Mga Batan-on Nangutana . . .

Sa Unsang Paagi Makahunong Ako sa Pag-inom?

“Lain kaayo ang akong bation kanunay inigkabuntag, sa emosyonal ug sa espirituwal!”—Bob.

“Kanunay akong makakitag away sa balay, sa eskuylahan, sa mga higala ug sa mga polis!”​—Jerome.

GIBAYRAN ni Bob ug Jerome ang bili sa sobra ug kanunay nga pag-inom ug makahubog nga mga ilimnon. Ang duha nahimong giyanon sa alkohol. Ug samtang si Bob sa kataposan nakahunong ra sa pag-inom, si Jerome naningkamot gihapon sa pagbuntog sa alkoholismo.

Ang pagkagiyan sa alkohol maoy usa ka nagatubong problema taliwala sa mga batan-on sa daghang bahin sa kalibotan. Ang uban nagabanabana nga sa Tinipong Bansa lamang, mga lima ka milyong mga batan-on ang dunay seryosong problema sa pag-inom. Apan, kon usa ikaw ka Kristohanong batan-on, walay duhaduha nga naglikay ka sa pag-eksperimento sa alkohol, ilabina kon ang pag-inom sa mga tin-edyer gidili sa balaod sa inyong komunidad. Bisan pa, ang mosunod nga impormasyon mopalig-on sa imong paghukom sa dili gayod pag-inom​—labing menos hangtod nga ikaw mohamtong na ug mas nasangkapan sa pagdumala niana. Apan kon usa ikaw nga giyanon na sa alkohol, kami naglaom nga kining impormasyona motabang kanimo sa pagbuntog niining problemaha. Uban sa tinuod nga paningkamot sa imong bahin ug sa tabang ni Jehova nga Diyos, posible nga maayo ka.

Buntoga ang Dili Pagdawat

Ang una ug labing lisod nga lakang nga angay nimong himoon mao ang pagbuntog sa dili pagdawat. Ang mga alkoholiko sagad modumili sa pagtuo nga sila dunay problema sa pag-inom. ‘Makakontrolar ako niana,’ maoy makaluluoy nga pasiatab sa alkoholiko. Tagda, pananglitan, ang 15-anyos nga miingon: “Dili ako problema nga manginginom. Unom ka serbesa lamang ang mainom ko sa usa ka gabii.” Kita gipahinumdoman sa asoy sa Bibliya bahin sa usa ka tawo nga “iyang giulog-ulogan ang iyang kaugalingon diha sa iyang kaugalingong mga mata sa pagkakita sa iyang sala aron dumtan kini.”​—Salmo 36:2.

Oo, ang dili pagdawat makamatay. Busa kon duna kay problema bahin sa pag-inom, kinahanglan mong dawaton kanang masakit nga kamatuoran sa imong kaugalingon.a Pamatia ang mga higala, mga igsoon, o mga ginikanan nga mosulti kanimo nga sobra ka rang makainom. Sila dili nimo mga kaaway tungod kay gisulti nila kanimo ang kamatuoran. (Itandi ang Galacia 4:16.) Si Bob (nga gihisgotan sa sinugdan) naanad sa pag-inom ug daghan sa matag hinapos sa semana. Dihang giduol siya sa usa ka higala bahin niini, gisalikway ni Bob ang ideya nga siya adunay problema sa pag-inom, ug iyang gitapos ang pagsultihay. Apan sa unsang paagi ang alkohol nakaapektar sa kinabuhi ni Bob? “Ako sobra ka nerbiyoso ug mabalak-on kon ako dili makainom ug kon makainom man ako dili makakontrolar,” miangkon si Bob. “Ang akong pamilyahanong kinabuhi nabungkag​—ingon man ang akong relasyon sa Diyos.”

Sa laing okasyon, si Bob sa kataposan mihunong sa pagdumili ug miadmiter sa iyang mga higala nga siya hidlawon ug alkohol. Kay milampos sa pagbungkag sa pader sa dili pagdawat, si Bob nakasugod sa iyang pagpaayo.

