Haduol na ang Usa ka Bag-ong Kalibotan!

ANG dagkong tawo sa kagamhanan daghan kaayog gipahayag mahitungod sa usa ka bag-ong kalibotang kahikayan nga ilang himoon. Sila nagahisgot nga paphaan ang kalibotan sa mga kahadlok ug mga babag sa kooperasyon sa mga tawo ug sa mga nasod. Apan iya ba sa tawo ang pagpatunghag usa ka bag-ong kalibotan?

Ang katawhan nakaagig daghang kasiglohan aron matukod ang usa ka kalibotan sa kalinaw ug kasegurohan. Piho, daghan maoy tim-os kaayo sa maong mga paningkamot. Hinunoa, bisan unsa pay porma sa kagamhanan nga namugna sa tawo aron matuman ang maong mga tumong, ang mga pulong sa Bibliya matuod: “Kini wala sa tawo nga molakaw aron sa pagtultol sa iyang mga lakang.”​—Jeremias 10:23.

Usa ka Gisaad nga Bag-ong Kalibotan

Bisan pa, ang mao gihapong dinasig nga Pulong sa Diyos naghatag ug pasalig nga adunay usa ka bag-ong kalibotan. Human mitagna mahitungod sa usa ka daang sistema sa mga butang, ang Kristohanong apostol Pedro miingon: “Sumala sa iyang saad kita nagapaabot sa bag-ong mga langit ug usa ka bag-ong yuta diin nagapuyo ang pagkamatarong.”​—2 Pedro 3:10-13.

Kang kinsang saad kini? Kini gihatag walay lain kondili ni Jehova, “ang Labing Hataas ibabaw sa tibuok nga yuta.” (Salmo 83:18) Iyang buhaton ang dili mabuhat sa mga tawo. Oo, si Jehova nga Diyos maoy mopatungha sa usa ka bag-ong kalibotan. Apan kanus-a?

Haduol na Kaayo ang Usa ka Bag-ong Kalibotan!

Sa dili pa bug-os matuman ang gisaad nga bag-ong kalibotan sa Diyos, ang presenteng “kalibotan,” o “sistema sa mga butang,” kinahanglang taposon. Mahitungod niini, ang mga disipulo ni Jesu-Kristo nangutana: “Tug-ani kami, kanus-a man mahitabo kining mga butanga? ug unsa may ilhanan sa imong pag-anhi, ug sa kataposan sa kalibotan?” (Mateo 24:3, King James Version) Sumala sa tukmang pagkahubad niana sa New World Translation, ang mga disipulo ni Jesus nangutana: “Tug-ani kami, Kanus-a man mahitabo kining mga butanga, ug unsa may ilhanan sa imong presensiya ug sa konklusyon sa sistema sa mga butang?”

Sa pagtubag, si Jesus mitagna ug daghang bahing ilhanan sa iyang dili-makitang presensiya ingong espiritung persona sa langitnong gahom sa Gingharian. (1 Pedro 3:18) Pananglitan, siya miingon: “Ang mga nasod managgubat batok sa nasod ug ang gingharian batok gingharian, ug mahitabo ang mga gutom ug mga linog sa nagkalainlaing mga dapit.” Sukad sa “sinugdanan sa mga kasakit” sa 1914, “kining kaliwatana” nga gipunting ni Jesus nakaagi ug padayong panaggubat, gutom, ug mga linog ingong bahin sa ilhanan sa iyang dili-makitang presensiya.​—Mateo 24:7, 8, 34.

Natugob sa gubat kining kaliwatana nga walay-katumbas sukad sa tuig 1914. Ang Gubat sa Kalibotan I nakapildi ug gibanabanang 14 milyones ka kinabuhi. Sa panahon sa Gubat sa Kalibotan II, 55 milyones ka sundalo ug mga sibilyan ang nangamatay. Gani, sukad sa 1914 kapin sa 100 milyong kinabuhi ang napildi sa gubat! Sa pagkamatuod, kini nagtimaan ingong bahin sa ilhanan sa presensiya ni Jesus.

