Timailhan sa Kagawasan

ANG UNDP (United Nations Development Program) nagpublikar sa “Timailhan sa Tawhanong Kagawasan” nga nagpaila kon unsa ka dako sa kagawasan ang gitagamtam sa populasyon sa 88 ka lainlaing mga nasod. Pinasikad sa 40 ka mga katungod ug mga kagawasan nga gipahiluna diha sa Unibersal nga Kapahayagan sa Tawhanong mga Katungod, ang timailhan mohatag sa usa ka nasod ug usa ka iskor alang sa matag kagawasan.

Sumala sa The Courier, usa ka magasing gipatik sa Uropanhong Komunidad, ang pila ka kagawasan nga gisukod sa UNDP mao: ang katungod sa pagtigom ug pagpakig-uban nga malinawon; kagawasan gikan sa pinugos nga relihiyon o ideolohiya sa estado diha sa mga tunghaan; kagawasan alang sa independenteng pagpublikar sa mga libro; kagawasan gikan sa binuotbuot nga pag-embargo sa personal nga kabtangan; ug ang personal nga katungod sa pagtuman sa bisan unsang relihiyon. Unsay nakab-ot sa mga nasod labot niini?

Bisan tuod walay nasod nga naka-iskor ug 40 puntos, ang Sweden ug Denmark maoy kinaduolan nga may 38 puntos, ug ang Neherlandiya ikatulo nga may 37 puntos. Ngadto sa kinaubsan sa lista maoy mga nasod nga nakaiskor ug usa o duha ka puntos. Ang usa ka nasod sa kinaubsan sa lista wala hatagi ug iskor. Hinuon, kana angayng matikdan, matud sa taho sa UNDP, nga “ang Timailhan gipasikad sa kahimtang niadtong 1985” ug nga sukad niadto ang kalibotan nakabaton na ug dugang kagawasan.

Ang Olandes nga magasin nga Internationale Samenwerking nag-ingon nga “ang nagakaugmad nga mga nasod sama sa Costa Rica (ika-18ng puwesto), Papua New Guinea (ika-20), ug Venezuela (ika-22) nakaiskor ug mas taas sa listahan kay sa Uropanhong mga nasod sa Irlandiya (ika-23) ug España (ika-24).”

Ang taho mihinapos nga, ingong katibuk-ang lagda, may koneksiyon ang kagawasan ug kaugmaran. Ang kadaghanan sa mga nasod nga may hataas nga sukod sa kagawasan morag nagtagamtam ug hataas nga sukod sa tawhanong kaugmaran, samtang ang mga nasod nga may diyutayng kagawasan sa subsob nabug-atan usab sa hinay nga pag-ugmad. Matud sa taho sa UNDP: “Ang kagawasan mobuhi sa mamugnaong enerhiya sa tawo sa pagsakmit sa ekonomikanhong mga kahigayonan alang sa ilang kaugalingon ug sa ilang mga komunidad.”

Siyempre, ang 40 ka kagawasan nga gilista sa UNDP ingong tilinguhaong mga tumong sa tawhanong sosyedad wala maglakip sa kagawasan gikan sa makadunot nga epekto sa sakit, pagkatigulang, ug kamatayon. Ang Gingharian lamang sa Diyos diha sa mga kamot sa iyang Anak, si Jesu-Kristo, ang makahatag sa maong mga kagawasan. Ang Bibliya nagsaad nga “ang kalalangan mismo pagapahigawason gikan sa kaulipnan sa kadunotan ug makabaton sa mahimayaong kagawasan sa mga anak sa Diyos.”​—Roma 8:21.

[Hulagway sa panid 31]

Ang pagbungkag sa Paril sa Berlin nagpaila sa mas dakong kagawasan sa Sidlakang Uropa