Ang Kuging Pagtrabaho Mohatag Bag Kalipay?
“TOTAL, ang trabaho maoy importante sa tanan alang sa tawo, dili ba?” nangutana si Bunpei Otsuki, pangunang sapian sa kalibotan sa negosyo sa Hapones. Nagsaysay siya nganong dili siya mobakasyon sa panahon sa ting-init. Ang iyang mga pulong maoy kinaiyanhon sa Hapones kinsa nagtukod pag-usab sa nasod gikan sa kagubot niini human sa gubat. Ang Hapones gibatbat nga kugihang mga tawo sukad nga gibuksan ni Komodor Perry sa Tinipong Bansa ang Hapon gikan sa taas nga panahong pagpalain niini. Ug ilang ginapasigarbo ang ilang pagkakugihan.
Apan, gisaway na karon ang Hapon tungod sa kuging pagtrabaho, nga nakabaton sa labing taas nga oras sa pagtrabaho sa tibuok tuig taliwala sa gitawag nga industriyalisadong mga nasod. Ang kagamhanang Hapones naningkamot sa pagpapas sa larawan nga giyanon sa trabaho. “Ang Ministri sa Pamuo Miingon nga ‘Hunong na sa Sobrang Pagtrabaho,’” nga mabasa sa usa ka ulohan sa balita sa mantalaan. Diha sa panultihon sa kampaniya niini alang sa panahon sa bakasyon sa ting-init sa 1987, ang ministri miingon pa ngani, “Ang pagbakasyon maoy pamatuod sa imong kahanas.” Sa laing pagkasulti, ang kagamhanan nangutana sa nasod, “Nganong maghingapin man ug trabaho?”
Siyempre, dili tanan sa Hapon dedikado, kugihang mga trabahante. Ang dili pa dugayng surbi sa Japan Productivity Center sa kapin sa 7,000 ka bag-ong mga trabahante nagbutyag nga 7 porsiento lamang kanila ang naghatag sa trabaho nga panguna kay sa ilang pribadong kinabuhi. Kining kilinga makita sa ubang mga nasod usab. Sa Alemanya ang Allensbacher Institut für Demoskopie nakahibalo nga 19 porsiento lamang sa mga Aleman sa edad 18 ug 29 nag-angkon nga naghatag sa ilang labing maayo diha sa trabaho bisan pila pay suweldo.
Kon itandi sa makirelaks nga mga batan-on, ang bisitang mga trabahante sa Hapon mas kugihan pa. Ang usa ka empliyado sa Tokyo nagpasigarbo sa iyang trabahanteng taga Algeria nga mibuhat sa mabug-at nga trabaho. Siya miingon: “Ang Hapones dili mosulod niining matanga sa trabaho, ug kon sila mosulod man, sila moundang ra.” Dili, dili bisan ang kugihang mga Hapones sa kinaiyanhon makugihon. Kon ang mga tawo kuging nagatrabaho, kini duna gayoy puwersadong hinungdan.
Mga Katarongan sa Kuging Pagtrabaho
“Ang bahandi, kalig-on, mga kabtangan, ug ang tinguhang moasenso sa kalibotan”—mao ang mga butang nga ginaapas sa kugihang mga Aleman, mitaho ang senemanang basahong Der Spiegel sa Alemanya. Oo, daghan ang kuging nagatrabaho aron makabaton ug materyal nga bahandi aron ilang matagamtam ang usa ka sukod sa kalig-on sa kinabuhi. Ang uban kuging nagatrabaho sa tumong nga “moasenso sa kalibotan” o sa pagkab-ot sa taas nga posisyon sa korporasyon. Daghan niadtong puwersadong napalihok sa maindigong edukasyonal nga sistema sa pag-apas sa maong mga tumong sa pagkaalaot misangpot sa pagbuhat sa makapuol nga trabaho sa industriyal nga katilingban—sobrang nagpahago sa ilang kaugalingon ug walay asenso.
Ang salapi ug pagkabutang sa kinabuhi, hinunoa, dili mao lamang ang mga rason sa kuging pagtrabaho sa mga tawo. Ang uban kuging nagatrabaho alang sa trabaho. Alang kanila, ang trabaho mao na ang tanang butang. Ang uban nalipay sa ilang trabaho. “Maikagon kaayo ako sa akong ginahimo sa akong laboratoryo,” miadmiter si Haruo, “nga tungod niini natuok ang espirituwal nga mga pangagpas.”
Unya anaa pa kanang dedikado sa mapuslanong mga kawsa alang sa pag-alagad ug sa kaayohan sa uban. Sila kuging nagatrabaho aron sa pagluwas ug mga kinabuhi. Pananglitan, ang bombero kugi kaayong nagatrabaho sa adlaw-adlaw sa paghimo sa iyang gamit nga mahapsay.
Apan kini bang tanan maoy maayong mga rason sa pagkugi ug trabaho? Kini ba motultol sa kalipay? Sa pagkamatuod, unsang buluhatona ang makalipay gayod kanimo?