Ang Pagkugi—Dihang Kini Usa ka Maayong Kinaiya
SA TIBUOK Habagatan-silangang Asia, ipadaplin sa daghang batan-ong binatonang mga babaye ang ilang trabaho sa kosina ug motan-aw sa ilang mga telebisyon sa dihang oras na alang sa gamang-Hapones nga seryal sa TV nga Oshin. Kini maoy sugilanon bahin sa usa ka babayeng kabos nga nadato human sa daghang tuig sa pagtrabaho ug pagkugi. Nagluha ang ilang mga mata, gipanag-ing nila ang ilang kahimtang kang Oshin, ang bida. Ang sugilanon daw mao lamang ang ilang gikinahanglan aron maagwanta nila ang laing adlaw sa hagong trabaho.
Sa pagkatinuod, kon ang tawo magpaulipon sa adlaw-adlaw hangtod sa punto nga madaot na ang ilang panglawas ug kinabuhi, kinahanglang may mga katarongan sila sa pagbuhat niana. Nganong ilang gibuhat kana? Sama sa batan-ong binatonang mga babaye sa Asia, ang tinguha nga mapauswag ang sukdanan sa ilang kinabuhi komon ug mao ang gamhanang panukmod sa pagkugi. Apan, dayag ang materyal nga balos dili mao lamang ang nalangkit.
“Ang pinansiyal nga balos hinungdanon, apan halos ikaduha, nga katarongan,” misulat si Stephen D. Cohen mahitungod sa batasan sa pagtrabaho sa mga Hapones. Nan, unsay nagpalihok sa mga Hapones sa kugi nga pagtrabaho? “Ang kalamposan sa kita sa usa ka kompaniya labot sa mga kakompetensiya niini maoy usa ka dakong tuboran sa garbo ug katagbawan sa kaugalingon. Ang kugi nga pagtrabaho nga nakaamot niining tumonga maoy ganti na sa iyang kaugalingon,” miingon si Cohen. Ang pag-unong sa ilang kompaniya maoy katarongan nga nagkugi ang mga empliyado ug trabaho, ug ang trabaho mao ang ilang bugtong paagi aron ikapahayag ang ilang bili. Dili ikasalikway, usab, mao ang tinguha nga moasenso. Ang posibilidad nga sa pipila ka adlaw makaabot ra sa itaas nagpabilin nga kusganong katarongan sa pagkugi ug trabaho.
Katarongan ba nga Ipameligro ang Panglawas?
Maayo ba kining mga katarongana nga ipameligro ang imong panglawas ug kinabuhi? Bahin sa usa nga nagkugi sa pagtrabaho alang sa materyal nga bahandi, ang Bibliya nagpasiugda, “ang iyang mga mata dili matagbaw sa bahandi.” Sa ulahi ang maong tawo mahibulong: “Alang kang kinsa man ako nagapangabudlay ug magatungina sa akong kalag sa maayong mga butang?” (Ecclesiastes 4:8) Kadtong nagkugi sa pagtrabaho aron madato daw wala mahibalo kanus-a o asa sila mohunong. Sila nagapos sa mapintas nga siklo sa trabaho, trabaho, ug dugang trabaho. Ang Bibliya yanong nagpasidaan: “Ayaw paghago sa pagpakadato.”—Proverbio 23:4.
Komosta ang bahin sa pag-unong sa kompaniya? Samtang kini mahimong usa ka maayong kinaiya, ang posibleng epekto sa sobra nga pagtrabaho kinahanglang tagdon. “Kon sobrang ginapahago sa tawo ang iyang kaugalingon,” miingon ang opisyal nga hepeng ehekutibo sa usa ka Amerikanong kompaniya, “Dili ko gusto nga mahimo ko siyang empliyado.” Ang asawa sa “manggugubat sa kompaniya” misulat sa usa ka mantalaan human nga namatay ang iyang bana tungod sa sobrang trabaho nga wala pay 40 ang edad: “Unsang mga pahasubo ang atong madungog nga isulti sa kompaniya, ‘Gikasubo namo nga nawad-ag usa ka tawong bililhon’? Ang mga martir sa kompaniya, sa dihang mamatay, ginatagad nga daw sila ‘iglalabay nga mga baligya.’”
