Ang Unang Internasyonal nga Kombensiyon sa mga Saksi ni Jehova sa Russia

ANG St. Petersburg, Russia, ilado nianang gitawag sa mga molupyo didto nga “puting mga gabii”​—usa ka yugto nga hapit tulo ka semana sa Hunyo dihang ang langit dili gayod mongitngit. Apan ang Hunyo 26 ngadto sa 28 sa 1992 maoy talagsaon.

Niadtong mga adlawa, naghimo ang mga Saksi ni Jehova ug kombensiyon nga nagpukaw sa pagtagad, dili sa literal nga kahayag nga midan-ag sa siyudad sa St. Petersburg sulod sa bayente-kuwatro oras, kondili sa espirituwal nga kahayag nga gipabanaag sa matuod nga mga Kristohanon. Busa ang tema sa kombensiyon mao: “Mga Tigdala sa Kahayag.”

Kadto ang unang internasyonal nga kombensiyon sa mga Saksi ni Jehova sa Unyon Sobyet niadto. Dihay mga delegado gikan sa duolan sa 30 ka nasod sa tibuok kalibotan, apil ang Britanya, Canada, Denmark, Finland, Alemanya, Italya, Hapon, Netherlands, Norway, Sweden, Switzerland, ug ang Tinipong Bansa.

Dugang pa, mga 29,000 ka Saksi gikan sa Unyon Sobyet niadto ang mitambong. Ang uban gikan sa Estonia, Georgia, Latvia, Lithuania, Moldova, ug Ukraine. Ang resulta maoy talagsaon kon palandongon nga nagaantos ang Russia ug kalisod sa panalapi. Talagsaon mao ang presensiya sa mga Russong delegado nga mibiyahe ug duolan sa 8,000 ka kilometros gikan sa Vladivostok ug sa ubang mga dapit sa sidlakang bahin sa Russia.

Ang kinadaghanan sa langyaw nga delegasyon miabot gikan sa kanait nga Finland, nga may kapin sa 10,000 ka hawas. Ang istadyom gibahin sa duha ka seksiyon​—ang Russog-pinulongan ug ang Pinlandis-ug-pinulongan, ang matag usa dunay iyang kaugalingong entablado nga dinhi gipahayag ang programa.

Mga Pagpangandam

Ang lugar nga gihimoan sa kombensiyon mao ang 42-anyos nga Kirov Stadium, nga nahimutang sa isla sa Krestovsky, mga pipila lamang ka kilometros gikan sa sentro sa St. Petersburg. Makapalingkod kini ug mga 60,000 ug mao ang ikaduha sa labing dakong istadyom sa Unyon Sobyet niadto. Makita sa luyo ang mga tubig sa Neva River nga nagaagos ngadto sa Gulf of Finland.

Apan, ang istadyom kinahanglang ayohon. Ang mga imburnal gihaw-asan ug hugaw, ug gitukod ang dugang mga pasilidad sa kasilyas. Hapit 30 ka kilometros ka hagdan-hagdan nga mga lingkoranan sa istadyom kinahanglang pintalan. Dugang pa, gihabas ang mga sagbot sa palibot sa istadyom. Mikabat ug daghang semana ang pagtapos niining trabahoa.

Biyahe ug mga Sak-anan

Sanglit duolan sa 17,000 ka langyawng delegado ang gidapit, ang mga kahikayan sa pagbiyahe ug sak-anan maoy dako kaayo nga trabaho. Ang mga awtoridad sa Russia matinabangon kaayo dili lamang sa nagkalainlaing mga konsulado kondili sa mga utlanan usab ug sa internasyonal nga tugpahanan sa St. Petersburg.

May gihimong kahikayan uban sa 32 ka otel aron kasak-an sa kadaghanan sa 17,000 ka langyawng delegado. Ang 29,000 ka delegado gikan sa nagkalainlaing bahin sa Unyon Sobyet niadto gipasaka sa 132 ka eskuylahan ug sa mga sentro sa day-care. Gikinahanglan usab sa mga delegado ang sakyanan kada adlaw aron makaabot sa lugar sa kombensiyon, ug mga 390 ka bus ang giabangan alang niini.

