Korte Suprema sa Norway Nagtuboy sa Relihiyosong mga Katungod

UNSANG mga kahimtang ang maghimo sa usa ka ginikanan nga dili-takos sa pagmatutog anak? Kining maong pangutana init nga gilantugian sa mga kaso labot sa katungod sa pag-atiman sa bata sa tibuok kalibotan. Daghang butang ang gitimbang, lakip na ang panglawas sa matag ginikanan, mga kahimtang sa pagpanimuyo, ug relasyon sa bata.

Apan komosta ang relihiyon? Mahimo bang ipahayag ang usa ka ginikanan nga dili takos tungod lamang sa iyang tinuhoan? Kining pangutanaha maoy sentro sa pag-ilogay sa katungod sa pag-atiman nga nahitabo sa Norway nga naglangkit sa usa sa mga Saksi ni Jehova. Kapin sa duha ka tuig ang milabay ug tulo ka bista ang nahimo una pa nahusay ang isyu sa Korte Suprema sa Norway.

Nagsugod kini niadtong 1988. Ang mga ginikanan bug-os nga nagbulag sa pagka-Marso 1989, ug ang inahan maoy nakabaton pag-usab sa katungod sa pag-atiman sa ilang anak nga babaye. Gidala sa amahan ang maong kaso sa korte, nga nagreklamo nga siya ang kinahanglang hatagan sa bug-os nga kaakohan sa pagkaginikanan sa bata nga babaye. Siya nangatarongan nga ang inahan walay katakos sa pagtagana ug normal, himsog nga pagpadako sa bata ug busa angayng hatagan lamang ug mga katungod sa pagduaw. Ang katarongan sa iyang pangangkon? Siya nakig-uban sa mga Saksi ni Jehova.

Nangayog “eksperto” kunohay nga mga pamatuod gikan sa mga magsusupak sa mga Saksi ni Jehova, ang amahan mihimog mga lakang sa pagkombinser sa korte nga ang mga pagtulon-an ug estilo-sa-kinabuhi sa mga Saksi ni Jehova supak sa mga tinamdan ug mga sukdanan nga kinahanglanon sa responsableng pagpadakog bata ingong ginikanan. Ang korte sa probinsiya midesisyon ug 2 batok sa 1 nga ang bata angayng magpabilin sa iyang inahan alang sa matag-adlaw nga pag-atiman, nga naghatag sa amahan ug katungod sa pagduaw. Ang amahan miapelar sa kaso sa mas hataas nga korte. Sa makausa pa, ang 2-batok-1 nga desisyon nagtuboy sa adlaw-adlaw nga pag-atiman sa inahan sa bata. Apan, niining higayona ang katungod sa amahan sa pagduaw gilugwayan. Dugang pa, bisan ang mga huwes nga nagdesisyon pabor sa inahan daw natuboan ug mga pagduhaduha labot sa kaugmaon sa bata. Uban niining nalig-ong posisyon, ang amahan miapelar sa kaso ngadto sa Korte Suprema sa Norway.

Sa makausa pa, ang amahan naningkamot sa pagdaot sa mga pagtulon-an sa mga Saksi ni Jehova. Makadaot, matod pa niya, alang sa iyang anak nga babaye nga magdako ubos sa maong impluwensiya.

Hinunoa, lahi ug paglantaw ang Korte Suprema. Ingong pagpaluyo sa desisyon nga gihatag sa Agosto 26, 1994, ang unang huwes sa korte miingon: “Ang pagkamembro sa inahan sa mga Saksi ni Jehova dili babag aron ihatag kaniya ang adlaw-adlaw nga pag-atiman sa bata.” Siya nag-ingon usab: “Nakita nako nga maayog lakaw ang bata ug usa siya ka malipayong bata nga babaye. Dayag iyang nadumala ug maayo ang mga suliran nga tingali mitungha tungod kay ang iyang amahan ug inahan lahi kaayo ug mga hunahuna bahin sa kinabuhi.” Ang iyang konklusyon giuyonan sa tanang ubang upat ka huwes.

Ang mga mahigugmaon sa kamatuoran sa Norway nagpasalamat ug dako nga ang mga huwes sa Korte Suprema nakakita sa bakak nga mga sumbong batok sa mga Saksi ni Jehova. Pinaagi niining maong desisyon gilig-on sa korte ang kagawasan sa indibiduwal sa pagsimba sa Diyos ug sa paghatag sa iyang mga anak ug mahigugmaong pagmatuto pinaagi sa mga prinsipyo sa Bibliya.a

[Footnote]