Anunugba o Alibangbang—Unsaon Nimo Pag-ila?

MAKAILA ka ba sa kalainan sa unang pagtan-aw? Tingali imong gipili ang alibangbang tungod sa maanindot nga mga bulok niini ug ang morag walay-hunong nga paglihok niini​—naglupadlupad gikan sa bulak ngadto sa bulak, tugdong sa makadiyot dinhi, nga gikapakapa ang pakopako, dayon mahadlokong mobalhin ngadto sa sunod nga tuboran sa pagkaon. Pagkadakong pagsulay sa pailob sa bisan kinsang alistong letratista! Laing timailhang dagway mao ang samag-hilo nga siwil nga mosangko sa usa ka ulo-ulo.

Apan komosta ang anunugba? Aw, dili ka makakita ug daghan kanila sa adlaw. Sila sa panguna gabhiong mga linalang. Ang ilang mga bulok kasagaran lugom. Ang ilang lawas baga, ug ang ilang siwil balhiboon, nga motabang kanila sa pagkaplag sa baho sa baye bisan sa layo kaayo. Ang gipakita dinhi mao ang Polyphemus nga anunugba, makita sa tibuok Tinipong Bansa. Tungod sa dagko samag-mata nga mga puntik sa iyang pako sa likod, gikuha ang ngalan niana sa Gregong sugilambong nga usag-matang Cyclops nga gitawag Polyphemus. Ang gilapdon sa pako niana gikan sa 9 ngadto sa 15 sentimetros, gamay gihapon kon itandi sa pipila ka anunugba.

Adunay kapin sa 112,000 ka iladong espisye sa alibangbang ug anunugba, sumala sa Grzimek’s Animal Life Encyclopedia. Ang ilang mga pako “gitabonan ug gagmay kaayong mga himbis sa taas ug ubos . . . nga nagpatunghag maanindot nga mga bulok ug mga dibuho nga sagad makita.” Sumala sa isulti kanimo ni bisan kinsang lepidopterist (usa nga nagtuon sa mga alibangbang ug anunugba), sila makadani nga mga linalang. Ang ilang desinyo, matang, ug dili-katoohang kabalhinan makapahimo kanila nga takos sa pagtuon, dili lamang sa presenteng kinabuhi, apan sa walay- kataposang kinabuhi!

[Mga hulagway sa panid 25]

Polyphemus nga anunugba nga naletratohan sa Luverne, Alabama, T.B.A., gipakita dinhi sa sagad nga gidak-on

Ang balhiboong siwil motabang sa laki sa pagkaplag sa baye