Pagbuntog sa mga Hagit sa Kinabuhi sa Habagatang Asia
SAMTANG anam-anam akong naulian sa panimuot naamgohan nako nga ang wala kong tiil sa katingalahan namanhod. Akong giliso ang akong ulo. Ang kinabuhi sa minahal kong Henry hapit nang mabugto. Apan, dili kadto panahon sa pagkawala sa paglaom. Kinahanglan kong makig-away—makig-away aron maampingan ang akong integridad sa Diyos kinsa daghan kaayog nahatag kanamo.
Mayo 17, 1982 kadto. Ang akong bana usa ka nagapanawng magtatan-aw sa nagasultig-Tamil nga mga kongregasyon sa mga Saksi ni Jehova sa Sri Lanka. Kami nag-alagad sa usa ka kongregasyon nga halayo sa Colombo, ang kinadak-ang siyudad. Magkauban nga nagsakay sa usa ka bisikleta, nga maoy ginahimo sa kadaghanan niining nasora, duol ra ang among bisikletahon aron duawon ang usa ka kaubang Saksi. Ug unya, mikalit lang ug tungha, nga daw sama sa kobra ang trak mibangga kanamo.
Sa nawad-an nag paglaom ang mga doktor sa pagluwas kang Henry, ilang giliso ang ilang bug-os nga pagtagad kanako. Bisan pag luya na ako, napuno ang akong kasingkasing sa dinaliang panginahanglan sa pagsulti kanila sa akong determinasyon sa pagtahod sa sugo ni Jehova sa paglikay gikan sa dugo. (Buhat 15:28, 29) Kinahanglang pahibaloon nako sila. Akong giipon ang diyutay nakong kusog aron makasulti: “Palihog tagai akog usa ka pirasong papel.” Grabe nakong paningkamot sa pagsulat sa akong mga pagtuo ug gipirmahan ang papel. Ug unya ang pakig-away nagsugod.
Gidapatan akog pangunang paagi sa pagtambal. Dayag lamang kaayo nga grabe gayod ang akong pagkaangol. Ang akong determinasyon sa paglihok ingong usa ka tinuod nga Kristohanon mao lamang ang akong gikabalak-an niadtong tungora—dili pa kini ang panahon sa pagbangotan.
Sila Mibalibad sa Pag-opera nga Walay Dugo
Sulod sa siyam ka adlaw ang pakigbugno labot sa pag-abunog dugo nagpadayon—ang akong pakig-away sa pagkinabuhi nga nahiuyon sa akong tanlag pinaagi sa pagdumili niana, ang pakig-away sa mga doktor sa pagkombinsir kanako sa pagdawat niana. Bisan pag sila may mga katakos, sila yanong midumili sa pag-opera nga walay dugo. Grabe ang samad ug nagkinahanglan sa ilang dinaliang pagtagad.
Apan dili kinahanglang makig-away ako nga mag-inusara. Si Jehova nag-uban kanako sa matag gutlo. Ug ang panag-igsoonay sa katawhan ni Jehova puno sa mahigugmaong pagtagad. Ang Colombo maoy 400 kilometros ang gilay-on. Gipahikay ni Dr. Perrin Jayasekera, usa sa mga Saksi ni Jehova, ang iyang igsoon sa unod, nga usa ka siruhano didto, aron ipasulod ako sa Colombo General Hospital.
Mikabat ug duolan sa 24 ka oras, kadtong biyahea diha sa likod sa usa ka van latas sa libaongon nga mga karsada daw mao ang kinalayoang biyahe sa akong tibuok kinabuhi. Bisan pa, ang akong kasingkasing puno sa pagpasalamat kang Jehova alang sa iyang mahigugmaong pagtagad, sama gayod sa kanunay niyang pagtagad sukad pa sa una nakong pagkat-on sa kamatuoran didto sa yuta nakong namat-an, sa India. Ugaling, niadtong tungora wala akoy paryente sa akong kiliran. Apan unsa bay nakapadala kanako sa Sri Lanka?
Ako natawo sa Romano Katolikong mga ginikanan sa estado sa Kerala, India. Malayalam ang among sinultihan. Ang Ingles maoy gitun-an sa tunghaan. Pagkadako sa akong kalipay nga gipahimuslan nako ang higayon sa pagtuon nianag maayo! Kanang bahina sa India may dakong populasyon sa mga tawong nangangkong mga Kristohanon. Sumala sa tradisyon si apostol Tomas ang nagdala sa Kristiyanidad ngadto sa Kerala sa unang siglo. Sa bisan unsang paagiha, kapig 1,400 ka tuig sa ulahi, sa dihang ang mga Portuges nga Romano Katolikong tigkolonisar nga gipangunahan ni Vasco da Gama miabot sa Kerala, sila nakurat sa pagkadiskobre nga daghan na ang nagtuo didto kang Kristo.
