Ang Steenbok nga Nakaipsot

Sinulat sa koresponsal sa Pagmata! sa Habagatang Aprika

PINAAGI sa tawag-sa-kinaiya ang steenbok, usa ka gamayng Aprikanhong antelope, naghatag ug maayong panig-ingnan sa kahinlo. “Kinaiya sa steenbok,” saysay ni Propesor John Skinner diha sa librong South African Animals in the Wild, “nga sa dili pa sila malibang o mangihi, mokahig una sila ug usa ka dapit pinaagi sa ilang pangunang tiil ug unya, tapos niana, maampingong tabonan pinaagig pagkahig ug yuta ibabaw sa dapit.” Oo, kining gamayng mananap mosobra pa sa balaod nga gihatag ngadto sa mga sundalong Israelinhon. (Deuteronomio 5:1; 23:13, 14) Kana magtabon pa gani sa iyang ihi.

Ang makuti nga mga batasan sa paglabayg hugaw sa steenbok motugbang gayod sa iyang patsadang dagway. “Alang kanako ang steenbuck kanunay nga usa ka labing matahom ug labing hiligugmaon nga Aprikanhong buck,” sulat ni Laurens van der Post. Diha sa iyang librong The Heart of the Hunter, gihubit ni van der Post kon sa unsang paagi gisulayan niya sa pagpusil ang usa ka steenbok alang sa usa ka pundok sa gigutom nga mga Bushmen sa Desyerto sa Kalahari sa Aprika. “Ang iyang nindot nga mga dalunggan,” sulat sa manunuhid, “gipunting sa akong direksiyon, ang iyang dakong ubehon nga mga mata nga mitutok pag-ayo, nga wala gayod ing kahadlok ug nagasiga lamang uban sa katingala sa pagkakita sa lahi kaayong talan-awon niining nahilit nga dapit sa kinabuhi. . . . Mipabuto akog dali sa dili pa siya maidlas o sa dili pa ako maluoy sa pagtan-aw niining buotang hayop. Wala ako maghunahuna nga posibleng dili ako makaigo niining hilabihang duola. Apan wala ako makaigo. Ang akong tiro nakapalingolingo lamang ug kusog sa nindot nga ulo niining gamayng buck aron mawala ang kabungog sa iyang mga dalunggan tungod sa buto gikan sa akong dakong pusil.”

Tapos sa pipila pa ka dugang mga tiro, ang gamayng mananap nakahukom nga ang pagpakig-uban sa tawo peligroso ug midagan. Bisan tuod nahikawan sa gikinahanglang pagkaon, ang gigutom nga mga Bushmen nga kaubanan ni van der Post nalipay. Ngano? Ang mga Bushmen may hataas nga pagtamod sa mga paagi sa steenbok, ug kining usa milihok sumala sa ilang gidahom. “Sa tibuok init nga adlaw,” dugang ni van der Post, “ang akong hunahuna mibalik ngadto sa talan-awon nianang buotan gamayng buck nga nagtindog nga wala mabalaka taliwala sa sunodsunod nga buto gikan sa akong pusil.”