“Gipalandong Pag-usab sa mga Doktor ang mga Pagdugang ug Dugo”

“Programa nga Gilaraw sa Pagtabang sa mga Saksi ni Jehova May Kaayohan Alang sa Tanan”

Ubos niining ulohana diha sa Rocky Mountain News, ang magsusulat bahin sa medisina nga si Kris Newcomer mitaho: “Kapin sa 100 ka doktor sa Denver nagkausa sa paghatag ug pabor sa relihiyon sa mga Saksi ni Jehova, nga nag-isip sa dugo nga usa ka balaan nga substansiya nga dili ihatag o idugang sa panahon sa operasyon ug sa ubang mga paagi sa medisina.” Si Dr. Greg Van Stiegmann sa Bloodless Medicine and Surgery Program sa University Hospital sa Denver, Colorado, Tinipong Bansa, miingon: “Ang nahitabo mao nga among giorganisar ang mga sakop sa mga magtutudlo sa unibersidad nga andam sa pagbag-o sa paagi sa pagpalakaw sa mga butang.”

Si Van Stiegmann miingon nga samtang ang programa motagana sa kinahanglanon sa mga Saksi ni Jehova, dili lamang sila ang nagadumili sa dugo. Nagadaghan ang mga tawo nga mas maayog kahimtang kon dili sila dugangan ug dugo. “Naningkamot gayod kami kutob sa among mahimo sa dili pagdugang ug dugo kang bisan kinsa. . . . Adunay maayong impormasyong nanungha gikan sa daghang pagtuon nga nagsugyot nga ang inyong kinataposang paglaom nga maayo sa unang pagsulay sa pagtambal sa problema sa panglawas sa operasyon sa kanser mas maayo kon ikaw dili dugangan ug dugo sa panahon o human sa imong operasyon,” miingon si Van Stiegmann.

Ang artikulo nagpadayon: “Ang kausaban sa modernong panan-aw sa medisina maoy maayong balita sa gibanabanang 10,000 ka mga Saksi ni Jehova sa Colorado. Ang Daang Tugon sa basahon sa Genesis nasudlan sa teksto: ‘ang unod uban ang kinabuhi niini, nga mao ang dugo dili ninyo pagakan-on,’ nga nagkahulogan sa mga Saksi nga kinahanglang wala gayoy dugo nga ipasulod sa lawas sa bisan unsang paagi, apil ang pagdugang ug dugo.”