Ang kadaghanan sa langyawng mga delegado diha ra mangaon sa ilang mga otel. Apan, sa daghang bulan sa wala pa ang kombensiyon, ang mga awtoridad sa St. Petersburg nabalaka bahin sa suliran sa pagpakaon sa daghang libolibong mga delegado nga mangabot gikan sa nagkalainlaing bahin sa Unyon Sobyet niadto. Sila miingon nga dili paigo ang pagkaon sa siyudad ug nga kinahanglang magdala ang mga Saksi ug pagkaon sa laing dapit.

Ug mao gayod kanay ilang gihimo. Ubay-ubayng sangang-buhatan sa Watch Tower Society nagpadala ug dagkong mga kargamento sa pagkaon. Ang sangang-buhatan sa Pinlandes lamang midonar ug 200 ka toniladang pagkaon alang sa kombensiyon! Dugang pa, ang kadaghanan sa langyawng mga delegado nagdalag gamayng mga kahon sa delatang mga karne, pinaugang mga prutas ug nuts, pan, ug ubang mga pagkaon. Sa kataposang adlaw sa kombensiyon, ang mga trak nga punog karga sa pagkaon gidiskarga diha sa istadyom aron maapod-apod ngadto sa mga delegado gikan sa Unyon Sobyet niadto aron may pagkaon sila sa ilang pagpamauli.

Bug-os nga Kampaniya sa Pagpahibalo

Ang St. Petersburg mao ang ikaduha sa labing dako nga siyudad sa Russia, nga may lima ka milyong molupyo. Mao pa kini sukad nga gitugotan ang mga Saksi ni Jehova sa Russia sa paghimog kaylap nga kampaniya sa pagpahibalo.

Kining wala pa himoa sukad nga kampaniya gisugdan sa daghang semana sa wala pa ang kombensiyon. Duolan sa usa ka milyong handbill ang giprinta sa Russo ug gipanagtag. Sa atubangan sa handbill maoy imbitasyon alang sa pakigpulong publiko sa Sabado sa hapon. Sa likod, dihay hulad sa programa sa Dominggo. Dugang pa, duolan sa 750,000 ka kopya sa tract nga Unsay Gituohan sa mga Saksi ni Jehova? ang giapod-apod ngadto sa mga molupyo sa St. Petersburg. Kini nakahatag nila ug dugang impormasyon bahin sa mga pagtulon-an sa mga Saksi.

Ang kadaghanan sa mga delegado miabot sa St. Petersburg mga usa ug upat ka adlaw sa wala pa ang kombensiyon. Niadtong panahona, libolibong delegado ang nanagtag diha sa mga dalan ug mga handbill ug nanghatag ug mga tract ug ubang mga literatura nga Russo. Dugang pa, ubay-ubayng dagkong karatula ang giandam ug gibutang diha sa labing okupadong mga dalan sa siyudad sa St. Petersburg. Kini maoy 3 metros ang gitas-on ug 1.5 ka metros ang gilapdon, dekolor ang imbitasyon alang sa pakigpulong publiko sa atubangan ug sa likod. Ang uban gitaod diha mismo sa mga entrada sa labing okupadong mga estasyon sa tren.

Ang Programa

Sa kataposan, ang unang adlaw sa kombensiyon miabot, nga may mitambong nga kapin sa 45,000! Ang programa gipasayon alang sa kaayohan sa daghang delegado nga dili makasultig Russo o Pinlandes. Pananglitan, daghang pakigpulong gihatag nga Iningles ug gihubad sa Pinlandes ug Russo. Gihatag sa pito ka membro sa Nagamandong Lawas sa mga Saksi ni Jehova ang kadaghanang mga pakigpulong niini.

