Mga Kobra sa Sri Lanka Makadungog
“Bungol sama sa kobra nga nagasampong sa iyang dalunggan, nga dili mamati sa tingog sa mga maglalamat.”—Salmo 58:4, 5.
Diha sa The New York Times, sa Enero 10, 1954, ubos sa ulohang “Ang mga Halas ba ‘Madani’ sa Musika?” ang mosunod nga taho sa Salmo 58:4, 5 makaplagan: “Si Dr. David I. Macht, tigpanukiduki nga parmakologo sa Mount Sinai Hospital sa Baltimore [T.B.A.], maoy usa sa iladong awtoridad sa kalibotan maylabot sa hilo sa halas nga kobra. (Ang hilo sa kobra gidawat ingong tambal, pananglitan, sa mga sakit sa dugo.) Si Dr. Macht mitaho nga sa pagpakiglabot sa kobra ug sa hilo niini iyang nakaila ang daghang mananambal nga Hindu, maayong pagkaedukar, ug gikan sa nagkalainlaing bahin sa India. Ang tanan miuyon nga ang kobra mosanong sa pipila ka tuno sa musika, gikan sa musika sa mga plawta. Ang ubang matang sa musika mas makapukaw sa mga hayop nga labaw kay sa ubang matang, mitaho ang mga doktor. Ang kabataan sa India, nga magdula human sa pagsalop sa adlaw sa banika, gipasidan-an gani sa dili pag-awit kay basig ang ilang mga tingog makadani sa mga kobra, siya miingon. Si Dr. Macht mikomento nga si Shakespeare, nga masubsob nga nag-ingon nga bungol ang mga bitin . . . nagsubli lamang sa kasagarang sayop nga pagsabot. Sa laing bahin si Dr. Macht miingon, nga husto ang salmista sa dihang siya miingon, sa Salmo 58, Bersikulo 5, nga ang mga bitin makadungog.”
Sa susama, diha sa artikulo nga gipatik sa zoolohikal nga magasing Aleman nga Grzimeks Tier, Sielmanns Tierwelt (Grzimek’s Animal, Sielmann’s Animal World), Hulyo 1981, panid 34 ug 35, naghinugilon ang awtor bahin sa usa ka kobra nga nagpuyo sa iyang estado sa Sri Lanka diha sa balay sa anay. Iyang gihangyo ang maglalamat sa bitin sa pagdakop sa ihalas nga bitin ug sa pagpasayaw niini. Ang awtor mitaho: “Human nga gipasaligan ko ang akong bisita nga dunay kobra gayod nga nagpuyo didto, siya milingkod sa atubangan sa balay sa anay ug misugod sa pagpatokar sa iyang plawta. Human sa taastaas nga panahon—wala na gayod ako magtuo nga aduna pay mahitabo—giisa sa kobra ang iyang ulo gikan sa lungag sa daghang sentimetro. Sa wala pa makabuka ang baba sa bitin ang maglalamat midalidali sa pagduol ug gisakmit ang ulo niini tali sa iyang kumagko ug sa duha ka tudlo.” Human dayon niana aktuwal nga napasayaw sa Indian ang bitin.
Busa, dunay ebidensiya nga ang kobra “mamati sa tingog sa maglalamat.”—New World Translation of the Holy Scriptures—With References, Appendix 7A, panid 1583.