Ang gutom, nga gitagna ni Kristo, mihampak sa daghang kayutaan human sa duha ka gubat sa kalibotan. Bisan pa sa kauswagan sa siyensiya, hapit upat ka bahin sa kalibotan gigutom karong adlawa. Matag tuig, milyonmilyong kabataan ug uban nangamatay tungod sa kakulang ug kaon. Nagkanayon ang The World Book Encyclopedia: “Ang kadaghanan sa nagakaugmad nga mga nasod sa Aprika, Asia, ug Latin Amerika halos walay makaon alang sa ilang katawhan. Milyonmilyon niining mga nasora gipanggutom. Kon mous-os ang produksiyon sa pagkaon o mga importe sa bisan unsang katarongan, mohampak ang gutom ug libolibo o milyonmilyong mga tawo tingali mamatay.”

Ang mga linog nakapildi ug daghang kinabuhi niining kaliwatana nga nagtimaan sa “panahon sa kataposan.” (Daniel 12:4) Ang mga pagbanabana sa mga nangamatay sa linog nagkalainlain. Apan sukad sa 1914 ang kalaglagan pinaagi sa mga linog miuswag sa tibuok kalibotan, ug kini nakapildi ug ginatos ka libong mga kinabuhi. Mikomento sa duha lamang niini, ang Yorkshire Post sa Oktubre 19, 1989, nag-ingon: “Sa 1920 ang linog sa lalawigan sa Jiangsu sa Tsina nakapatay ug 180,000, ug sa Hulyo 28, 1976, nag-antos ang Tsina sa labing grabeng linog sa modernong kasaysayan. Labing menos 240,000 ang nangamatay sa dihang ang amihanan-kasadpang siyudad sa Tangshan halos gipatag sa linog nga may sukod nga 7.8 sa dili tukmang pagkatakdong sukod sa Richter scale.” Ang mantalaan naglista ug kapin sa 30 ka dagkong mga linog sa ika-20ng siglo.

Ang buluhaton sa pagsangyaw-sa-Gingharian gitagna usab ingong usa sa mga bahin sa ilhanan sa dili-makitang presensiya ni Jesus. Iyang gisultihan ang iyang nangutanang mga disipulo: “Kining maayong balita mahitungod sa gingharian igawali ngadto sa tibuok gipuy-ang yuta ingon nga pagpamatuod sa tanang kanasoran; ug unya moabot ang kataposan.” (Mateo 24:14) Sumala sa gitagna ni Jesus, kining pagsangyaw nga buluhaton ginahimo karon sa tibuok yuta diha sa 212 ka kayutaan sa kapin sa 4,000,000 ka mga Saksi ni Jehova.

Ang presenteng-adlawng mga katumanan niini ug ang uban pang mga tagna nagpamatuod nga kita nagkinabuhi na gayod niining “kataposang mga adlaw.” (2 Timoteo 3:1-5) Anaa sa atong unahan mao ang “dakong kasakitan” nga gitagna usab ni Jesu-Kristo. Modangat sa kinatayoktokan sa “gubat sa dakong adlaw sa Diyos nga Labing Makagagahom” diha sa Har–​Magedon, taposon niini ang presente daotang sistema sa mga butang. (Mateo 24:21; Pinadayag 16:14-16) Unya ang gisaad nga bag-ong kalibotan sa Diyos matuman na unya.a

Mga Panalangin nga Dili Mapatungha sa Tawo

Ang dagkong tawo sa kagamhanan nagapasiatab mahitungod sa usa ka bag-ong kalibotang kahikayan nga ilang pagahimoon. Apan si Jehova, ang Diyos sa langit ug sa yuta, wala gayod mohangyo sa mga tawo nga pulihan ang presenteng sistema ug usa ka bag-ong kalibotan. Siya mismo ang mohimo niana sa adlaw ug oras nga siya lamang ang nahibalo. (Mateo 24:34, 36) Ang tigulang nga apostol Juan may panan-awng daan sa pagabuhaton unya sa Diyos, dili sa tawo:

“Ug unya nakita ko ang bag-ong langit ug usa ka bag-ong yuta; kay ang unang langit ug ang unang yuta nangahanaw na, ug ang dagat wala na. Ug nakita ko usab ang balaang siyudad, ang bag-ong Jerusalem, nga nanaog sa langit nga gikan sa Diyos ug giandam ingong usa ka pangasaw-onon nga gidayandayanan alang sa iyang pamanhonon. Ug nadungog ko gikan sa trono ang usa ka dakong tingog nga nag-ingon, ‘Tan-awa! Ang puloy-anan sa Diyos anaa uban sa mga tawo, ug siya magapuyo ipon kanila ug sila mahimong iyang katawhan. Ug ang Diyos gayod mao ang makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon wala na, ug wala na usab unyay pagminatay ni paghilak, ni kasakit. Kay ang unang mga butang nangagi na.’ Ug ang Usa nga naglingod sa trono miingon: ‘Tan-awa! Gibag-o ko ang tanang mga butang.’ Usab, miingon siya: ‘Isulat mo kini, kay kining mga pulonga kasaligan ug matuod.’”​—Pinadayag 21:1-5.