Bisan kon makalingkawas ang usa sa sobrang kakapoy o mamatay tungod sa sobrang trabaho, unsay mahitabo sa dihang siya moretiro na? “Bisag nagkugi alang sa ilang mga kompaniya,” matud ni Motoyo Yamane, usa ka tigsibya nga Hapones, “gipaamgo sila sa kamatuoran nga wala na magkinahanglan kanila ang kompaniya ug nga sila wala nay pulos.” Alang sa kompaniya nga walay-puangod, ang kugihang mga empliyado nahisama lamang sa gagmayng mga piyesa sa ilang dakong korporasyon, nga ilisan kon sila gastado. Dili ikahibulong nga daghang Hapones ang nawad-ag pagtuo sa ilang mga kompaniya! Sila nagpakaamgo nga ang ilang debosyon sa kompaniya maoy usa ka gugma nga dili mabaslan.
Unsay ikasulti bahin sa pag-asenso? Kadtong nakaabot sa pagkahimong magdudumala o manedyer sa dili madugay makaamgo nga dili ang tanan makaabot sa kinatas-ang posisyon. Nan unsay mahitabo? Kay hinikawan sa kalaoman nga makadawat ug promosyon, sila mosugod sa pagbalhin-balhin ug trabaho. Busa ang pag-unong sa kompaniya napamatud-ang dili usa ka maayong kinaiya!
Timbang nga Panghunahuna sa Pagkugi
Bisag ang kugi nga pagtrabaho napukaw tungod sa gugma sa salapi, pag-unong sa usa ka korporasyon, o sa usa ka maindigong espiritu mapakyas ug malugda, wala isalikway sa Bibliya ang bili sa kugi nga pagtrabaho. “Ang tagsatagsa ka tawo mokaon ug moinom ug makakaplag ug kaayohan sa tanan niyang pagkugi. Kini gasa sa Diyos.” (Ecclesiastes 3:13) Ang Bibliya nagrekomendar sa pagpahimulos sa iyang kinugihan. Kini nagahatag kanatog ideya kon unsa ang hustong hunahuna bahin sa pagkugi ug trabaho.
Gitambagan sa Ministri sa Panglawas ug Kaayohan sa Hapon sa dili pa dugay ang mga trabahante sa “pagkalimot sa trabaho human sa mga oras sa trabaho (ug) manihapon uban sa ilang mga pamilya.” Ang ubang mga lider sa negosyo miapresyar sa kaalam niining tambaga. Pananglitan, ang presidente sa nagauswag nga kompaniya sa bioteknolohiya miingon: “Buot ko nga atimanon sa tanan natong mga empliyado ang ilang mga pamilya una sa tanan. Ang ilang trabaho sa atong kompaniya maoy usa lamang ka paagi aron masustentohan ang ilang mga pamilya.”
Sa pagkatinuod, ang maayong relasyon sa pamilya maoy tumong nga takos hagoan. Kon ipameligro ang maayong kahimtang sa pamilya o mag-antos ang imong panglawas tungod sa imong trabaho, wala kay makita nga maayo sa tanan nimong pagkugi.
Ugaling, sa katilingbang Hapones, diin ang dugay na sa trabaho ang ginapalabi, ang pipila nakaugmad ug tinamdan: “Ayaw pagpalta, ni magpaulahi, ni motrabaho.” Sila nagpakaaron-ingnong kugihan pinaagi sa pagpagabii sa trabahoan apan naghulat lamang nga makapauli na ang superbisor. Si Kenji, nga ahente sa kompaniya sa pag-adorno sa balay sa Hiroshima, may ingon niana nga kaisipan. Siya nagligoyligoy sa trabaho, nagpalabay sa panahon diha sa painitan o sa pinball parlor.
