Ang Hunahuna sa Bibliya

Si Kristo Presente!

“MOANHI si Mandela! Moanhi si Mandela!” nag-awit ang mga kabataan sa Soweto, Habagatang Aprika. Ang pagkagula ni Nelson Mandela sa prisohan sa Pebrero 11, 1990, gidahom pag-ayo ingon nga sinugdanan sa kausaban sa Habagatang Aprika. Bisan pa niana, sa daghang katuigan sa wala pa siya mogula sa prisohan, ang iyang presensiya nabati. Samtang didto pa sa prisohan, siya aktibong nagpasiugda sa “walay-hunong nga krusada aron sa pagpapha sa apartheid.” Ingon sa gisulat sa usa ka internasyonal nga mantalaan, ang 27 ka tuig nga pagkabilanggo wala “makamenos sa iyang presensiya​—o sa iyang pagkaaktibista.” Ang iyang pagkagula gikan sa prisohan nag-ilustrar pag-ayo sa kalainan taliwala sa usa ka pag-anhi ug usa ka presensiya.

Sa susama, maylabot sa pagbaton ni Jesu-Kristo sa iyang harianong gahom, ang unang-siglong mga magsusulat sa Bibliya naghimog kalainan tali sa iyang pag-anhi ug sa iyang presensiya. Ang presensiya ni Kristo Jesus sa harianong gahom mabati ug maila mga katuigan sa dili pa siya “moanhi nga sinapwang sa mga panganod sa langit inubanan sa kagahom ug dakong himaya.” (Mateo 24:30) Ang dili-makitang presensiya ni Kristo (Grego, pa·rou·siʹa) mag-una sa maong pag-anhi (Grego, erʹkho·mai) aron sa pagpatuman sa paghukom batok sa rebelyoso ug daotang kaliwatan.

Pa·rou·siʹa​—Unsay Kahulogan Niana?

Ang Gregong pulong pa·rou·siʹa sa literal nagkahulogang “anaa sa tupad” ug “nahimong opisyal nga termino alang sa pagduaw sa usa ka tawo nga taas ug ranggo, ilabina sa mga hari ug mga emperador nga nagduaw sa usa ka probinsiya.” Ang Theological Dictionary of the New Testament nag-ingon: “Ang [Parousia] nagpasabot ilabina sa aktibong presensiya.” Ug mahitungod sa presensiya ni Kristo Jesus, ang basahong The Parousia nag-ingon: “Ang Kasulatan wala gayod maghisgot ug ‘ikaduhang Parousia.’ Kon unsa man ang kahimtang niana, kana usa ka kahimtang nga talagsaon, nga wala pa mahitabo sukad, ug dili na mahitabo pag-usab. Kana maoy usa ka presensiya nga lahi ug labaw kay sa tanang ubang pagpadayag niya sa mga tawo.”

Sa pagkomento sa matagnaong mga pulong ni Jesus ingon nga tubag sa mga pangutana nga gisukna sa iyang mga apostoles sa Bukid sa mga Olibo, si Propesor A. T. Robertson sa Word Pictures in the New Testament nagsulat nga si Jesus “naggamit sa pagkalumpag sa templo ug sa Jerusalem nga nahitabo nianang kaliwatana sa A.D. 70, ingon nga simbolo usab sa iyang kaugalingong ikaduhang pag-anhi ug sa kataposan sa kalibotan . . . o pagkatapos sa panahon.” Unsa kining mga pangutanaha, ug giunsa pagtubag ni Jesus?

Ang Ilhanan sa Presensiya ni Kristo

Ingon nga gitala sa Mateo 24:3, ang mga apostoles nangutana: “Tug-ani kami, Kanus-a mahitabo kining mga butanga, ug unsa man ang ilhanan sa imong presensiya ug sa konklusyon sa sistema sa mga butang?” Sa iyang tubag, gihatagan ni Jesus ang iyang mga disipulo ug ilhanan nga makitang ebidensiya sa iyang dili-makitang presensiya sa Gingharianong gahom. Ang tibuok ilhanan naglakip sa walay-ingon nga mga gubat, kaylap nga kanihit sa pagkaon, malaglagong mga linog, mga kamatay, ug pag-uswag sa krimen ug kahadlok. Ang presensiya ni Kristo maoy panahon sa tibuok-globo nga kasamok ug kabalaka. Ang tawhanong mga kagamhanan ug mga lider sa kalibotan dili makasagubang nga malamposon sa nagakagun-ob nga sistema.​—Mateo 24:7, 12; Lucas 21:11.

Sa paglig-on sa pagkatinuod sa matagnaong mga pulong ni Jesus, usa ka propesor sa politikanhong mga pagtuon, si John Meisel, nag-ingon: “Usa ka dakong yugto ang talitapos, nga pulihan sa usa ka yugto nga ang gambalay niana wala pa kaayo masabti.” Tapos magkomento sa kamatayon sa Komunismo, sa kapakyasan sa Sosyalismo, ug sa kakulang sa kapitalismo, si Propesor Meisel mipadayon: “Daghang tawhanong mga suliran ang nahigawas sa natad sa sosyal nga siyensiya ug kinahanglang sulbaron sa laing mga paagi.” Ug unsay kahulogan niana? “Ang ideolohikong mga pundasyon sa modernong kalibotan nagakahugno ug kinahanglang pulihan.”

Aktibong Presensiya ni Kristo

Bisan pa sa walay-paglaom nga kahimtang sa nagakadaot nga talan-awon sa kalibotan, ang presensiya ni Jesus sa harianong gahom nagsugod kapin sa 75 ka tuig kanhi ug nabati sa dili masayop ug positibong paagi.a Bisan pa sa kadaot nga gipahinabo sa duha ka gubat sa kalibotan, ang naentronong Hari, si Kristo Jesus, aktibong nagpakig-ambit sa pagtukod ug usa ka bag-ong nasod sa katawhan​—usa ka katawhan alang sa ngalan ni Jehova “gikan sa tanang kanasoran ug kabanayan ug katawhan ug pinulongan.” Ang aktibong presensiya ni Kristo nakapadasig sa tibuok-kalibotang pagsangyaw ug pagpanudlo nga programa nga nakatandog sa kasingkasing sa minilyong matarong nga mga indibiduwal. Sila napalihok sa pagbarog sa kiliran sa Gingharian ni Jehova sa mga kamot ni Kristo Jesus.​—Pinadayag 7:9, 10.

Atubangan sa nagauswag inadlaw-adlaw nga pamatuod nga ang daghag dagway nga ilhanan sa presensiya ni Kristo nagakatuman, dayag alang sa igmat nga mga Kristohanon nga kita nagaatubang sa kataposan sa usa ka panahon. Karon na ang panahon sa “paghatag ug labaw sa kasagarang pagtagad” sa naentronong Hari, si Kristo Jesus. (Hebreohanon 2:1) Siya nagtambag kanato: “Apan, panagtukaw kamo, nga sa tanang panahon mag-ampo nga unta makabaton kamog kalig-on aron sa pag-ikyas gikan niining tanang mga butanga nga magakahitabo, ug sa pagbarog atubangan sa Anak sa tawo.”​—Lucas 21:36.

[Footnote]