Mahagitong mga Desisyon nga Himoon
Sa dihang ang akong pamilya nagsugod sa pagkat-on sa malamdagong mga kamatuoran gikan sa Bibliya uban sa tabang sa mga Saksi ni Jehova, ang akong kinaiyanhong tinguha mao ang pagpaambit niining kamatuorana uban niadtong nangangkong mga Kristohanon sa akong komunidad. Busa nahimo akong payunir, usa ka bug-os-panahong ministro, wala magdugay human sa akong dedikasyon ug bawtismo. Kini nagkahulogan sa pagbalibad sa tanyag sa usa ka maayong posisyon ingong magtutudlo sa Estado nga akong natawhan. Ang dayag nga kasegurohan nga ikahatag sa maong trabahong may-pensiyon mao ang tumong sa kadaghanang batan-ong mga Indian, apan ang akong katuyoan sa kinabuhi nausab. Ang akong gitinguha mao ang tinuod nga kasegurohan, ug kana makaplagan lamang ubos sa mapanalipdanong kamot ni Jehova.
Duha ka tuig sa ulahi, usa ka bag-ong hagit. Andam ba akong mobalhin ngadto sa laing bahin sa India aron motabang diin dako ang panginahanglan alang sa mga magwawali? Kini may hagit sa pagkat-on sa usa ka bag-ong pinulongan, Tamil, ug ang pagtabang sa mga tawo gikan sa lahi kaayo nga relihiyosong kagikan, niining tungora Hindu. Oo, ang higayon sa pagpasundayag sa akong apresasyon kang Jehova nagpaposible sa tanang mga kausaban nga mapuslanon. Ang pagwali niadtong mainiton, mahigalaong mga tawo gikan sa Hindu nga kagikan usa gayod ka kalipay. Modawat dayon sila nga kita nagkahiduol na sa kataposan sa Kali Yuga (ang Daotang Panahon) ug usa ka butang nga mas maayo ang naghulat alang niadtong nagabuhat sa matarong karon. Ugaling, ang pagtabang kanila sa pagkakita sa kalainan sa tinuod nga Kristiyanidad ug sa ilang naeksperyensiyahan sa Kasadpan maoy usa ka dakong hagit. Daghang higayon gibuksan ko ang akong Bibliya sa Mateo 7:21-23: “Dili ang tanan nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit. Daghan ang moingon kanako nianang adlawa, ‘Ginoo, Ginoo, wala ba kami managpropesiya sa imong ngalan, ug nagpagula ug mga demonyo sa imong ngalan, ug naghimog daghan gamhanang mga buhat sa imong ngalan?’ Apan unya akong ipahayag ngadto kanila: Wala gayod ako makaila kaninyo! Pahilayo gikan kanako, kamong mga mamumuhat sa kalapasan.” Maayong pagkapahayag kini ni Mohandas Gandhi: ‘Gihigugma ko si Kristo, apan akong gitamay ang mga Kristohanon tungod kay sila wala magkinabuhi sumala sa pagkinabuhi ni Kristo.’
Daghang Hindu ang nagpakakaplag, sama sa akong nakaplagan, nga kanang pahayaga tinuod kaayo. Ug karon ila usab nga namatikdan nga daghan sa ilang isigka-Hindu dili kaayo lahi ug paglihok niadtong gikan sa Kasadpan kinsa masalingkapawong nangangkon sa Kristiyanidad. Apan ang mga Saksi ni Jehova lahi kaayo. Ang mga Hindu sa linibo nagsugod sa pagkaamgo niana.
Usa ka Bag-ong Kauban, Usa ka Bag-ong Pagsulay sa Integridad
Milabay ang duha ka tuig ug tunga. Ang “Walay Kataposang Maayong Balita” nga Asembliya sa mga Saksi ni Jehova gihimo sa tibuok kalibotan niadtong 1963. Usa sa mga dapit mao ang New Delhi, sa amihanan sa nasod. Pagkahalandomong kombensiyon kadto! Ug didto akong nahibalag si Henry Abraham. Parehas kaming duha nga nagpangita ug usa nga ikauban sa among kinabuhi sa pagdeboto kang Jehova. Lima ka bulan sa ulahi kami nagpakasal.