Kada adlaw sa kombensiyon, may mga report ug mga eksperyensiya gikan sa ubang mga nasod nga nagpasiugda kon sa unsang paagi gipanalanginan ni Jehova ang buluhatong pagsangyaw niadtong mga nasora. Kining mga report, uban sa daghang eksperyensiya, gihatag usab sa Iningles ug gihubad sa Russo ug Pinlandes.

Ang pakigpulong publiko alang sa seksiyong Russo naghisgot bahin sa pangutana nga may dakog kalabotan sa daghang mga Russo karong adlawa. Ang ulohan mao “Ang Diyos Tinuod ba Gayod nga Nagatagad Kanato?” Human sa pakigpulong ang mga delegado nalipay sa pagdawat sa bag-ong brosyur Ang Diyos Tinuod ba Gayod nga Nagatagad Kanato? sa Russo ug Pinlandes.

Wala pay mabatonang songbook nga Russo nga magamit sa mga Saksi ni Jehova diha sa ilang mga tigom. Busa, ang Watch Tower Society nag-andam ug espesyal nga brosyur nga nasudlan sa mga pulong sa tanang mga alawiton nga maoy giawit sa panahon sa kombensiyon. Ang mga delegadong Russo nakabaton sa ilang kaugalingong mga kopya dihang mosulod sila sa istadyom. Pagkamakapalipay ang pagpamati sa 46,000 ka tawo nga gikan sa 30 ka nagkalainlaing nasod nga nag-awit sa mga pagdayeg ngadto kang Jehova nga Diyos diha sa ilang kaugalingong pinulongan, apil na ang Russo!

Sa daghan nang dekada ang teoriya bahin sa ebolusyon gitudlo sa daghang bahin sa kalibotan, apil ang mga teritoryo sa Unyon Sobyet niadto. Ang mga Saksi ni Jehova ning dapita karon mas nasangkapan na sa pagyagyag sa kabakakan niini nga teoriya ug sa pagpakaylap sa kamatuoran bahin sa Maglalalang sa kinabuhi. Pagkadako sa kalipay sa mga delegado sa panapos nga sesyon sa Dominggo sa buntag sa dihang giluwat sa membro sa Nagamandong Lawas ang librong Life​—How Did It Get Here? By Evolution or by Creation? sa Russo nga pinulongan! Usa ka gasang kopya ang nabatonan sa tanan.

Gipahibalo nang daan ang langyawng mga delegado nga daghang mga Saksi sa Russia walay mga Bibliya. Busa libolibong mga Bibliya nga Russo ang gidala ingong mga gasa. Ang mga Bibliya gitigom diha sa usa ka lugar nga kolektahan aron madala sa ulahi ngadto sa mga kongregasyon sa mga Saksi ni Jehova ug giapod-apod sa mga nanginahanglan ug kopya.

Sila Natingala!

Sa Sabado, sa tibuok buntag ug sa sayo nga hapon, padayong nangabot ang mga bisitang dili-Saksi diha sa istadyom. Sila nagpakisayod ug buot motan-aw sa ilang kaugalingong mga mata kon unsay nagakahitabo. Daghan ang natingala. Ang kadaghanan kanila wala pa gayod sukad makadungog bahin sa mga Saksi ni Jehova sa wala pa makadawat sa imbitasyon alang sa pakigpulong publiko. Ang uban nakadungog bahin sa kombensiyon diha sa balita sa telebisyon. Ang kinatas-ang mitambong sa kombensiyon miabot ug 46,214.

Usa ka batan-ong babaye nga membro sa Russian Orthodox Church mikomento: “Nakadayeg kaayo ako sa mga Saksi. Sila malinawon, matinahuron, ug maligdong nga mga tawo.” Laing bisita miingon: “Kami nanghinaot nga maghimo pa untag daghang kombensiyon ang mga Saksi ni Jehova dinhi sa St. Petersburg.” Usa ka senyor nga sarhento sa kapolisan sa Russia, o kasundalohan, nga gitudlo sa pagtrabaho sa dapit sa kombensiyon miingon nga “makapalipay kaayo nga ania ako dinhi ning kombensiyona.”

