Ang Hunahuna sa Bibliya

Si Jehova ba Diyos sa Gubat?

ANG pila ka magbabasa sa Bibliya dugay nang nag-akusar kang Jehova ingong usa ka diyos sa gubat, ug uhaw pa sa dugo. Pananglitan, si George A. Dorsey, diha sa iyang librong The Story of Civilization​—Man’s Own Show, miangkon nga ang Diyos sa Bibliya, si Jehova, “mao ang Diyos sa mga tulisan, sa mga tigpaantos, sa mga manggugubat, sa pagpamukan, sa tanang linuog nga pagbati.” Ang kritiko sa Bibliya nga si Roland H. Bainton pintok pang miingon: “Ang gubat mas makitawhanon kon ang Diyos walay bahin niini.”

Tinuod ba nga si Jehova maoy diyos sa gubat? Siya ba, sumala sa gipaila sa pipila, sa aktuwal magkalipay sa pagpatayg inosenteng mga tawo?

Nangaging mga Paghukom

Tinuod, ang Bibliya prangkang nag-asoy sa nangaging mga pagpanglaglag ni Jehova nga Diyos. Bisan pa, sila sa kanunay maoy batok sa mga tawong dili diyosnon. Pananglitan, diha na lamang nga ang yuta sa adlaw ni Noe “napuno sa kabangisan” nga si Jehova miingon: “Ania karon, ako magdala ug lunop sa mga tubig sa ibabaw sa yuta aron sa paglaglag sa tanang unod nga diha niana aktibo ang gahom sa kinabuhi.” (Genesis 6:11, 17) Mahitungod sa laing paghukom, tungod lamang kay ang mga siyudad sa Sodoma ug Gomora “nagpatuyang sa ilang kaugalingon sa seksuwal nga kahilayan ug nahilig sa pagkaunodnon” nga ang Diyos “nagpaulan sa asupre ug kalayo” diha niana.​—Judas 7, The New Berkeley Version; Genesis 19:24.

Ang Diyos nagkalipay ba sa paglaglag sa tanang unod sa adlaw ni Noe? O siya ba nakabatog mananapong kahimuot gikan sa paglaglag sa mga molupyo sa Sodoma ug Gomora? Alang sa usa ka tubag, atong tan-awon ang mga hitabo nga naglibot sa Lunop sa adlaw ni Noe. Human ipahayag nga laglagon sa Diyos ang daotang katawhan gikan sa nawong sa yuta aron hinloan ang yuta sa kapintasan, ang Bibliya nag-ingon: “Si Jehova . . . mibatig kasakit sa iyang kasingkasing.” Oo, nakapaguol sa Diyos nga “ang tanang kiling sa mga hunahuna sa kasingkasing [sa tawo] maoy daotan lamang sa tanang panahon.” Busa, aron maluwas ang labing daghan kutob sa mahimo gikan sa umaabot nga Lunop, gisugo sa Diyos si Noe, “usa ka magwawali sa pagkamatarong,” aron ipalanog ang pasidaang mensahe ug tukoron ang usa ka arka alang sa kaluwasan.​—Genesis 6:5-18; 2 Pedro 2:5.

Sa samang paagi, una ipadala ang mga manulonda aron sa paglaglag sa Sodoma ug Gomora, ang Diyos nag-ingon: “Molugsong ako ug tan-awon kon gibuhat ba nila o wala ang tanan nga gipatuo sa pagtuaw batok kanila . . . buot ko gayod nga mahibaloan.” (Genesis 18:20-32, The Jerusalem Bible) Si Jehova nagpasalig kang Abraham (kansang pag-umangkong si Lot nagpuyo sa Sodoma) nga kon ang Iyang pagsusi magpadayag sa napulo lang ka tawong matarong, ang mga siyudad dili laglagon. Ang usa ba ka Diyos nga magkalipay sa pag-ula ug dugo magbaton sa ingon ka maluluy-ong kabalaka? Sa kasukwahi, dili ba makaingon kita nga usa sa dominanteng mga kinaiya sa personalidad ni Jehova mao ang kaluoy? (Exodo 34:6) Siya mismo nag-ingon: “Ako nagkalipay, dili sa kamatayon sa daotan, apan nga ang usang daotan motalikod sa iyang dalan ug magpadayong buhi.”​—Ezekiel 33:11.

Ang mga paghukom sa kalaglagan gikan sa Diyos sa kanunay misangpot tungod kay ang mga tawong daotan sa katig-a modumili sa pagbiya sa daotang dalan, dili tungod kay si Jehova nagakalipay sa pagpatayg mga tawo. Apan tingali mahibulong ka, ‘Dili ba si Jehova nagdasig sa mga Israelinhon nga makiggubat sa mga Canaanhon ug sa paglaglag kanila?’

