Anglikanong Iglesya sa Australia—Usa ka Nabahin nga Balay
Sinulat sa koresponsal sa Pagmata! sa Australia
ANG isyu kon ordinahan ba ang mga babaye aron mahimong mga pari sa Anglikanong Iglesya dili butang bag-o. Apan ang maong butang sa dili pa dugay nahimong dakong isyu sa Australia.
Sa Enero 1992 ang obispo sa Canberra ug Goulburn mipahibalo ug mga plano sa pag-ordinar ug ubay-ubayng deakonisa aron mahimong mga pari sa Anglikanong Iglesya. Wala siya maghulat sa sunod nga tigom sa konselyo sa simbahan. Sa pagkatinuod, tulo na ka higayong gisupak sa konselyo ang maong mga ordinasyon.
Ingon sa nahitabo sa ulahi, napulo ka babaye ang giordinahan ingong mga pari sayo sa Marso, Anglikano sa Perth, Australia, bisan pa sa pagsupak. Nan, dili ikahibulong nga gihatagag dakong pagtagad ang umaabot nga tigom sa konselyo sa simbahan. Walay napakanaog nga kataposang desisyon ang sesyon sa Hulyo, busa “usa ka talagsaong sesyon” ang gihikay sa Nobyembre 21, 1992.
Kapin lang ug semanang miagi, ang Heneral nga Tigom sa Konselyo sa Iglesya sa Inglaterra mibotar nga pabor sa pag-ordinar sa mga babaye. Daghan ang nagdahom nga kining desisyona adunay maayong epekto sa Australia. Sa dihang nagtigom ang konselyong Australianhon, usa ka peryodiko mikomento: “Miulbo ang debate ug argumento diha sa punog-tensiyon usahay nga adlaw.” Sa wala pa ibutyag ang resulta sa balota, ang presidente sa konselyo mihangyo nga dawatong malinawon ang pahibalo. Sa dihang gibutyag nga giaprobahan ang ordinasyon sa mga babaye, ang pipila sa mga tumatambong naningkamot sa pagpugong sa ilang mga emosyon. Sa dihang nakaabot sa gawas ang balita, dihay pag-abiba, ug may mga banderang gipalupad sa kahanginan.
Dili tanan ang mibatig kalipay. Ang The Sydney Morning Herald mikutlo sa arsobispo sa Sydney nga nag-ingon: “Dili kita makahimo sa pagkinabuhi nga malipayon . . . Aduna unyay duha ka denominasyon diha sa mao ra nga Anglikanong Iglesya.” Ang laing klero prangka pa nga misulti nga ang ordinasyon sa mga babaye ingong mga pari nagtimaan nga “ang Anglikanong Iglesya sa Australia nagsugod na sa pagkabungkag.”
Ang Bibliya naghatag ug igong pasukaranan sa maong mga kabalaka. Si Jesu-Kristo mismo miingon: “Ang matag gingharian nga nabahin sa iyang kaugalingon malumpag; ug walay lungsod, ni panimalay, nga nabahin sa iyang kaugalingon ang makabarog.”—Mateo 12:25, The New English Bible.
Kini nakapatugbaw ug pangutana nga daw nawagtang diha sa tanang kabangian sa simbahan, Unsay gisulti sa Bibliya bahin sa papel sa mga babaye diha sa kongregasyon? Samtang kini nagahisgot nga samang gipabilhan ni Jehova nga Diyos ang dedikadong mga lalaki ug mga babaye, bisan pa kini nagatudlo sa mga lalaki ug babaye ug lahi nga mga papel diha sa kongregasyon. (Galacia 3:28) Gipahayag kini niining paagiha diha sa 1 Corinto 11:3: “Samtang ang Ulo sa matag lalaki mao si Kristo, ang ulo sa babaye mao ang lalaki, ang Ulo ni Kristo mao ang Diyos.” (NEB) Busa, bahin sa pormal nga pagtudlo atubangan sa kongregasyon, si Pablo gidasig sa Diyos sa pagsulat: “Ang babaye kinahanglang usa ka tumutuon, hilom nga magapamati ug magapasakop. Dili ako makatugot nga mahimong magtutudlo ang usa ka babaye, ni magmando ang babaye sa lalaki.”—1 Timoteo 2:11, 12, NEB.
Apan, dili angay masubo ang Kristohanong mga babaye niini, kay sila may kagawasan sa pagtudlo diha sa publikong ministeryo sama sa gihimo sa mga babayeng si Lois, Eunice, Euodia, ug Sintique sa unang Kristohanong mga panahon.—Filipos 4:2, 3; 2 Timoteo 1:5.