Ang mao bang tinamdan mohatag ug kalipay? “Ang kamot nga tapolan igabutang diha sa mabug-at nga buluhaton,” nag-ingon ang sanglitanan sa Bibliya. Karong adlawa, ang usa tingali dili mailalom sa mabug-at nga buluhaton sa literal tungod sa pagkatapolan sa tawo. Apan, ang trabaho mahimong makalaay, mabug-at nga buluhaton sa hunahuna. Sa laing bahin, ang samang sanglitanan nagpunting sa kaayohan sa pagkakugihan: “Ang kamot sa mga kugihan magamando.” (Proverbio 12:24) Bisan kon dili ka makadangat sa pagmando sa usa ka nasod o sa usa ka kompaniya, labing menos ikaw tahoron sa imong pamilya ug agalon sa imong kaugalingon. Dugang pa imong maangkon ang kompiyansa sa imong amo, ingon man makabaton ug mahinlong konsensiya.
Nakaplagan kini ni Kenji nga tinuod. Siya mihukom sa pagtuon sa Bibliya, ug kusog nga nabag-o ang iyang kinabuhi. “Pinaagi sa pagpadapat sa prinsipyo sa pagkamatinud-anon sa trabahoan,” siya miingon, “misugod ako sa pagtrabaho nga makugihon anaa man ang amo o wala. Kana nakaangkon sa iyang pagsalig kanako.”
Sa Dihang ang Pagkugi sa Trabaho Mahimong Usa ka Maayong Kinaiya
Ang kamatuoran mao, aron makahuloganon ang trabaho, kini kinahanglang makahatag ug kaayohan sa uban. ‘Ang makatagbaw nga trabaho,’ hubit pa sa usa ka magsusulat sa negosyo, ‘mao ang trabaho nga mohatag ug kasayon, kalipay o kahimuot sa daghang kinabuhi sa mga tawo.’ Kini nga trabaho mohatag lalom nga katagbawan sa trabahante. Kini sama sa giingon ni Jesu-Kristo: “Adunay labaw nga kalipay ang paghatag kay sa pagdawat.”—Buhat 20:35.
Bisan tuod ang pagtrabaho nga makahatag kaayohan sa uban dalayegon, adunay laing yawi sa pagkaplag ug katagbawan sa trabaho ug sa kinabuhi. Si Haring Solomon, human nga nasinati ang tanang kaluho ug bahandi nga gitanyag sa kinabuhi, nakahinapos niini: “Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.”—Ecclesiastes 12:13.
Sa tin-aw, atong tagdon ang kabubut-on sa Diyos diha sa bisan unsang butang atong buhaton. Kita ba nagabuhat nga nahiuyon sa iyang kabubut-on o nagabuhat nga batok niana? Kita ba naningkamot sa pagpahimuot kaniya o sa pagpahimuot lamang sa atong kaugalingon? Kon mapakyas kita sa pagtuman sa kabubut-on sa Diyos, kita mahimong materyalistiko o mahigugmaon sa kalingawan ug sa kaulahian mag-antos sa kasakit sa kamingaw, kahaw-ang, ug kawalay-paglaom.
Busa hinumdomi nga ang pag-alagad kang Jehova nga Diyos—pagbuhat sa buluhaton nga makapahimuot sa atong Maglalalang—mopatugob gayod kanato. Si Jehova mismo maoy kugihan nga trabahante, ug kita iyang gidapit sa pagduyog kaniya ug mahimong iyang “kaubang mga magbubuhat.” (1 Corinto 3:9; Juan 5:17) Apan ang mao bang pagkugi sa pagtrabaho makahatag tinuod nga kalipay?