Mga Gubat sa Diyos Gikinahanglan Alang sa Kalinaw

Ang kasaysayan nagpadayag ug ngil-ad nga hulagway sa kinabuhi sa mga taga-Canaan​—sila labihan ka daotan. Ang espiritismo, paghalad ug bata, sadistikong kabangisan, ug lainlaing mga matang sa pagsimba sa hiwi nga sekso mao ang kaylap. Ingong Diyos sa hustisya nga nagkinahanglan ug linaing debosyon, dili motugot si Jehova nga ang maong dulumtanang mga buhat magbungkag sa kalinaw ug kasegurohan sa inosenteng katawhan, ilabina ang Israel. (Deuteronomio 5:9) Pananglitan, hunahunaa kon ang komunidad nga imong gipuy-an walay dungganong kuwerpo sa kapolisan o kasundalohan nga magpatuman sa mga balaod sa yuta​—dili ba kana motultol sa anarkiya ug kabangisan sa labing daotang matang? Sa susama, si Jehova napugos sa paglaglag sa mga taga-Canaan tungod sa ilang pagkamahilayon ug sa dakong kapeligrohan nga gipahamtang nila sa maputling pagsimba. Busa, siya mihukom: “Ang yuta mahugaw, ug ako magdala sa silot tungod sa kasal-anan niini.”​—Levitico 18:25.

Ang balaang hustisya gipatuman sa dihang ang mga puwersang tiglaglag sa Diyos​—ang kasundalohan sa Israel​—naglaglag sa mga taga-Canaan. Ang kamatuoran nga gipalabi sa Diyos nga gamiton ang mga tawo sa pagtuman sa maong paghukom, inay sa kalayo o lunop, wala magpamenos sa silot. Busa, sa nakiggubat sa pito ka nasod sa Canaan, ang Israelinhong kasundalohan gisugo: “Dili ninyo pagatipigang buhi ang bisan unsang butang nga nagaginhawa.”​—Deuteronomio 20:16.

Hinuon, kay may pagtahod sa kinabuhi ang Diyos wala magsugo sa way-pili nga pagpamatay. Pananglitan, sa dihang ang mga molupyo sa usa ka siyudad sa Canaan, ang Gibeon, mihangyo sa kaluoy, kana gitugot ni Jehova. (Josue 9:3-27) Buhaton ba kana sa usa ka mapintasong diyos sa gubat? Dili, kondili ang usa ka Diyos nga nahigugma sa kalinaw ug hustisya ang mobuhat niana.​—Salmo 33:5; 37:28.

Mga Sukdanan ni Jehova Nagpasiugda sa Kalinaw

Matag karon ug unya, ang Bibliya naglangkit sa panalangin sa Diyos uban sa kalinaw. Kana tungod kay si Jehova nahigugma sa kalinaw, dili sa gubat. (Numeros 6:24-26; Salmo 29:11; 147:12-14) Busa, sa dihang si Haring David nagtinguha sa pagtukod sa usa ka templo sa pagsimba alang ni Jehova, giingnan siya sa Diyos: “Dili ikaw ang magtukod ug usa ka balay alang sa akong ngalan, kay ikaw nag-ula ug daghan uyamot nga dugo sa yuta sa akong atubangan.”​—1 Cronicas 22:8; Buhat 13:22.

Samtang dinhi sa yuta, ang Dakong David, si Jesu-Kristo, naghisgot sa usa ka panahon sa dihang ang gugma sa Diyos sa hustisya dili na motugot nga magpadayon ang presenteng-adlaw nga kadaotan nga atong nakita. (Mateo 24:3, 36-39) Sama sa iyang gibuhat sa Lunop sa adlaw ni Noe ug sa paglaglag sa Sodoma ug Gomora, ang Diyos sa dili madugay molihok sa paghukom aron sa pagwagtang gikan sa yuta sa hakog, daotang mga tawo, sa ingon maandam ang dalan aron ang malinawong mga kahimtang molungtad ubos sa pagmando sa iyang langitnong Gingharian.​—Salmo 37:10, 11, 29; Daniel 2:44.

Tin-aw, si Jehova dili usa ka diyos sa gubat nga gustog dugo. Sa laing bahin, dili siya mosibog sa pagpatuman ug hudisyal nga silot sa dihang kini angay. Ang gugma sa Diyos sa pagkamaayo nagkinahanglan nga siya molihok alang niadtong nahigugma kaniya pinaagi sa paglaglag sa daotang sistema nga naglupig kanila. Sa dihang buhaton niya kana, ang tinuod nga kalinaw molambo sa tibuok yuta samtang ang tinuod nga mga maaghop maghiusa sa pagsimba kang Jehova, “ang Diyos sa kalinaw.”​—Filipos 4:9.

[Picture Credit Line sa panid 20]

David ug Goliat/​The Doré Bible Illustrations/​Dover Publications, Inc.