Usa ka lokal nga opisyal mikomento nga ‘gilantaw sa uban ang mga Saksi ni Jehova nga usa ka matang sa tago nga sekta nga manglingkod diha sa kangitngit ug managmal ug mga bata ug sa ilang kaugalingon. Apan nakita ko ang normal, mapahiyomong mga tawo, mas maayo pa gani kay sa mga tawong akong nakaila. Sila malinawon ug kalmado, ug naghigugmaay gayod sila sa usag usa.’ Siya midugang: “Wala ako makasabot kon nganong ang mga tawo mosultig bakak bahin kaninyo.”

Sa Sabado sa hapon ang ubang mga magsusupak misulay sa pagbungkag sa kombensiyon. Nagdala sila ug dagkong mga bandera nga may bakak nga akusasyon batok sa mga Saksi. Sa nagkadako ug nagkabanha ang mga tigprotesta, ang mga polis mitawag ug katabang nga mga puwersa sa pagpanalipod sa mga delegado sa kombensiyon. Ang mga tigprotesta wala makasulod sa mga ganghaan sa atubangan. Sa pagkahapon, sila nanglakaw, nabalo.

Ang usa sa mga delegado sa kombensiyon nga nakakita sa nahitabo nakadayeg kaayo sa matinabangong espiritu sa mga sundalo. “Dili makatuo ang akong mga mata sa dihang nakita ko ang mga sundalo nga naningkamot sa pagpanalipod kanamo. Sa mga katuigang dili pa dugay, giisip ang mga Saksi ni Jehova nga mga kaaway sa Estado. Apan karon ang mga sundalo aktuwal na nga nanalipod kanamo!” Usa ka opisyal sa sundalo prangkang mipahayag sa iyang pagbati sa dihang iyang gisultihan ang ubay-ubayng mga delegado: “Dili kami buot nga kamo mahadlok kanamo. Kami ania dinhi aron sa pagpanalipod kaninyo ug sa pagseguro nga maayo ang lakat sa tanan.”

Ang tanan maayo gayod. Bisag ang klima maayo kaayo. Kada adlaw sa kombensiyon, ang klima usahay uga, init, ug hayag kaayo.

Libolibo ang Gibawtismohan

Alang sa kadaghanan ang talagsaong bahin sa kombensiyon mao ang bawtismo sa libolibo. Usa ka kongregasyon sa St. Petersburg, nga may 254 ka magmamantala, mitahog 108 ka nabawtismohan! Dili matukib sa pulong ang makapatandog sa emosyon nga gibati sa mga delegado dihang ilang nakitang nanindog ang 3,256 ka kandidato sa bawtismo. Nagbangon ug duha ka pangutana ang mamumulong bahin sa ilang pagpahinungod kang Jehova, ug sila mitubag nga may malanog nga “da” (oo).

Human sa pag-ampo, ang mga babayeng kandidato gitultolan ngadto sa ilang mga lawak nga ilisanan, ug ang mga lalaking kandidato ngadto sa laing mga lawak ilisanan. Samtang gatos-gatos kanila migawas sa natad, sila ug ang mitambong nagtimbayaay sa usag usa pinaagi sa pagwarawara sa ilang mga kamot.

Daghan sa mitambong nakahilak tungod sa kalipay. Ang uban walay bugto nga namakpak kapin sa 45 minutos. Ang usa ka delegadong Pinlandes wala makapugong sa iyang emosyon ug misugod sa paghilak. Siya miingon: “Niadtong 1943, ako girekluta sa kasundalohang Pinlandes aron makig-away sa mga Russo. Mangilngig nga gubat kadto. Ug karon, niining kombensiyona, nakita ko ang libolibong mga Russo nga nagpahinungod sa ilang mga kinabuhi kang Jehova! Sa dihang nakita ko ang uban kanila diha sa wheelchair ug ang uban nagtakiang, mihilak ako. Gipangutana ko ang akong kaugalingon: ‘Mga beterano ba usab kaha sila sa gubat? Nasamdan ba sila sa mga sundalong Pinlandes?’ Tingali makatabang si Jehova karon kanako aron makabulig sa akong mga igsoong Russo.”

