Si Jehova—Mabangis o Mahigugmaong Diyos?

“APAN mabangis ang Diyos sa Bibliya,” miinsister ang tawong Hapones. Giatubang sa misyonero nga nagbarog sa iyang pultahan ang tawo nga sinati sa Pulong sa Diyos, ang Bibliya.

“Unsay imong ikasulti bahin sa pagpalumos sa mga tawo sa Lunop?” mipadayon ang tawo. “Ug unsay imong ikasulti bahin sa iyang pagsunog sa Sodoma ug Gomorra, bisan dili na hisgotan pa ang iyang pagpatay sa mga Canaanhon pinaagi sa mga Israelinhon? Makaingon ka ba nga dili mabangis ang Diyos? Dugang pa, ang Diyos sa ‘Bag-ong Pakigtugon’ lahi kaayo. Nagtudlo si Jesus bahin sa pakigdait ug gugma.”

Kining paglantaw sa Diyos sa “Daang Pakigtugon” ingong mabangis ug makigubaton naglungtad sa kaisipan sa kadaghanan. Gani, gisuspetsohan sa ubang mga tawo ang Diyos sa gugma sa “Bag-ong Pakigtugon.” Kinsa bay matandog sa pag-alagad sa Diyos nga adunay duha ka personalidad?

“Ang Tanan Niyang Dalan Matul-id”

Apan, ang tawo, walay katungod sa pagtamay sa mga lihok sa Diyos. Masabtan ba dayon sa bata kon nganong gipaantos siya sa iyang amahan diha sa lingkoranan sa dentista? Maingon man, sa sinugdan dili kita makasabot sa tanang mga lihok sa Diyos. “Sayri nga si Jehova mao ang Diyos,” miingon ang salmista. “Siya mao ang nagbuhat kanato, ug dili sa atong kaugalingon.”—Salmo 100:3.

Nan, di ba dili maalamon, nga magdalidali sa pagtuo nga mapintas ang mga lihok sa Diyos? “‘Kay ang akong mga hunahuna dili mao ang inyong mga hunahuna, ni ang inyong mga dalan akong mga dalan,’ nagaingon si Jehova. ‘Kay maingon nga ang langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna.’” (Isaias 55:8, 9) Dugang pa, nagpasalig kanato ang Bibliya nga ang “tanan niyang mga dalan matul-id.” Nailhan si Jehova ingong “Diyos sa pagkamatinumanon, nga kaniya walay inhustisya.” (Deuteronomio 32:4) Busa atong susihon ang pipila ka hitabo diin nakita sa Diyos nga tukmang magpahamtang ug silot.

Ang Lunop

“Ug nakita ni Jehova ang pagkadaotan sa yuta dako ug nga ang tanang pagpalandong sa mga hunahuna sa iyang kasingkasing lonlon mga kadaotan lamang gihapon.” (Genesis 6:5) Mao kana ang kahimtang sa kalibotan sa wala pa ang Lunop. Oo, “nakita [ni Jehova] ang yuta ug, tan-awa! kini nadunot, kay ang tanang unod nagdunot sa ilang dalan sa ibabaw sa yuta.” (Genesis 6:12) Tingali mangatarongan ang uban nga maayong pasagdan na lang unta sa Diyos ang tawo, tugotan sila sa pagbuhat sumala sa ilang gusto. Apan adunay matinud-anon, matarong sa moral nga mga tawo nga nabilin sa yuta. Dili ba mapintas alang sa Diyos sa pagtugot sa daotan sa pagpapha sa kataposang salin sa hinlog moralidad nga nabilin sa yuta? Busa mihikay ang Diyos ug tibuok yutang baha sa pagpapha sa yuta sa mga magdadaot niini.

Dili unta motagana ang mabangis nga Diyos ug kaluwasan alang sa tawo ug sa hayop. Apan gihimo kini ni Jehova. Ang mabangis nga Diyos dili gayod mopasidaan sa umaabot nga kalaglagan. Apan iyang gitudlo si Noe nga mahimong “magwawali sa pagkamatarong” hapit 40 o 50 ka tuig! (2 Pedro 2:5) Ang mga tawo makapili sa kaluwasan o kamatayon.

Sodoma ug Gomorra

Sa mibisita ang duha ka manulonda sa Sodoma, gipakita sa mga pumuluyo ang ilang malaw-ayng kinaiya. Gilibotan sa mga lalaki sa Sodoma ang balay ni Lot, “ug gikan sa mga batan-on ug tigulang nga lalaki, tanang tawo sa usa ka pundok. Ug nagtawag sila kang Lot ug miingon kaniya: ‘Hain ba ang mga tawo nga mianhi kanimo karong gabii? Dal-a sila nganhi kanamo aron kami makaila kanila.’” (Genesis 19:4, 5) Kini maoy ‘pangibog sa unod nga sukwahi sa kinaiyahan.’—Santiago 7; tan-awa usab ang Roma 1:26, 27.