Ang “bag-ong langit” mao ang langitnong Gingharian ni Jesu-Kristo. Ang “bag-ong yuta” dili laing yutan-ong kalibotan kondili maoy usa ka bag-ong katilingban sa mga tawo niining planetaha​—silang tanan maoy masinugtanong mga ginsakpan sa Gingharian ni Kristo, nga walay pagbahinbahin sa rasa, nasod, o mga pinulongan. (Itandi ang Salmo 96:1.) Ang presente simbolikong langit ug yuta​—ang sistema sa mga butang sa Yawa uban sa mga gambalay niini sa kagamhanan nga giimpluwensiyahan ni Satanas ug sa iyang mga demonyo​—pagalaglagon. (1 Juan 5:19) Bisag magpabilin ang literal nga kadagatan, ang mahulagwayong dagat nga dili-mahimutang, daotang katawhan mahanaw. Ang kaubang mga magmamando ni Jesus sa langit nga gilangkoban sa Bag-ong Jerusalem ug uban kaniya mapormang usa ka kaulohang organisasyon nga maoy momando sa matarong tawhanong katilingban. Ang Diyos ‘magapuyo uban’ sa masinugtanong katawhan sa hawasnong paagi samtang ginapasig-uli pa sila uban kaniya pinaagi ni Kristo sa panahon sa usa-ka-libo ka tuig sa Adlaw sa Paghukom.​—Pinadayag 14:1-4; 20:6.

Ubos sa pagmando sa Gingharian adunay daghang hinungdan sa pagkalipay. Ang pagbalata, paghilak, ug kasakit nga resulta sa balatian, kaguol, ug ang susama niini maoy mga kasinatian unya sa miagi. Bisan ang kamatayon nga mikaylap ngadto sa katawhan gikan sa atong unang ginikanan, ang makasasalang Adan, mawala na unya. (Roma 5:12) Pagkadakong kalipay unya ang maglungtad sa dihang kining tibuok-kalibotang hinungdan sa mga luha mawala na unya sa kataposan!

Dili ang tawong mamatay apan ang Diyos lamang ang naghatag pasalig mahitungod niining panalangina. Siya ang Usa nga nag-ingon: “Tan-awa! Gibag-o ko ang tanang mga butang.” Oo, ug gisultihan ni Jehova si apostol Juan: “Isulat mo kini, tungod kay kining mga pulonga kasaligan ug matuod.”

Pangunang mga Panginahanglan Bug-os Pagatagbawon

Diha sa bag-ong kalibotan nga pagahimoon sa Diyos, ang yuta sa kataposan mahimong usa ka paraiso. Kini tino, kay gisaaran ni Jesus ang usa ka naghinulsol nga mamumuhat ug daotan nga tapad kaniya: “Sa pagkatinuod magaingon ako kanimo karong adlawa, Ikaw magauban kanako sa Paraiso.” (Lucas 23:43) Diha sa paraiso nga kahimtang, ang tawhanong mga panginahanglan sama sa pagkaon ug puloy-anan bug-os nga matagan-an.

Ang gutom nakapatay ug milyonmilyong kinabuhi karon. Bisan unsa pa ka dungganon ang mga paningkamot sa pagpakaon sa mga gigutom, ang kadalo ug ubang mga hinungdan nagapugong sa mga tawo sa pagsulbad sa maong mga suliran. Pananglitan, ang Saturday Star, usa ka mantalaan sa Johan­nes­burg, ­South Africa, mitaho: “Ang mga kasungian sa politika, pagtaas sa prisyo sa sugnod ug ang gibating kakapoy sa kinabag-an uban sa daw walay-kataposang mga panagbingkil nakadugang sa kalangan sa hinabang . . . Sa Sudan, ang usa sa mga nasod nga naapektohag dako sa gutom, mga 5 milyones ug 6 milyones ka tawo ang nagaatubang sa kagutom sa mga tuig sa 1991.” Apan ang gutom pagakalimtan unya sa bag-ong kalibotan sa Diyos. Ubos sa pagmando sa Gingharian, adunay daghang trigo sa yuta; ug sa tumoy sa kabukiran mapuno sa bunga.”​—Salmo 72:16.

