Negatibong mga Pagbati—Sa Unsang Paagi Mabuntog?

ANG unang lakang padulong sa pagpugong sa negatibong mga pagbati mao: Ilha ang negatibong mga panghunahuna.

Ikaduha: Paningkamot sa pagtul-id sa negatibong mga panghunahuna. Kon, pananglitan, naghunahuna ka, ‘Wala gayod akoy mabuhat nga matarong,’ pulihi kinig, ‘Ako pareho lang sa uban; daghang matarong nga butang ang ginabuhat ko, apan may bahin usab ako sa mga kasaypanan.’

Ayaw pagdahom nga maayo dihadiha ang imong pagabation tapos sa paghimo sa maong pagtul-id (bisan pag tingali bation mo kana), ug ayaw ipadayon ang lantugi niana sa kaisipan. Himoa lang ang paglig-on niana ug magpadayon sa sunod nga lakang.

Ang ikatulong lakang mao ang pagsingkamot sa paglangkat sa makapatugaw nga panghunahuna gikan sa imong alimpatakan. Sulayi ang paghiklin nga kusganon ug masaligon aron mahigawas kana sama sa imong pagabuhaton sa hunahuna nga mohimog usa ka seryosong krimen. Bisan pag tingali mahimo nimo kini pinaagig kusganong paningkamot sa hunahuna, dakog ikatabang sa paghimo niana ang ikaupat nga lakang: Itumong ang hunahuna sa lain nga butang, sa butang nga makapalig-on.

Hinungdanon kini kay ang imong negatibong mga panghunahuna subsob nga mopugos sa pagsulay sa pagbalik sa imong alimpatakan. Apan nabatonan nimo kining bentahaa: Makatumong ka sa bug-os nga pagtagad sa usa ka butang sa usa ka panahon. Mapamatud-an nimo kini sa imong kaugalingon pinaagi sa pagsulay sa paghatag ug bug-os nga pagtagad sa duha ka ulohan sa samang panahon. Kon ang imong kaisipan bug-os naghunahunag laing butang, ang imong negatibong mga panghunahuna malisdan sa pagbalik.

Ang paagi nga ang negatibong mga panghunahuna kapulihan ug positibong mga panghunahuna giilustrar ni Dr. Maxwell Maltz, kinsa miingon: “Sa dihang ang imong ponograpo nagatokar sa musikang dili nimo gusto, dili nimo sulayan ang pagpugos niana sa pagtokar ug mas maayo. . . . Pulihan lang nimo ang rekord nga gitokar ug ang musika malain na. Gamita ang samang teknik sa ‘musika’ nga mogawas sa imong kaugalingong makina sa kahiladman.”

Oo, ang negatibong mga panghunahuna sagad kusganon kaayo nga dili yanong malangkat. Kinahanglang pugson kana sa pagpagawas pinaagi sa kapuli. Ibutang ang laing “rekord,” usa ka positibong rekord. Balhin sa lain, makapalig-on nga “channel,” usa ka laing “estasyon,” ug ibug-os ang pagtagad niana.

Kini Malisod

Ang upat ka lakang sa itaas sayon lang isaysay, apan lisod kaayong sundon! Busa, ayawg katingala kon sa sinugdan lisdan ka sa pagbuntog sa negatibong mga panghunahuna ug mga pagbati. Dahomang lisod kana, apan hibaloi nga sa nahaigong panahon mahimo kana nga mas sayon.

Tagda ang panig-ingnan ni Cindy, usa ka magtutudlo nga gipadako sa usa ka inahang alkoholiko. Sa daghang katuigan si Cindy nag-antos sa mga pagbati sa sala ug kawalay-kasegurohan. Dayon siya mihukom sa pagsagubang sa suliran. Unsay iyang gibuhat?

Si Cindy misaysay: “Sa sinugdan ako naningkamot sa pag-ila sa espisipikong mga panghunahuna nga nagpahinabo sa akong negatibong mga pagbati. Inigpaibabaw niining mga panghunahunaa, ako kanang hunahunaon pag-usab, sa makataronganon ug dili-madapigong paagi. Unya paningkamotan ko ang pagpadagaya sa positibong mga panghunahuna. Pugson ko ang akong kaisipan sa paghunahuna sa akong mga estudyante ug kon sa unsang paagi makatabang ako kanila. Sa inanay, kini nahimong mas sayon, ug gibati ko nga mas makapugong sa akong mga pagbati.”