Ugmara ang Determinasyon sa Paghunong

Si Propesor George Vaillant misulat nga ang “alkoholismo . . . matambalan gayod, apan . . . nagkinahanglag dakong responsabilidad sa pasyente.” Kana nagalakip sa imong pagkahimong determinado sa paghunong sa pag-inom ug alkohol. Ang kakulang ug paghukom nagkahulogang mabuhi​—ug mamatay—​ingong usa ka alkoholiko. Unsay makatabang? Ang pag-isip sa pagkamadaoton sa alkoholismo makatabang kanimo sa “pagdumot kon unsa ang daotan” ug mopalig-on sa imong paghukom sa paghunong sa pag-inom sa bug-os.​—Salmo 97:10.

Pananglitan, tingali palandongon mo pag-ayo ang dakong kadaot nga ipahinabo sa alkohol sa pisikal, sa emosyonal, ug sa moral. Tugotan ta, ang usa ka pag-inom tingali makahupay sa imong gibating kasakit sa sulod o mga pagbati sa kaway-pulos sa makadiyut. Apan sa kapulihay, ang pagsalig sa alkohol mopahinabo lamang ug dugang mga problema; ang panaghigalaay mabungkag, ug ang mga relasyon sa pamilya madaot. Dugang pa, sanglit ang alkohol makawala sa imong panagana, kini dali kaayong “makakuha sa hustong mga motibo” ug moagak kanimo ngadto sa seryosong buhat nga daotan.​—Oseas 4:11.

Palandonga, usab, kon unsay mahimo sa daghang alkohol diha sa imong lawas, nga sa anam-anam magahilo sa imong hinungdanong mga organo. Busa ang Bibliya miingon nga ang sobrang pag-inom moresulta ug ‘kagul-anan, pagbasol, panagkabingkil, kabalaka, ug mga samad.’ (Proverbio 23:29-30, The New English Bible) Ang bisan unsang lumalabay nga kalipay nga imong makuha takos ba niini nga bili?

Makatabang usab ang pagpahinumdoman sa imong kaugalingon nga wala ka magkinahanglan ug alkohol aron magmalipayon. Ni gikinahanglan mo ang artipisyal nga kalipay aron makabatog pagtahod-sa-kaugalingon, maayong panglawas, maunongong mga higala, ug mahigugmaong pamilya. Ang kalamposan niining bahina sa kinabuhi moabot pinaagi sa pagpadapat sa Pulong sa Diyos. (Salmo 1:1-3) Ang maong Pulong usab mohatag kanimog paglaom alang sa mas masanag nga palaabuton​—kinabuhing walay kataposan nga walay emosyonal o pisikal nga kasakit! (Pinadayag 21:3, 4) Ang pagbaton sa maong paglaom mohatag pa kanimo ug laing katarongan sa paglikay sa alkohol.​—Itandi ang 1 Corinto 6:9, 10.

Pangayog Tabang

Hinuon, ang yanong pagtinguha nga maayo sagad dili pa igo. Gikinahanglan mo usab ang pagpaluyo ug tabang sa uban. “Ang duha mas maayo kay sa usa,” miingon si Haring Solomon. “Kay kon ang usa kanila mapukan, ang usa magabangon sa iyang kauban.” (Ecclesiastes 4:9, 10) Ang pagsalig sa usa ka tawo sa pagtabang kanimo sa imong problema dili masayon. Apan ang nagpaayo nga alkoholiko nga ginganlag Katy mitambag: “Tun-i ang pagsalig sa mga tawo, ilabina sa imong pamilya.” Oo, sa kadaghanang kaso ang imong pamilya anaa sa labing maayong kahimtang sa paghatag kanimo sa gugma ug pagpaluyo nga imong gikinahanglan.

Tinuod, ang kahimtang sa imong pamilya tingalig nakaamot sa imong pagkalangkit sa alkohol sa sinugdan. Apan kon ang imong mga ginikanan gipahibalo sa imong kahimtang, dili ba makita nila ang panginahanglan sa pagpauswag sa mga butang sa balay? Busa nganong dili sulayan ang pagduol sa imong mga ginikanan, ipahibalo kanila nga ikaw adunay seryosong problema? Inay basolon sila sa tanan, pangayoa ang ilang tabang ug pagpaluyo. Ang pagkahimong bukas ug pagkamatinud-anon uban sa imong mga ginikanan motabang sa imong pamilya nga “malinawong gihiusa” sama sa panimalay sa Diyos. (Efeso 4:16) Niining paagiha kamong tanan makasugod sa pagtinabangay alang sa malamposong pagpaayo.