Ang puy-anan maoy laing tawhanong panginahanglan nga daghan ang dili makasarang sa atong panahon. Minilyon nagpuyo sa mga balongbalong o kaha wala gayoy mga balay. Sumala pa sa The New York Times, diha sa usa ka nasod sa Sidlakan, “sa usa ka kompaniya sa elektronik . . . , atubangon sa 20 anyos nga mga empliyado ang 73-ka-tuig nga paghulat aron makabaton ug balay,” ug nakita sa usa ka taho sa kagamhanan nga ang ubang tawo napugos sa pagpuyo “diha sa mga bodega, mga opisina o bisan mga kasilyas.” Apan pagkalahi unya kini diha sa bag-ong kalibotan! Diha sa umaabot nga Paraiso, “sila magatukod ug mga balay ug magapuyo niana; ug sila magatanom ug kaparrasan ug magakaon sa ilang bunga. Sila dili magatukod ug unya lain ang magapuyo; sila dili magatanom ug unya lain ang magakaon. Kay sama sa mga adlaw sa usa ka kahoy mao man ang mga adlaw sa akong katawhan; ug ang akong mga pinili magapahimulos pag-ayo sa buhat sa ilang mga kamot.”​—Isaias 65:21, 22.

Ang mga suliran sa ekolohiya mahanaw diha sa gisaad nga bag-ong kalibotan sa Diyos. Ang hulga-sa-panglawas ug makadaot sa tanom nga polusyon sa hangin dili na maglungtad. Ang polusyon ug kalaglagan sa puy-anan nga nagapameligro sa daghang tanom ug mga klase sa hayop dili na unya kapeligrohan. Ug ang maong mga butang sama sa nagakadiyutayng ozone-layer dili na mohatag kapeligrohan sa kinabuhi sa yuta. Kita makatino nga sulbaron ni Jehova nga Diyos kining tanang sulirana, kay ang iyang Pulong nagpasalig kanato nga sa dili madugay iyang “pagalaglagon kadtong nagalaglag sa yuta.”​—Pinadayag 11:18.

Diha sa bag-ong kalibotan sa Diyos, ang gubat mahimo na usab unyang butang sa nangagi apan dili tungod kay ang dagkong mga tawo sa kagamhanan milampos sa pagdis-armar sa mga nasod. Hinunoa, ang Diyos molihok diin ang mga magmamando sa politika napakyas. Iyang ipadangat ang pakigdait diha sa masinugtanong katawhan nga nahauyon niining mga pulonga sa salmista. “Umari kamo, tan-awa ang mga buhat ni Jehova, siya nagtakda ug katingalahang mga hitabo sa yuta. Nagapahunong siya sa gubat hangtod sa kinatumyan sa yuta. Gibali niya ang pana, ug giputolputol ang mga bangkaw; ang mga karro gisunog niya sa kalayo.” (Salmo 46:8, 9) Diha sa bag-ong kalibotan nga gisaad sa Diyos nga haduol na kaayo, ang mga tawo dili na makiggubat kondili magapahimulos sa tinuod nga kalinaw ug kasegurohan.​—Miqueas 4:2-4.

Atua ba Unya Ikaw Didto?

Ikaw makasalig sa bag-ong kalibotan nga gisaad ni Jehova. (Hebreohanon 6:17, 18) Ang iyang Pulong, ang Bibliya, matuod, ug ang gisaad niini matuman gayod.​—Juan 17:17.

Ang maayong balita sa katingalahang mga panalangin alang sa katawhan nga masinugtanon maoy gipaningkamotan sa mga Saksi nga ipaambit sa tanang mga tawong matinud-anon ug kasingkasing. Kinahanglang maningkamot ka karon sa pagbaton sa kahibalo sa balaang katuyoan, ug lihok diha sa katingalahang mga saad nga makita diha sa Balaang Kasulatan. Kining kursoha motultol ngadto sa kinabuhing dayon, kay si Jesus miingon: “Ang kinabuhing dayon mao kini, ang ilang pagkuhag kahibalo kanimo, ang bugtong tinuod nga Diyos, ug sa usa nga imong gipadala, si Jesu-Kristo.” (Juan 17:3) Unya ikaw makapribilehiyo sa pagtagamtam sa malipayong mga panahon nga anaa sa unahan, kay haduol na ang bag-ong kalibotan sa Diyos!

[Footnote]