi tungod sa pagsulod sa dili nila propidad, gipasalamatan hinoon sila sa mga polis. Abi gud nimo, ang mga polis nagduda nga ang tagbalay maoy usa ka puga, apan sila wala pa gayod makasulod sa propidad aron matino kana. Karon nga iyang gidapit sila ngadto sa iyang propidad, ilang napamatud-an kon kinsa siya ug gidala siya ug ang babayeng iyang gipuyopuyo ngadto sa prisohan, samtang ang mga Saksi nagpadayon sa ilang buluhaton sa pagsangyaw ug sa pagpanudlo.

Ang mga kahimtang nagpakita nga may dugang pang mga pakig-away alang sa intereses sa Gingharian. Ang Watchtower Society nagpabili sa kaikag, kabalaka, ug mga pag-ampo sa daghang mga Saksi sa tibuok kalibotan alang sa paggiya ug pagtultol ni Jehova sa pakiglabot sa komplikadong legal nga mga isyu nga ginaatubang sa pagpalampos sa buluhaton sa Diyos karong adlawa. Gisultihan ni Jehova ang nasod sa Israel nga dili nila malumpag ang Yutang Saad dihadiha apan kini mahimo sa “hinayhinay.” (Deuteronomio 7:22) Ang kauswagan sa mga katungod sa katawhan ni Jehova karong panahona kaamgid; sa hinayhinay sila may nahimong kauswagan. Makadaog man o mapildi, tino nga sa matag panahong itugyan ang katawhan ni Jehova atubangan sa mga gobernador, mga hari, mga hukmanan, o kang bisan kinsa, kini mosangpot ug usa ka pagpamatuod ngadto kanila ug sa mga nasod.

Sa haduol nga umaabot bug-os nga ibindikar ni Jehova ang iyang kaugalingon dili lamang bahin sa mga isyu nga nalangkit ang dugo ug pag-angkon sa bata kondili sa legal nga isyu nga nalangkit ang iyang pagkasoberano. Unya masinati sa iyang katawhan ang kalinaw gikan sa tanang mga magsusupak ug makatagamtam ug tumang kalipay ilalom sa pagmando sa Gingharian​—tungod kay si Jehova maoy usa ka mahigugmaon sa katarongan.​—Salmo 37:28.

[Blurb sa panid 12]

Ang batang lalaki gigapos ug gidugangan ug dugo sa walo ka oras