Kon dili mabatonan ang pagpaluyo sa pamilya, ang uban makatabang.b (Proverbio 17:17) Si Bob gihigala sa usa ka Kristohanong ansiano nga nakigkita kaniya sa daghang bulan sa pagsusi sa iyang progreso. Matud ni Bob: “Ang iyang kaikag ug pag-atiman mihatag kanako sa pagtamod-sa-kaugalingon nga akong gikinahanglan sa paghunong sa akong makadaot nga batasan.”​—Santiago 5:13, 14.

Labaw sa tanan, amgoha nga kinahanglan mo ang tabang ni Jehova nga Diyos. Sandig kaniya alang sa kusog. Oo, uban sa tabang sa Diyos “ang mga dugmok-ug-kasingkasing” makasinati sa ‘pag-ayo ug pagbugkos [ni Jehova] sa ilang mga samad.’​—Salmo 147:3; tan-awa usab ang Salmo 145:14.

Pangitag Bag-ong mga Higala

Usa ka surbi sa New Zealand nagtaho nga ang mga higala maoy usa ka dakong impluwensiya sa mga batan-ong nagaabuso sa alkohol. Busa ikaw maglisod sa paghunong sa pag-inom kon ikaw makig-uban sa mga palainom. Tungod niini nga katarongan ang Bibliya nagtambag: “Ayaw pagtipon taliwala sa mga palainom.” (Proverbio 23:20) Pagpangitag bag-o, maayong mga panaghigalaay. Sama nga tinuod nga ang “daotang panagkauban makadaot sa maayong pamatasan,” ang maayong mga kauban maoy maayong impluwensiya.​—1 Corinto 15:33.

Nakita ni Kim nga tinuod kini. “Lain kadto,” siya miadmiter, “apan kinahanglan mangita ako ug bag-ong mga higala . . . dili ko buot nga mahiduol sa alkohol o sa mga droga.” Sa pagkatinuod, ang mga higala nga dili moinom daw lisod pangitaon. Apan, imong makaplagan nga ang sulondang mga batan-on taliwala sa mga Saksi ni Jehova dili moapil sa gidiling pag-inom. Ni sila nagasalig sa alkohol ingong tuboran sa kalingawan o kaikyasan. Busa sila makatabang​—dili makababag—​sa imong mga paningkamot sa “paghukas sa daang pagkatawo uban sa mga batasan niini.”​—Colosas 3:9.

Ikaw Mamaayo!

Ang pagkinabuhi nga walay alkohol maoy padayong pakigbugno alang kanimo. May mga panahong ang dili-pag-inom tingali malisod. “Kusog gihapon kaayo ang akong gana sa pag-inom,” miadmiter si Ana, “ilabina kon ako masuko, mapakyas, maguol o masakitan.” Busa komun alang sa nagpaayo sa alkohol nga makasinatig pagsugmat, nga motultol sa bug-at nga pagbati sa pagkasad-an. Kon kana mahitabo, hinumdomi nga “kita mapandol sa makadaghan.” (Santiago 3:2) Hinumdomi, usab, nga si Jehova maoy usa ka Diyos sa kaluoy nga makasabot sa imong mga kahuyangan.​—Salmo 103:14.

Bisan pa, pagbantay nga dili maabusohan ang kalulot sa Diyos. Pagtuon gikan sa imong sayop, ug magmadeterminado pa nga dili ka na mobalik sa pag-inom. Pinaagi sa pagpakita sa maong determinasyon, si Bob nakahunong sa pag-inom. Sukad niadto, iyang natagamtam ang malinawong mga relasyon uban sa iyang pamilya ug sa Diyos. Ang iyang malipayong kinabuhi karon naglakip sa pag-alagad ingong usa ka bug-os panahong ministro. Ang kalipay ug kalinaw sa hunahuna imong maangkon, usab, kon molampos ka sa pagpakigbugno sa alkohol.

[Mga footnote]

[Hulagway sa panid 16]

Ang batan-ong mga alkoholiko kiling sa paglimod nga sila dunay problema