Laing Trahedya sa Ekolohiya

GIKAINGON nga ang kilat dili moigo makaduha sa mao gihapong dapit, apan kana dili aplikado sa tangker nga nagkargag asiete. Duha ka higayon sa 20 ka tuig sa miagi, ang dunggoanan sa La Coruña sa amihanang-kasadpan sa Espanya nahugawan sa dakong pag-agas sa asiete.

Sayo sa buntag sa Disyembre 3, 1992, ang Gregong tangker nga Aegean Sea nasayad sa kabatoan nga misiwil gikan sa lawis nga gitindogan sa La Coruña. Sa pipila ka oras nabungkag sa duha ang tangker, ug pito sa siyam ka tangke niini nasunog. Usa ka dakong haligi sa baga itom nga panganod nagtimaan sa lugar nga gitawag sa Katsilang presidente nga si Felipe González nga “usa ka kataglaman sa ekolohiya.”

Ang Aegean Sea nagkarga ug duolan sa 80,000 ka toniladang krudo gikan sa North Sea, ug sa adlaw human sa aksidente, ang 50 kuwadrado kilometrong pag-agas sa asiete nagsugod sa pagsulong sa upat ka bokana sa duol. Sa milabay nga napulog-unom ka tuig ang tangker nga Urquiola nalunod sa bokana sa mao gihapong pantalan, gihugawan ang baybayon ug kapin sa 100,000 ka toniladang krudo.

Gawas sa dakong kadaot nga nahatag sa mga linalang sa dagat, libolibong mga mangingisda, ang uban bag-o pang nakadawat sa bayad sa miaging katalagman, mawad-an na usab sa ilang kapangabuhian. Nganong daghan man kaayo ang mga aksidente sa tangker? Bisag dagko kaayo ang balod sa gabii niining ulahi nga aksidente, ang tawhanong sayop mao ang gituohang nakaingon sa katalagman.

Sa kabaliskaran, ang Aegean Sea nasayad sa duolan sa 90 ka metros lamang gikan sa parola​—ang labing karaang nag-andar pang parola sa tibuok kalibotan—​ang simbolo sa La Coruña. Kini gitukod hapit duha ka libo ka tuig kanhi sa mga Romano, nga nahibalo sa mga kapeligrohan diha sa pasil. Ang presenteng parola, nga nagpreserbar sa karaang nahibiling mga gamit sa Romano, nagapangidlap gihapon sa iyang pasidaang kahayag. Ikasubo, sa gabii sa Disyembre 3, 1992, kanang pasidaana wala tagda.

[Picture Credit Line sa panid 31]

Foto Blanco