Nabansay siya sa Watchtower Bible School of Gilead sa New York State ug unya gipadala sa iyang yutang natawhan, sa Sri Lanka, diin dako kaayo ang panginahanglan. Naglaom ako nga andam siyang mobalhin ngadto sa India, diin akong gibati nga mas dako ang panginahanglan. Apan dili kadto mao ang nahitabo. Siya gikinahanglan sa iyang dapit. Busa nahimo nakong pinuy-anan kining matahom nga isla sa Sri Lanka. Makalilipay, ang Tamil ug Ingles mapuslanon kaayong pinulongan dinhi. Busa dili ako kinahanglang magtuon ug bag-ong pinulongan—niadtong tungora. Gitagamtam namo ang 18 ka malipayong mga tuig nga magkauban diha sa pag-alagad kang Jehova una pa nahitabo ang trahedya sa pagkabangga sa nagsagirit nga trak.
Apan niining tungora ako miabot na sa Colombo, ug ang akong pakigbugno aron mabuhi nga dili ikompromiso ang akong integridad pinaagi sa pagpaabuno ug dugo nagpadayon. Karon ang akong kinabuhi nameligro, dili tungod sa akong baroganan labot sa dugo, kondili tungod sa pagkalangan sa pagtambal.
Usa ka plastic surgeon nga Buddhista ug kagikan ug usa ka siruhano sa bukog nga Hindu ug kagikan nagkausa sa pagtanyag sa ilang mga giespesyalisar nganhi kanako. Ang ihap sa akong dugo (hemoglobin) niadtong higayona mius-os ngadto sa mga upat.
Unsaon pagputol sa paa nga diyutay na lang kaayo ang dugo? Tin-aw ang akong determinasyon, apan kini bang duha ka siruhano andam sa pagtabang kanako diin gibalibaran ako sa miagi? Ang ilang kaisog sa pagdawat niining dakong hagit nga wala mosulay pagpugos kanako sa pagkompromiso sa akong tanlag talagsaon. Nawad-an ako sa akong tiil, apan naluwas ang akong kinabuhi, ug ang akong integridad kang Jehova wala madaot.
Nawad-an ug bana nga gihigugma nako pag-ayo, usa ka bug-os bag-ong hugna sa akong kinabuhi ang karon nabuksan. Una pinaagi sa mga sungkod, unya sa prosthesis (sa ulahi, tungod sa kalulot sa daghang igsoong mga lalaki ug mga babaye, giilisdan ug mas maayong artipisyal nga tiil), ako nakaarang sa pagpadayon sa akong ministeryo. Ang kaguol hinayhinay nga gipulihan sa kalihokan.
Mopauli ba ako sa India ug moipon ug puyo sa dili magtutuong mga paryente? Ang talagsaong pananglitan sa Bibliya sa laing balo nga ginganlag Ruth tin-aw kaayo. Gusto ko usab nga magpabilin sa dapit nga ako makaalagad kang Jehova sa labing maayo sa akong daw nakulangan na nga katakos. Ang Sri Lanka sa gihapon mao ang akong pinuy-anan.—Ruth 1:16, 17.
Usa ka Mahagitong Teritoryo
Kining 11 ka tuig daling milabay. Dihay “daghang buhaton diha sa buluhaton sa Ginoo.” (1 Corinto 15:58) Padayon akong nagmapuliki sa pag-alagad sa kanataran sa Colombo. Aniay mga tawo gikan sa lainlaing relihiyosong kagikan—Hindu, Muslim, Buddhista, nag-angkong mga Kristohanon, ug uban pa. Ang mga hagit nagpadayon.
Matag bulan ipalabay sa pipila kanamo ang usa ka hinapos-semana sa pagduaw sa usa sa mga lungsod sa habagatan diin wala pay mga grupo sa mga Saksi ni Jehova. Ang kinabag-an nag-angkong Buddhismo, ug Sinhalese ang ilang pinulongan. Ang pagtuon sa pagtabang niining mga tawhana nahimong hinungdanon kaayo kanako.
Sama gayod sa mga Hindu sa India ug sa tibuok Sri Lanka, ang mga Buddhista mitalikod sa Bibliya tungod sa panggawi sa gitawag nga mga Kristohanon sa Kasadpan. Bisan pa, ang ilang paninugdan nga Buddhistang mga prinsipyo, ang gibantog nga Walo ka Pilo nga Dalan sa hustong paghunahuna ug hustong panggawi (hustong pagtuo, katuyoan, panulti, buhat, pagkinabuhi, pangagpas, kaisipan, pamalandong), maoy dili hingpit tawhanong kaalam kon itandi sa diyosnong mga prinsipyo nga makita diha sa Bibliya, nga kadaghanan gisulat mga siglo una pa ni Siddhārtha Gautama.
