Pagplano sa Pamilya Nahimong Tibuok Kalibotang Isyu
“Ang pagplano sa pamilya mohatag ug mas daghang kaayohan sa mas daghang tawo sa menos nga kantidad kay sa bisan unsang nag-inusarang ‘teknolohiya’ nga nabatonan karon sa tawhanong rasa. . . . Matuod gihapon kini bisan kon walay suliran sa populasyon.”—The State of the World’s Children 1992.
SA MIAGI giisip nga maayo ang pagbaton ug daghang anak. Duolan sa upat ka libo ka tuig kanhi, sa dihang talilakaw na si Rebeka sa Mesopotamia aron magminyo kang Isaac, gipanalanginan siya sa iyang inahan ug sa iyang igsoong lalaki niining mga pulonga: “O among igsoong babaye, mosanay ka unta sa linibolibo.” (Genesis 24:60) Ang panahon nabag-o na. Karong adlawa, dugang ug dugang kababayen-an nag-ingon nga gusto sila ug diyutayng anak.
“Ikatulo ako sa pito ka anak,” miingon si Bu, 22-anyos nga inahan sa usa ka anak nga babaye sa Indonesia. “Ang akong amahan naninda ug ilimnon gikan sa palma sa Klaten, Sentral Java, ug grabeng giantos sa akong mga ginikanan ang kalisod sa pagpaningkamot sa pagpadako ug daghang anak. . . . Mas sayon ang magpadako ug pamilya kon diyutay ra ang imong mga anak.”
Ang sentimento ni Bu susama sa mga ginikanan sa tibuok-kalibotan. Nagkadaghang magtiayon ang gustong magplano kon kanus-a magsugod sa pagpanganak, kon pila ka buok, kon pila ang gintang sa mga tuig sa pagbaton kanila, ug kanus-a mohunong. Kini ang gipakita sa kaihapan sa UN nga ang kinabubut-ong paggamit ug mga kontraseptibo o paagi sa pagpugong sa pagpanganak sa pobreng mga nasod kusog nga misaka, gikan sa 10 porsiento sa mga magtiayon sa mga tuig sa 1960 ngadto sa 51 porsiento karong adlawa.
Ang mga gobiyerno usab maikagon kaayo sa pagpasiugda sa pagplano sa pamilya. Kapin sa katunga sa pobreng mga nasod naghimog mga programa sa pagkunhod sa pagtubo sa populasyon. Ang UN Population Fund nagbanabana nga ang total nga gasto sa mga programa sa pagpugong sa populasyon karon mokabat na ug mga $4,500,000,000 sa usa ka tuig. Aron katagan-an ang mga panginahanglan sa umaabot, naglaom ang mga awtoridad nga modoble ang maong kantidad sa tuig 2000.
Nganong ang mga nasod ug mga indibiduwal interesado kaayo sa pagkontrolar sa gidaghanon sa mga pagpanganak? Ug unsa ang Kristohanong panglantaw niining hinungdanong butang? Hisgotan sa mosunod nga duha ka artikulo kining mga pangutanaha.