Ang mga igsoon ba nga Russo ug pinulongan miapresyar sa tagana ni Jehova niining tulo ka adlawng espirituwal nga piyesta nga giandam alang kanila, niining unang dakong kombensiyon sa St. Petersburg? Sa dihang gipahayag sa kataposang mamumulong ang iyang panamilit nga mga pulong, siya miingon: “Labaw sa tanan atong pasalamatan si Jehova nga Diyos alang niining katingalahang kombensiyon.” Ang mitambong nanindog ug madasigong namakpak kapin sa lima ka minutos. Kadto maoy pagpanindog sa masipang pagpakpak alang kang Jehova!

Si Jehova nga Diyos, ang Tuboran sa kahayag, tinuod gayod nga nagapaluyo sa libolibong mga tigdalag kahayag niining yutaa nga niadto bahin sa Unyon Sobyet. Human sa kapin sa 70 ka tuig sa mga restriksiyon ug paglutos, karon matin-aw na nga latas sa hataas nga panahon gituman ni Jehova ang iyang saad diha sa Isaias 60:22, diin siya miingon: “Ang diyutay mahimo nga usa ka libo, ug ang usa nga gamay mahimo nga usa ka gamhanang nasod. Ako mismo, si Jehova, magapadali niini sa iyang panahon.”

[Kahon sa panid 27]

Ubang mga Kombensiyon

Tanan-tanan, unom ka kombensiyon ang gihimo ning miaging ting-init sa tibuok Unyon Sobyet niadto. Ang total nga 91,673 ang mitambong, ug 8,562 ang gibawtismohan. Kini nagkahulogan nga 9.3 porsiento sa gidaghanon sa mitambong ang gibawtismohan niining mga kombensiyona. Siyempre, kini nga porsentahi dili unta taas kon dili pa sa duolan sa 17,000 ka langyawng delegado nga mitambong sa internasyonal nga tigom sa St. Petersburg.

Ang Visoki Zamok, nga gipatik sa Lviv, miingon: “Ang kalulot ug sinseridad tinuod nga naghari diha sa istadyom sa tulo ka adlawng kombensiyon. Bisan pa sa dakong tumatambong, ang tugkaran sama ka limpiyo sa kahimtang niini sa wala pa ang kombensiyon. Ang sulondang kahusay ug kalinaw makita bisan asa.”

Karon nga ginatagamtam sa mga Saksi ni Jehova ang kagawasan sa pagsimba sa Diyos nga bukas sa Unyon Sobyet niadto, daghan didto ang nakahigayon sa pagkakita mismo kon unsa gayod ang mga Saksi. Ang Krasnoyarskii Komsomolets, usa ka mantalaan sa Russia, nag-ingon: “Mga maayong tawo sila, mahigalaon kaayo, ug bug-os nga wala mag-apil-apil sa politika; ilang gidasig ang pagkakugihan, dili ang pagbaton ug ‘kuwarta nga dili hagoan.’”

Mga Kombensiyon sa Unyon Sobyet Niadto

PETSA SIYUDAD KINATAS-ANG TUMATAMBONG BAWTISMO

Hunyo 26-28 St. Petersburg, Russia 46,214 3,256

Hulyo 10-12 Lviv, Ukraine 15,011 1,326

Alma-Ata, Kazakhstan 6,605 829

Hulyo 17-19 Kharkov, Ukraine 17,425 2,577

Hulyo 24-26 Irkutsk, Siberia 5,051 536

Tallinn, Estonia 1,367 38

TOTAL 91,673 8,562

[Hulagway sa panid 24]

Mga karatula nga nagpahibalo sa kombensiyon

[Mga hulagway sa panid 25]

Usa ka Russo nga delegado nakadawat sa iyang kaugalingong kopya sa Bibliya

Espesyal nga mga brosyur sa pag-awit ang gigamit

[Mga hulagway sa panid 26]

Talagsaong gidaghanon nga 3,256 ang gibawtismohan