Masanag nga Kaugmaon Alang sa mga Bata

SA World Summit for Children, daghang mga pangulo sa kalibotan ang masaligong misulti mahitungod sa ugma-damlag. Ilang gitagna ang “usa ka bag-ong yugto” alang sa mga bata, “usa ka bag-ong dedikasyon alang sa mga panginahanglan sa bata.” Sila nanagsulti mahitungod sa “‘usa ka bag-ong panaghiusa’ nga naghatag ‘kinabuhi sa usa ka nahiusa ug determinado nga panagkumboya sa kalibotan’” aron tabangan ang mga bata.

Kadto maoy halangdong mga pulong. Apan kon asa kutob ang himoon sa mga nasod sa pagpalampos sa ilang mga tumong ato pang tan-awon. Takos hinumdoman nga sulod sa lima ka bulan tapos sa summit, ang mga nasod nakigbugno sa Gulpo sa Persia sa usa ka gubat nga namatud-ang usa sa labing gastoso​—$6l bilyon—​ug mas malaglagon sa kalikopan masukad. Sa iyang pagkatapos gatosan ka libong mga tawo sa Iraq ug Kuwait ang napahawa. Linibo ang namatay​—sa usa ka yugto gatosan ka tawo kada adlaw—​gumikan sa gutom, pagkaladlad, malnutrisyon, ug sakit. Mga 8 sa matag 10 maoy mga babaye ug mga bata.

Mga Kasakitan Gitagna

Ang mga estudyante sa Pulong sa Diyos nahibalo nga ang mga suliran nga naghampak sa mga bata sa kalibotan natagna na halos duha ka libo ka tuig sa miagi. Ang Bibliya nagtagna niining “kataposang mga adlaw”:

◻ “Aduna unyay . . . mga kamatay.”—Lucas 21:11.

◻ “Aduna unyay kanihit sa pagkaon.”—Mateo 24:7.

◻ “[Ang mga tawo] magalaglag sa yuta.”​—Pinadayag 11:18.

◻ “Ang mga nasod managgubat batok sa nasod ug ang gingharian batok sa gingharian.”​—Marcos 13:8.

◻ “Moabot ang panahon nga lisod sagubangon. Kay ang mga tawo magmahigugmaon sa ilang kaugalingon, . . . nga walay kinaiyanhong pagbati.”​—2 Timoteo 3:1-3.

Ang Bibliya usab nagtagna nga sa dili madugay moabot ang panahon sa dihang ang mga nasod maghunahuna nga sila milampos sa pagsulbad sa mga suliran sa katawhan nga sila magapahayag: “Kalinaw ug kasegurohan!”​—1 Tesalonica 5:3.

Usa ka Masanag nga Kaugmaon

Hinuon, kanang pahayaga sa pagkatinuod magtimaan sa panahon nga ang Diyos mangilabot sa mga kalihokan sa katawhan. Pinaagi sa iyang langitnong Gingharian, ang Diyos mopapha niining presenteng sistema sa mga butang ug magpasulod sa usa ka bag-ong kalibotan sa tinuod nga kalinaw ug dumalayong kasegurohan, alang sa mga bata ingon man sa mga hamtong.​—Proverbio 2:21, 22; Daniel 2:44; Mateo 6:10.

Ubos sa matahom nga kahikayan sa Gingharian sa Diyos, “walay molupyo ang magaingon: ‘Masakiton ako.’” (Isaias 33:24) Ang malnutrisyon mahimo na lamang butang sa kagahapon: “Adunay daghang trigo sa yuta; sa tumoy sa kabukiran magaawas.” (Salmo 72:16) Bisan ang gubat mawala na, kay ang Bibliya nagsaad: “Nagapahunong siya [Jehova] sa mga gubat hangtod sa kinatumyan sa yuta.”​—Salmo 46:9.

Apan unsay mahitabo sa tanang mga bata​—ug sa uban—​nga nangamatay na gumikan sa malnutrisyon, sakit, ug ubang mga hinungdan? Ang dinasig nga Pulong sa Diyos nagpahayag: “Adunay pagkabanhaw sa mga matarong ug sa mga dili matarong.”​—Buhat 24:15.

Sa dihang dinhi siya sa yuta, gipasundayag ni Jesu-Kristo nga ang pagkabanhaw sa kinabuhi ibabaw sa yuta diha sa bag-ong kalibotan sa Diyos maglakip sa mga bata. Pananglitan, sa dihang ang usa ka batang babaye nga mga 12 anyos namatay, “ang mga tawo nagpanghilak ug nagminatay kaniya.” Apan taodtaod, iyang gigunitan ang kamot sa dalagita, unya giingnan siya ni Jesus: “Inday, bumangon ka!” Ang makasaysayanhong asoy nagbatbat: “Siya mibangon dihadiha, ug siya [Jesus] nagsugo nga hatagan siyag makaon.” Unsay reaksiyon sa iyang mga ginikanan? Ang Bibliya nagtaho: “Sila giabot ug dakong kahibulong.”​—Lucas 8:40-42, 49-56; Marcos 5:42.

Sa laing okasyon, nakasugat ni Jesus ang usa ka yayong sa minatay nga naglangkit sa usa ka balo kansang bugtong anak nga lalaki namatay. Si Jesus “miduol ug gikuptan ang lungon, ug ang mga nagyayong niini mihunong, ug siya miingon: ‘Dong, ingnan ko ikaw, Bangon!’ Ug ang minatay milingkod ug misugod sa pagsulti, ug iyang [Jesus] gihatag siya sa iyang inahan.” Ug kadtong anaa sa duol “misugod sa pagdayeg sa Diyos.”​—Lucas 7:11-16.

Mao nga, ubos sa matarong nga pagmando sa gobyerno sa Gingharian sa Diyos, ang mga bata, lakip kadtong mga banhawon, makabaton sa kinasanagang kaugmaon nga posible. Sila modako diha sa usa ka kalibotan sa pagkamatarong ug kalinaw nga matahom kaayo, nga luwas kaayo, nga madagayaon kaayo, nga si Jesus haom gayod nga nagtawag niana nga “Paraiso.”​—Lucas 23:43.

[Hulagway sa panid 9]

Sa bag-ong kalibotan sa Diyos, ang mga bata modako nga luwas, himsog, ug malipayon