Negatibong mga Pagbati—Mahimo ba Nimong Buntogon?

“SIYEMPRE DILI! Kusganon kaayo ang negatibong mga pagbati. Wala koy lain nga mahimo gawas sa pag-antos hangtod nga kini sila mawala.”

Kana ang tubag sa daghan sa ideya nga buntogon ang mga pagbati sama sa kabalaka, kahadlok, kasuko, kapakyasan, pagbati sa sala, kaluoy-sa-kaugalingon, ug kaguol. Apan mahimong buntogon kanang mga pagbatia. Inay magpadaog inigtungha nila, mahimo kang makakat-on sa pagkunhod sa ilang kagrabe, tingali sa pagwagtang gani niini nila.

Hinuon, adunay dakong kalainan tali sa normal negatibong mga pagbati nga pagabation sa tanan ug sa grabeng depresyon o kaguol. Ang ulahi tingalig manginahanglag propesyonal nga pagtambal. Ang nauna wala, ug kini ang mga pagbati nga mahimo natong matun-an sa pagsagubang.

Sa tinuoray, dili tanan nga negatibong pagbati makadaot. Pananglitan, sa dihang makabuhat kag seryosong sayop, basin makapahayag kag pagbasol nga haom sa sayop. Kon magdasig kini nimo sa pagtul-id ug paglikay nga sublion kana sa umaabot, nan ang pagbati adunay positibo layog-abot nga epekto. O ang normal nga kabalaka nga tingalig naagoman nimo kabahin sa usa ka suliran basin magdasig nimo sa pagsagubang nga kusganon ug sa pagpangita ug angay nga sulbad. Kana usa usab ka maayong sanong.

Ugaling, komosta man kon human sa pagbuhat sa imong maarangan sa pagtul-id sa usa ka sayop, ang imong mga pagbati sa sala o kawalay-pulos magpabilin kanimo, nga tingalig molungtad pag dugayng panahon human niana? O komosta man kon human sa pagsulbad sa usa ka suliran kutob sa maarangan, magpabilin ang imong mga pagbati sa kabalaka ug mograbe pa? Sa ingon ang imong emosyonal nga mga reaksiyon basig makapaguol kanimo. Nan, sa unsang paagi mahimo nimong buntogon kanang emosyonal nga mga reaksiyon? Ang yawi tingali makaplagan diha sa pagpugong sa atong hunahuna.

Makapugong Kita sa Atong Panghunahuna

Daghan nga nagtrabaho sa natad sa maayong pangisip nagtuo nga ang atong mga pagbati gipahinabo sa atong mga panghunahuna. Pananglitan, si Dr. Wayne W. Dyer mipunting: “Dili ka makabatog pagbati (emosyon) nga dili makasinati pag-una sa usa ka panghunahuna.” Si Dr. David D. Burns midugang sa pag-ingon: “Matag daotang pagbati nga imong nabatonan mao ang bunga sa imong hiwi negatibong panghunahuna.”

Makapaikag, sa susama gipasangil sa Bibliya ang kadaghanan sa atong gibati nganha sa atong gipalabing mga panghunahuna, mao nga nagpasiugda kini sa panginahanglan nga pugngan ang atong panghunahuna. Matikdi ang mosunod nga mga bersikulo:

“Ang tanang adlaw sa sinakit maoy daotan; apan ang usa nga maayo ug kasingkasing sa kanunay may kombira.”​—Proverbio 15:15.

“Hunong na kamo sa pagpahiuyon niining sistema sa mga butang, apan magbag-o kamo pinaagi sa pagbag-o sa inyong hunahuna, aron inyong mapamatud-an sa inyong kaugalingon ang maayo ug dalawaton ug hingpit nga kabubut-on sa Diyos.”​—Roma 12:2.

“Ginabihag namo ang tanang panghunahuna aron kini magmasinugtanon kang Kristo.”​—2 Corinto 10:5.

“Hukasa ninyo ang daang pagkatawo nga nahiuyon sa inyong kanhing kagawian . . . ; kinahanglang magbag-o kamo diha sa gahom nga nagapalihok sa inyong hunahuna, ug isul-ob ninyo ang bag-ong pagkatawo nga nalalang sumala sa kabubut-on sa Diyos diha sa matuod nga pagkamatarong ug pagkamaunongon.”​—Efeso 4:22-24.

“Bisan unsang mga butang tinuod, bisan unsang butang maugdang, bisan unsang butang matarong, bisan unsang butang ulay, bisan unsang butang hiligugmaon, bisan unsang butang maayong pamation, bisan unsang maayong batasan ang anaa ug bisan unsang butang dalayegon ang anaa, padayon sa pagpalandong niining mga butanga.”​—Filipos 4:8.

“Itumong ang inyong mga hunahuna sa mga butang nga anaa sa itaas, dili sa mga butang dinhi sa yuta.”​—Colosas 3:2.

Sanglit ang inyong mga pagbati sa panguna maoy bunga sa inyong panghunahuna, ang yawi sa pagbuntog sa inyong negatibong mga pagbati mao ang pagpugong sa mga panghunahuna nga nagapaluyo kanila. Uban sa igong paningkamot ug panahon, makat-onan nimo ang pagpugong nga labaw pa sa imong mga panghunahuna. Busa ang makataronganong resulta mao nga mabuhat nimo kana sa imong mga pagbati.

Tinuod, sayon ang pagsulti nga mahimo natong buntogon ang atong negatibong mga pagbati. Apan laing butang ang pagbuhat sa aktuwal niana. Nan, sa unsang paagi makasagubang kita sa maong mga pagbati nga basin nakapahinabog dakong kalisdanan kanato?

[Blurb sa panid 4]

Dili tanan nga negatibong pagbati makadaot