Gikan sa Among mga Magbabasa
Diborsiyo Human sa among ikaduhang anibersaryo, gibabaye sa akong bana ang akong suod nga amiga. Duha ka tuig sa ulahi siya mibiya kanako. Busa sa dihang nakita nako ang hapin sa Hulyo 8, 1993, nga Pagmata! nga may ulohang “Diborsiyo—Ang Ganghaan Ngadto sa Labi Pang Malipayong Kinabuhi?,” wala ako madasig. Usahay malisdan ako sa pagtuon sa materyal nga nagpasiugda sa pamilyahanong kinabuhi. Apan, nakapadasig kanako ang pagbasa nga sa kataposan “ang inosenteng kapikas mahimong mogula gikan sa mapait nga kaagi nga mas lig-on, mas lagsik, normal nga tawo.” Ako dili moingon nga anaa na ako sa maong kahimtang, apan ako nagauswag. Nasinati nako ang usa ka lalom kaayo nga depresyon. Apan ang kadagaya sa impormasyon nga inyong gitagana sa ubang mga isyu bahin sa depresyon nakatabang sa mga ansiano sa akong kongregasyon sa pagpaluyo kanako latas sa pila ka malisod kaayo nga panahon. Salamat sa tanang tabang nga inyong gitagana pinaagi sa mga magasin.
D. P., Tinipong Bansa
Dili-Kinaiyanhong mga Ginikanan Sa dihang nabasa ko ang inyong artikulo nga “Mapuslanong Impormasyon Alang sa Dili-Kinaiyanhong mga Ginikanan” (Hulyo 8, 1993), natukmod ako sa pagsulat kaninyo. Ako dyes anyos, ug ako nagpuyo uban sa akong inahan. Ang akong papa nagminyo pag-usab, busa karon may inaina na ako. Sa dihang nabasa nako kon unsay pagbati sa ubang mga bata bahin sa dili-kinaiyanhong mga ginikanan, ako naghunahuna, ‘Mao gayod kini ang akong gibati!’ Ako nalipay nga ang usa sa inyong mapuslanong mga impormasyon mao ang pagbantay sa kasina. Sa daghang panahon, akong gilantaw ang akong inaina ingong kaindig. Ang akong papa usahay mopabati kanako nga labaw ang iyang paghigugma sa akong inaina kay sa iyang paghigugma kanako. Hinaot ang akong papa ug inaina makabasa niining maanindot nga artikulo ug mahimong mas masinabuton kanako.
V. N., Tinipong Bansa
Pagminag Tumbaga Magbasahan ako sa inyong magasin matag karon ug unya uban ang kaikag. Ugaling, nahibulong ako bahin sa artikulong “Ang Kinadak-ang Gamag-Tawo nga Bangag sa Kalibotan.” (Marso 8, 1993) Nganong gibutang ninyo kining minahan sa tumbaga sa maong positibong panglantaw? Wala ba mag-ingon ang Bibliya nga ang Diyos maglaglag niadtong nagalaglag sa yuta?
H. Y., Inglaterra
Nasayod kaayo kami sa epektong nahimo diha sa kalikopan sa bukas nga pagbangag. Bisan pa niana, ang among artikulo nagtaho lamang bahin niining minahan sa tumbaga ingong ulohang makapainteres, dili ingong pagpasiugda sa industriya sa pagmina. Hinuon, sa walay dapigdapig kinahanglang ilhon nga ang elektrikal nga industriya—sa pagkatinuod, ang publiko sa katibuk-an—nahimong nagasalig sa tumbaga. Ug ang kadaghanan sa tumbaga nga gigamit sa Tinipong Bansa nakalot diha sa bukas nga bangag nga mga minahan. Nan, dili makataronganon nga ipasangil lamang sa industriya sa tumbaga ang kadaot sa kalikopan nga miresulta. Kining makuti nga kahimtang nagsilbing ilustrasyon sa panginahanglan sa Gingharian sa Diyos sa pagpuli sa pagdumala sa mga kalihokan sa yuta.—ED.
Paghanduraw Ako 11 anyos, ug buot kong pasalamatan kamo tungod sa mga artikulo sa “Mga Batan-on Nangutana . . .” bahin sa paghanduraw. (Hulyo 8 ug Hulyo 22, 1993) Kanunay akong maghanduraw nga ako nahimong laing tawo, ug gitabangan ninyo ako sa pagpabili nga inay sa paghanduraw bahin sa pagkamagustohan, kinahanglan akong maningkamot nga mahimong magustohan.
J. K., Tinipong Bansa
Sa pagkabasa sa mga artikulo, ako mitiyabaw. Kadaghanan sa akong panahon gigugol sa paghanduraw—sagad bahin sa pagkahimong inila o bahin sa mga lalaki o sa sekso. Kini nahitabo bisan diha sa Kristohanong mga tigom. Ang mga paghanduraw maoy nagmando sa akong kinabuhi. Mopalayo ako gikan sa akong pamilya ug mga higala ug mag-inusara sa akong kuwarto. Naguol ako ug naulaw sa akong kaugalingon. Karon ako nang gibutang sa hunahuna ang inyong tambag ug gipadapat kana. Usahay kining mga hunahunaa mobalik, apan karon akong gipuno ang akong kaisipan sa ubang mga hunahuna o magbuhat sa usa sa akong mga pasatiyempo, ug ang mga hunahuna mahanaw. Daghang salamat.
T. P., Tinipong Bansa