Apan, basin mahibulong ka . . .

Nganong Lisod Kaayo?

Ang daotang mga batasan ba, sama sa hinobrang pagkaon o pagtabako, sayon nga hunongon? Dili gayod! Sila mabuntog lang pinaagi sa tinuyo, determinadong paningkamot latas sa usa ka yugto sa panahon. Alang sa daghan, ang negatibong panghunahuna maoy usa ka batasan, ug sama sa ubang daotang mga batasan, kini lisod hunongon.

Kon ang negatibong panghunahuna nahimo nang batasan nimo, ang pagbuntog niana lagmit magkinahanglan sa samang determinasyon nga kinahanglanon sa usa ka tawo nga magdiyeta o sa usa nga mohukom sa paghunong sa pagtabako.

Ang punto mao, ayawg hunong sa pagpaningkamot ug ihukom ang pagpabiling magul-anon tungod kay mas sayon ang paghimo niana. Pabilin sa imong pakigbisog batok sa negatibong panghunahuna, bisan pag nagkahulogan kana sa daghang bulan sa pagsulay niini ug niana ug tingali pagsugmat. Ipadayon ang imong paningkamot samag ikaw nagbansay alang sa usa ka atletikong bangga. Lantaw sa layog-abot nga mga sangpotanan inay sa dihadihang katagbawan.

Malangkat ba Sila nga Bug-os?

Ang negatibong mga pagbati malangkat ba nga bug-os? Aw, kon nagdahom ka sa pagkab-ot ug hingpit nga kalipay karon, masinati nimo ang kapakyasan ug kapalaw. Ang kalipay sa pagkakaron maoy relatibo ug dili bug-os. Apan kana labi pang maayo gihapon kay sa pagkabilanggo sa kinabuhi nga may balikbalik ug makapaluya nga negatibong mga pagbati.

Nagkahulogan ba kining ang negatibong mga pagbati dili gayod mabuntog? Wala gayod. Ang Bibliya matinud-anong nagsaysay nga kining di-hingpit nga kahimtang magauban pa kanato sa makadiyut, apan adunay tinudlong panahon nga wagtangon kini sa walay kataposan. Kana mahitabo sa dili na madugay sa dihang ang Gingharian sa Diyos, ang iyang langitnong kagamhanan diha sa mga kamot ni Jesu-Kristo, bug-os mobanos sa tanang kahikayan niining yutaa ug mosugod sa palakaw sa pagbayaw sa katawhan ngadto sa tawhanong kahingpitan. Si Jesus nagtawag sa palakaw “ang paglalang pag-usab [o, “pagbag-o,” potnot].”​—Mateo 19:28; tan-awa usab ang Salmo 37:29; Mateo 6:9, 10; Pinadayag 21:3-5.

Apan, sa pagkakaron ang pagdawat sa mga limitasyon nga gipahamtang kanato tungod sa tawhanong kadili-hingpit maghimo nimong mas malipayon. Inay sa paghingapin sa pagpangita sa hingpit nga maayong panghunahuna, ikaw mahigawas aron sa pagpangagpas sa ubang mga butang sa kinabuhi. Ug imong hikaplagan ang dako pang kalinaw sa hunahuna ug kalipay sa pagkahibalo nga ang kinalabwang solusyon sa negatibong mga pagbati nahiluna sa may-katakos nga mga kamot sa Diyos nga Makagagahom sa Tanan.

Ang mga sugyot ba dinhi maoy mga pangagpas lamang? Tinuod ba nga molampos sila? Segurado nga molampos sila, sumala sa gipakita sa mosunod tinuod-kinabuhing mga kasinatian.

[Blurb sa panid 6]

Ang negatibong mga panghunahuna kapulihan nimo ug positibong mga panghunahuna

[Blurb sa panid 6]

Ayawg hunong sa pagpaningkamot ug ihukom ang pagpabiling magul-anon tungod kay mas sayon ang paghimo niana

[Hulagway sa panid 7]

Sama sa pagpaniwang, ang pagkat-on sa pagpugong sa atong mga pagbati magkinahanglag panahon ug pagkamalahutayon