Nagaluksong mga Musikero sa Kalibotan sa Insekto
GIDAWAT namo nga kami hingaong mga linalang. Ug oo, ang among gana makapasuko sa mga mag-uuma kinsa nag-isip kanamo ingong mga peste tungod sa pagdaot sa ilang mga pananom. Bisan pa niana, kaming mga alisiwsiw may pila ka makaiikag nga kinaiyahan—ang among paagi sa paglukso, among paagi sa paglupad, among pagkatkat, ug among paghimog “musika.”
Nasayod ka ba, pananglitan, nga kami may lima ka mata? Inay sa paggamit ug doble-bistang antiyohos sama sa gigamit sa daghang tawo, kami may tulo ka gagming mata sa atubangan sa among ulo alang sa duol nga pagtan-aw. Ang among laing duha ka mata maoy dagko ug nahimutang sa luyo sa ulo, nga motugot kanamo sa pagkakita sa nagkahitabo sa among palibot. Mao nay katarongan nga kami kanunayng makauna kanimo sa paglukso. Dili ba nimo gustong makabatog mga mata nga may samang mga katakos?
Unsa ka maayo ang among kabatid sa paglukso? Kami makaluksog napulo ka pilo sa among gihabogon ug makatugpa sa mga 0.9 metros sa unahan. Aron masundog kana sa usa ka tawo, kinahanglang siya molukso sa gihabogon sa unom-ka-andanang tinukod. Ang among sekreto mao ang kusgan kaayong kaunoran sa luyo namong mga tiil. Sila naghatag kanamog kusog nga sikad aron malampos ang maong mga kalaki.
Bisan human sa among unang lukso sa paglikay kanimo, mahimo namo nga mas malisdan ka sa pagdakop kanamo pinaagi sa paggamit sa duha ka paris nga mga pako nga anaa kanamong tanan. Ang gahing mga pako sa ibabaw samag gamit sa mga pako sa ayroplano, samtang ang mas humil nga mga pako sa ilalom gigamit alang sa ekstra nga bulhot. Sa ingon, pinaagi sa pagtingob sa among mga kahanas sa paglukso ug paglupad, kami kasagarang makalupad ug layo nga igong makapabugnaw kanimo sa paggukod.
Malisdan ka ba sa pagkatkat sa danglog nga tukon? Kami dili. Sa pagkamatuod, kami makapataas pagdagan sa danglog nga dahon sa sagbot nga dili madakin-as tungod sa paagi sa pagdesinyo sa Maglalalang sa among unom ka tiil. Ang gagming kaayong mga hapin sa matag tiil may pinong mga buhok nga mopagulag hagkot nga pluwido, nga motabang kanamo sa lig-ong paghawid sa mga butang. Dugang pa, ang kada tiil nasangkapan sa duha ka lig-on, talinisong mga kaw-it nga mopugong kanamo sa pagdalus-os sa tiptip nga mga handag. Oo, dugay na sa wala pa makahunahuna ang mga tawo sa pagkatkat sa bukid, kami nasangkapan nag maayo sa pagkatkat.
Ang mga laki sa among pamilya mao ang mga musikero. Ang bayeng mga alisiwsiw nakadayeg gayod ug nag-isip kanilang ginasahan. Oo, kami makadungog ug makatubag sa lainlaing mga tingog. Ang among mga dalunggan nahimutang sa matag kiliran sa dughan. Mao nga, sa dihang morag gusto, ang laki hinayhinay nga mobag-id sa naglangisngis nga tiil sa luyo ibabaw sa lutawng kaugatan sa usa ka pako sa samang paagi nga ang biyolinista mobag-id sa iyang arko latas sa mga kuwerdas sa biyolin. Makapahayahay gayod sa dughan sa igang nga adlaw sa tungatungang ting-init ang paghigda sa balilihan ug pagpamati sa tokar gikan sa usa ka libong alisiwsiw ug mga gangis. Ah, ang honi sa ting-init!