Usa ka nagadumalang direktor sa kompaniya nga tig-imprinta kas-a miduaw sa planta sa pag-imprinta sa Watch Tower sa Hapon aron tun-an ang plano niini. Nakuha ang iyang pagtagad dili lamang sa mga makina. Iyang nakita ang batan-ong mga lalaki nga nalingaw sa ilang trabaho, ug siya nakurat sa pagkadungog nga ang tanan mga boluntaryo ug nga daghan pa ang maikagong miaplay sa pagduyog kanila. Nganong siya nakurat? “Sa among kompaniya,” siya miingon, “dihang kami modawat ug napulo ka tawo, among pagaisipon nga maayo kaayo kon upat kanila magpabilin uban kanamo human sa usa ka tuig. Kamong taga-Watchtower adunay hamiling kabtangan diha niining batan-ong mga trabahante!”
Unsay nagpahimo niining batan-ong mga lalaki nga malipayon kaayo ug makugihong mga trabahante? Sanglit mga boluntaryo, sila dayag wala magtrabaho tungod sa salapi. Nan, unsay nagapalihok kanila? Ang ilang dedikasyon ug apresasyon kang Jehova, ang ilang Maglalalang, ug ang ilang gugma sa ilang silingan. Ang ilang tinamdan nagpakita nga sila wala magtrabaho “sa pagpahimuot ug mga tawo, kondili ingong mga ulipon ni Kristo, nagabuhat sa kabubut-on sa Diyos nga bug-os kalag.”—Efeso 6:6.
Kining tanan maoy pagtan-aw-daan kon unsay anaa sa unahan. Kadtong kuging nagabuhat karon sa pag-alagad kang Jehova makalantaw sa unahan alang sa panahon dihang iyang ipasig-uli ang Paraiso ug ang tibuok yuta mapuno sa bililhong mga buhat. Si Isaias, nga karaang propeta sa Diyos, mitagna bahin sa umaabot nga kinabuhi: “Sila magatukod ug mga balay ug magapuyo niana; ug sila magatanom ug kaparasan ug magakaon sa ilang bunga. Sila dili magatukod ug unya lain ang magapuyo; sila dili magatanom ug unya lain ang magakaon. . . . Ang akong mga pinili magapahimulos pag-ayo sa buhat sa ilang mga kamot.”—Isaias 65:21, 22.
Pagkadakong panalangin unya ang trabaho! Pinaagi sa pagkakat-on sa kabubut-on sa Diyos alang kanimo ug magabuhat nga uyon niana, hinaot mahimong usa ikaw sa mga binulahan ni Jehova ug kanunayng ‘makakita ug maayo sa tanan nimong pagkugi.’—Ecclesiastes 3:13.
[Kahon sa panid 9]
Ang Timbang nga Hunahuna sa Trabaho Makaluwas sa Kaminyoon
Alang kang Yasuo, nga nagpuyo sa Hokkaido, Hapon, ang trabaho maoy pasatiempo lamang hangtod sa pipila ka tuig nga milabay. Siya maoy usa sa mga manedyer, ug siya nalinga sa pagpauswag sa kita. Kada adlaw siya motrabaho hangtod sa 11:00 s.g. nga walay bobakasyon. Unya, siya nahinumdom: “Akong naamgohan nga bisan unsaon pa nako pagkugi, wala akoy kalipay sa akong trabaho.” Misugod sa pagkadaot ang panglawas ni Yasuo. Nakigsulti sa iyang asawa, iyang naamgohan nga may butang nga labaw pa ka hinungdanon kay sa iyang trabaho—ang iyang pamilya. Iyang giusab ang iyang estilo-sa-kinabuhi ug miduyog sa iyang asawa sa pagtuon sa Bibliya. Siya na karon ang hinigugma ug tinahod nga ulo sa usa ka malipayong pamilya.
[Hulagway sa panid 9]
Ang imong trabaho dili angay magpameligro sa relasyon sa pamilya
[Hulagway sa panid 10]
Sa dili madugay ang tanan malipay sa pagtrabaho sa paghimo sa yuta nga usa ka paraiso