Ang Diyos, “kinsa nagasusi sa mga kasingkasing,” nakakita nga ang mga siyudad dili na gayod matabang. Takos silang laglagon. (Roma 8:27) Ngani, walay bisan napulo ka tawong matarong ang makita sa Sodoma! (Genesis 18:32) Dakong hulga ang batasan sa mga taga Sodoma alang sa matarong nga Lot ug sa iyang pamilya. Busa, buhat sa gugma ang pagluwas kang Lot ug sa iyang mga anak nga babaye!—Genesis 19:12-26.

Pagpatay sa mga Canaanhon

Misaad si Jehova kang Abraham nga ang iyang binhi sa ulahi maoy manag-iya sa yuta sa Canaan. Apan, matikdi, nga walay kalaglagan ang midangat sa panahon ni Abraham. Kay ngano? “Tungod kay ang kasal-anan sa mga Amorihanon [ang labing dakong tribong Canaanhon] wala pa gayod modangat sa kabug-osan,” miingon si Jehova. (Genesis 15:16) Milabay una ang 430 ka tuig sa dihang midangat sa dakong sukod ang pagkadaotan nianang nasora nga gumikan niana nakapamulong si Moises: “Tungod sa pagkadaotan niining mga nasora [sa Canaan] nga si Jehova nga imong Diyos magaabog kanila gikan sa imong atubangan.”—Deuteronomio 9:5.

Ang librong Archeology and the Old Testament nag-ingon “Ang pagkapintas, kaulag ug pagpatuyang sa Canaanhon nga mitolohiya . . . hayan nakapatunghag labing mangil-ad nga batasan sa ilang mga debotado ug naglangkit ug daghang malaw-ayng mga batasan sa maong panahon sama sa balaang pagpamampam, paghalad sa bata ug sa pagsimbag bitin . . . bug-os kadunotan sa moral ug sa relihiyon.” Apan, ang mga Gibeonita ug ang mga pumuluyo sa tulo ka siyudad wala laglaga. (Josue 9:17, 18) Tugotan kaha kini sa usa ka mabangis nga Diyos?

Duha ka Personalidad?

Apan, moinsister ang uban nga ang Diyos sa “Daang Pakigtugon” miagi ug kausaban sa personalidad diha sa “Bag-ong Pakigtugon.” ‘Gisentro sa pagtulon-an ni Jesus ang gugma,’ moingon sila.—Mateo 5:39, 44, 45.

Apan, ang kalaglagan sa Jerusalem sa 70 K.P. midangat ingong silot nga gikan kang Jehova, sumala sa gitagna ni Jesus. (Mateo 23:37, 38; 24:2) Dugang pa, gilaglag ang daotang mga indibiduwal sama kang Ananias, Sapira, ug Herodes. Wala mausab ang Diyos. (Buhat 5:1-11; 12:21-23; Malaquias 3:6) Ni usa ka bag-ong kaugmaran ang pagtulon-an ni Jesus bahin sa gugma. Sa una pa, ang Mosaikong Kasugoan nagsugo: “Higugmaon mo ang imong isigkatawo ingon sa imong kaugalingon.” (Levitico 19:18) Ang mga pagtulon-an ni Jesus bahin sa nagasakripisyo sa kaugalingong gugma, hinuon, sangkad pa kay niining sugoa. (Juan 13:34) Hinumdomi, usab, nga iyang gitunglo ang salingkapawng mga pangulo sa relihiyon. Basaha kining tanan diha sa Mateo kapitulo 23 ug tan-awa kon unsa ka bug-at ang pagsaway ni Jesus kanila.

Busa ang rekord sa Bibliya nagbarog, dili pamatuod sa pagkabangis sa Diyos, kondili ingong pamatuod sa iyang lalom ug malungtarong gugma alang sa katawhan. Busa mapalihok kita sa pagkakat-on ug dugang pa bahin kang Jehova ug sa iyang mahigugmaong paagi. Ang among sunod nga artikulo makatabang kanimo sa pagbuhat niana.

[Mga Letrato sa panid 3]

Makataronganon ba si Jehova sa pagpadala sa Lunop, sa paglaglag sa Sodoma ug Gomorra, ug sa pagpatay sa mga Canaanhon?