Dili Ordinaryong Hugaw!

BIYERNES, Marso 24, 1989, ang barkong Exxon Valdez nga may kargang krudo nabangga sa takot sa Prince William Sound sa Alaska. Ingong resulta, 42 ka milyong litro sa krudo mibugwak ngadto sa tubig. Gipilde sa aksidente ang pangabuhi sa lokal nga mga mangingisda, naghugaw sa gatos-gatos ka kilometrong baybayon, ug nakapatay sa libolibong mga langgam ug mga hayop sa dagat.

Ang hitabo sa Exxon Valdez nagpadayon sa pagpukaw sa mga emosyon sa mga tawo nga nabalaka sa palibot. Apan, ang labaw pang malalangong “pag-agas sa aseite” nagakahitabo adlaw-adlaw. Ug tingali kini nagakahitabo sa inyong kaugalingong kasilinganan!

Sumala sa Consumer Reports, ang mga tawo nga nagapulig bag-ong aseite sa makina sa ilang mga sakyanan nagapaagas ug duolan sa 750 ka milyong litro ug 1.5 ka bilyong litrong hugaw nga aseite tuig-tuig. Gitaho, “nga mga 10 ngadto sa 14 porsiento sa maong aseite gilabay sa hustong paagi.” Kining gamay nga porsentahi sa biya nga aseite magamit, sanglit adunay ubang mapuslanong mga produkto ang magama gikan niana. Apan unsay mahitabo sa nahibilin? Malagmit, ang mga tag-iyag sakyanan yanong nagalabay niana ingong ordinaryong hugaw.

Matag tuig milyon-milyong litro sa biya nga aseite ang mayabo diha sa yuta, sa mga sapa, o sa mga imbornal. Nagkinahanglan ug 25 ka pag-agas sa Exxon Valdez aron makaabot nianang gidaghanona sa aseite! Apan ang ginamit nga aseite, ug ubang mga hugaw sa sakyanan, sama sa batok-pabagtok, brake fluid, ug aseite para sa transmisyon, dili ordinaryong hugaw. Kini mas grabe pa.

Ang Consumer Reports miingon nga kon ang aseite makasuhop “ngadto sa tubig ilimnon, kini adunay seryoso nga sangpotanan: Ang usa ka galon sa ginamit nga aseite mopahinabo sa milyon-milyong galon sa preskong tubig nga dili-mainom, ug ang yanong tunga sa litrong aseite mopahinabog pag-agas nga motabon ug duolan sa katungang ektarya sa tubig.”