Gikan sa Among mga Magbabasa
Pit Bulls Ako nagpanag-iya ug usa ka pit bull, ug siya ang pinakaaghop ug labing maulawon nga iro nga akong napanag-iyahan masukad. Busa nahiubos ako sa ulohan sa artikulong “‘Mga Iro ba sa Yawa’?” (Mayo 22, 1992) Kining ulohana nagpasabot nga ang tanang mga pit bull may kalabotan kang Satanas ug mga butang nga daotan. Ang pagpanag-iya lamang sa usa ka pit bull mahimo na karong makapadisgusto sa uban. Hinuon, ako nagauyon nga ang mga tawo kinahanglang managana kon sila naghunahuna sa pagpanag-iyag usa. Buot kong mosugyot nga ilang sayron ang kagikan sa iro ug sa iyang mga ginikanan. Usab, susihon kon ang iro ba giatiman ug maayo. Kon mao, kana may dakong purohan nga adunay malumong kinaiya.
L. H., Tinipong Bansa
Ang among ulohan gikutlo lamang sa mantalaang Britaniko, nga sa subsob naggamit niining terminoha sa paghulad sa dili-matagnaang pit bull. Kami wala magpasabot nga kining mga iroa maoy sataniko sa kinaiya; ni kami nag-isip nga dili husto ang pagpanag-iya kanila. Apan tungod sa tinuod nga kapeligrohan, among giaghat ang mga tag-iya sa pit bull sa paghimo ug ekstra nga pangandam aron mahuptang nakontrolar ang maong mga mananap.—ED.
Pakig-away nga Mabuhi Pagkatapos mabasa ang artikulong “Ang Akong Pagpakig-away nga Mabuhi,” Buot kong pasalamatan si Hans Augustin ug iyang asawa. (Abril 22, 1992) Buot ko silang pasalamatan alang sa ilang kaisog ug ilang panig-ingnan sa kamatinud-anon kang Jehova bisan pa sa pag-antos. Ako sinati pag-ayo sa personal sa matang sa kasinatian nga ilang ginaagom, ug ako sa subsob naghunahuna kanila ug nag-ampo alang kanila.
A. Y., Pransiya
Bag-o lang nako natapos pagbasa ang artikulo, ug ang mga luha midaligdig sa akong nawong. Ang maong mga artikulo nagpakita kanato nga kita daghan ug maayong Kristohanong mga igsoong lalaki ug igsoong babaye sa tibuok-kalibotan nga nag-antos ug hilabihan ug bisan pa nagpabilin nga malig-on sa ilang pagtuo. Kita usab gitabangan sa pagtimaan nga kon ang atong mga suliran dako man o gamay, ang pangunang butang mao ang pagpabilin nga nagatutok sa panahon sa dihang kining tanang daotang mga kasinatian dili na gani mahinumdoman.
R. T., Tinipong Bansa
Pagkanahimong Lahi Salamat kaninyo alang sa artikulong “Mga Batan-on Nangutana . . . Nganong Kinahanglan nga Ako Malahi?” (Hunyo 8, 1992) Ako usa ka 18-anyos nga Kristohanon, ug akong dawaton nga lisod gayod ang mahimong lahi gikan sa ubang mga batan-on. Sa dihang sila mangutana, “Nganong dili kamo magbisti sama kanamo?” o, “Nganong dili moadto niining sayawan?” ug daghan pa, gikinahanglan ang kaisog sa pagtubag ug paghatag ug pagpatin-aw. Apan uban sa tabang ni Jehova ug sa magasing Pagmata!, nakaarang ako sa paghimo niana. Salamat kaninyo sa pagtagad kanamo!
H. O. N., Brazil
Mga Uk-ok Ang artikulong “Ang Dili-Mapuong Uk-ok” makaiikag kaayo. (Enero 22, 1992) Ang akong pamilya nagpadapat sa impormasyon, ug sukad niadto, la cucaracha wala na igkita sa among balay.
B. H., Tinipong Bansa
Natun-an nako ang mga uk-ok sa eskuylahan mga tulo ka tuig ang milabay. Apan wala gayod nako sila isipa nga mapuslanon. Ako natingala sa pagkahibalo nga ang mga uk-ok, nga sagad gitan-aw ingong mga kaaway, mahimong mapuslanon sa usa ka paagi. Karon nasabtan usab nako kon nganong lisod silang puohon, bisan pinaagi sa mga pesticide.
E. A., Nigeria
Ako nahibulong nga wala ninyo hisgoti ang boric nga asido ingong usa ka “tambal” alang sa pagpuo sa uk-ok. Nagamit namo kini sa balay, ug kana misaler!
S. D., Tinipong Bansa
Ang mga tigdukiduki nagpasidaan nga ang asidong boric mahimong may seryosong kapeligrohan sa panglawas alang sa mga masuso ug mga bata. Tan-awa ang “Gikan sa Among mga Magbabasa” sa Oktubre 22, 1984, nga isyu sa “Pagmata!”—ED.