Sa dihang si Siddhārtha Gautama nakigsulti sa mga Kalamas sama sa gikutlo diha sa Kalama Sutta, siya miingon: “Ayawg tuo sa impormasyong nabatonan pinaagi sa balikbalik nga pagkadungog; ni diha sa tradisyon.” Pagkakahibulongan nga ako nakapribilehiyo sa pagpahinumdom sa daghang sinserong mga Buddhista nga kon kana nga giya ipadapat karon, walay mausa ang motuo sa sugilambong sa ebolusyon o makalalis sa paglungtad sa usa ka Maglalalang.
Ang Kataposan sa Pagkadaotan Haduol Na
Ang mga Saksi ni Jehova daghag maayong butang gikan sa Bibliya sa pagsulti niining mga tawhana—bahin sa kalpa vinasha, ang kataposan sa pagkadaotan, nga haduol na kaayo. Ang 1,900-ka-tuig nga tagna sa Bibliya bahin niini makita diha sa 2 Timoteo 3:1-5, 13. Kami may pribilehiyo usab sa pagpakita kanila nga ang dapit nga kadangpan alang sa kaluwasan latas niining panahona dili ang mga relihiyon sa Kasadpan o sa Sidlakan kondili, ingon sa gipakita sa mga bersikulo 16 ug 17 sa mao gihapon nga kapitulo, sa kaugalingong dinasig nga Pulong ni Jehova, ang Bibliya.
Ang Buddhismo maoy usa ka pagpangitag kalamdagan. Sa Bibliya, sa dugay na kaayong panahon una pa nagsugod si Siddhārtha Gautama sa iyang kaugalingong pagpangita, ang tinuod nga hinungdan sa pag-antos tin-aw nga gisaysay. (Genesis 3:1-19) Ang pag-alsa batok sa matarong nga balaod sa pagsugod mismo sa tawhanong kasaysayan naghatag ug masulob-ong mga resulta—sakit ug kamatayon, nga mikaylap nga dili kalikayan sa tanang makasasalang mga tawo. Ang makatugaw nga mga pangutana misantop sa mga hunahuna sa daghan—sama sa Habakkuk 1:3: “Ngano nga gipakita mo kanako ang makadaot, ug padayon nga nagatan-aw ka sa kasamok? Ug nganong ang kalaglagan ug ang kabangisan ania sa akong atubangan, ug nganong adunay panag-away, ug nganong nagpadayon ang panagbingkil?” Ang maluloy-ong Maglalalang lamang ang makahatag sa mga tubag ug makalarawg paagi sa pagpasig-uli sa walay kataposan sa kon unsay nawala. Bisan karon, minilyon sa tibuok kalibotan ang nakadawat ug kaayohan gikan sa praktikal nga kaalam sa Pulong sa Diyos. Ug busa karon ang Sinhalese, ang pangunang pinulongan niining nasora, nahimong laing hagit alang kanako, kay nianang pinulongana matabangan ko kadtong sinserong nangita alang sa kalamdagan nga akong nakaplagan 37 ka tuig kanhi.
Lain pang hagit. Pinaagi sa bag-ong mga buhatan sa sanga ug usa ka sentro sa paghubad alang sa Sri Lanka nga gikamulo pag tukod, dugang mga tawo ang kinahanglang bansayon. Sa hinayhinay nakat-onan ko ang bag-ong pinulongan sa mga kompiyuter samtang nagatabang ako sa Departamento sa Kuwenta sa among sangang buhatan.
Ang akong 33 anyos sa bug-os panahong pag-alagad kang Jehova maoy usa lamang ka gutlo diha sa akong gilaoman nga walay kataposang pag-alagad kaniya. Daghan ang miduyog kanamo sa pag-alagad kang Jehova niining mga tuiga, lakip na ang espesyalista nga siruhano nga maoy mihikay aron maadmit ako sa ospital sa Colombo ug alang sa gikinahanglang operasyon. Karon usa na usab siya ka kaubang dedikadong Saksi ni Jehova.
Si Jehova ug ang iyang panimalay sa mga alagad sa yuta nakabulig kanako ug dako. Akong nabati ang iyang mapanalipdanong mga kamot nga nagahalog kanako, ug nasayod ako nga anaa sa iyang panumdoman si Henry tungod sa iyang maunongong gugma. Si Jehova lamang ang makapabalik sa akong minahal gikan sa abog, sa pagtugot kanako sa pagsugat kaniya sa makausa pa, sa pagsugilon kang Henry sa tanang makapalipayng mga hagit nga namugna sa among kaliwatan ug kon sa unsang paagi mitabang si Jehova kanamo sa pagsagubang niini.—Sumala sa giasoy ni Annama Abraham.
[Hulagway sa panid 21]
Si Annama Abraham ug iyang bana, si Henry
[Hulagway sa panid 23]
Si Annama nagsangyaw sa mga tigpananggi ug tsa nga nagtrabaho diha sa plantasyon sa tsa sa Sri Lanka