Gikan sa Among mga Magbabasa
Kamingaw Buot ko kamong pasalamatan pag-ayo tungod sa mga seryeng “Kamingaw—Kon Unsay Imong Mahimo Niini.” (Septiyembre 22, 1993) Kana miabot sa adlaw nga ako mibating nag-inusara. Bisan tuod nakapahilak kana kanako, miarang-arang ang akong gibati sa pagkabasa niana. Makahunahuna akog daghan uban pang mga higala nako nga makakaplag ug pagdasig sa pagbasa niana.
B. H., Tinipong Bansa
Bisan tuod nagtinguha ako sa pagkakita sa maong artikulo sa taastaas nga panahon, kana miabot nga wala gayod damha. Buot kong ipahayag ang akong kinasingkasing nga mga pasalamat tungod sa tambag nga anaa niana. Ang kamingaw malisod gayod sabton kon ikaw wala makasinati niana.
C. G., Italya
Ako 38 anyos ug nakasinatig hilabihang kamingaw, tungod kay bugtong nga anak ug sa ulahi nakaagom ug daghang kausaban sa karera ug diborsiyo. Ang materyal makapalamdag ug edukasyonal. Hinuon, napakyas kamo sa paghisgot nga ang kamingaw mahimong motultol sa seksuwal nga imoralidad, pag-abuso sa droga, ug dili-maayong mga kauban.
J. B., Tinipong Bansa
Niining linain nga artikulo, kami mipili sa pagpunting sa pagtagad sa mga paagi sa pagbuntog sa kamingaw inay sa paghisgot sa mga kapeligrohan niana. Hinuon, gipabilhan namo kining komentoha.—ED.
Mga Anunugba ug mga Alibangbang Ingong tawo nga adunay interes sa biolohiya, buot kong modugang ug usa ka punto sa artikulong “Anunugba o Alibangbang—Unsaon Nimo Pag-ila?” (Mayo 8, 1993) Ang labing tataw nga paagi sa pag-ila dayon kon anunugba ba o alibangbang mao ang pagpaniid sa ilang pagtugdon. Ang anunugba motugdon nga ang mga pako niini gibukhad; sa alibangbang, ang mga pako niini gitiklop nga pinatindog.
Y. Y., Tinipong Bansa
Salamat sa dugang nga impormasyon. Ang “The World Book Encyclopedia” nag-ingon nga kini matuod sa ‘kadaghanang alibangbang ug anunugba.’—ED.
Mga Batan-on Nangutana . . . Salamat sa artikulong “Ako ba Normal nga Nagatubo?” (Septiyembre 22, 1993) Ang akong igsoong babaye manghod nakog usa ka tuig, ug siya taas kaayo. Karon ako nakahibalo nga dili ako magpabiling mubo.
C. L., Tinipong Bansa
Salamat sa artikulong “Unsay Ikasulti Bahin sa Pag-istambay?” (Hunyo 22, 1993) Dili gayod ako matang sa tin-edyer nga mag-istambay kauban sa ubang mga batan-on. Tungod niining katarongana akong gibati nga aduna akoy depekto. Apan ang artikulo nakatabang kanako sa pagpabili nga ang pag-istambay makapasugamak kanimo sa daghang kasamok. Ang pagluto, pagdibuho, pagsulat, ug pagsangyaw maoy mas maayong mga paagi nga magamit nako ang akong panahon.
K. R., Tinipong Bansa
Ako 11 anyos lamang, apan ako nalingaw kaayo sa artikulong “Unsaon Nako Paglikay nga Matakboyan ug AIDS?” (Septiyembre 8, 1993) Ang akong inahan ug ako naghisgot bahin niana nga duyog. Salamat sa pagsaysay nga detalyado kon unsaon pagkahimong luwas sa kagaw sa AIDS. Akong gihunahuna nga makuha nimo kana sa daghang lainlaing paagi, dili lang sa tinong mga paagi!
L. K., Tinipong Bansa
Musiyo sa Kalaglagan Di pa dugay ang akong superbisor sa trabaho nagplano nga moduaw sa Holocaust Memorial Museum. Gihatag nako niya ang Mayo 8, 1993, nga artikulong “Usa ka Musiyo sa Kalaglagan ug ang mga Saksi ni Jehova” aron sa pagpausbaw sa iyang pagduaw. Ang musiyo nag-apod-apod ug 500 ka personal nga kasinatian diha sa mga kard nga gipanghatag. Ang iyang kard adunay kasinatian sa usa sa mga Saksi ni Jehova—si Emma Arnold. Nahimamat sa akong pamilya ang mga Arnold sa 1951 ug may mga letrato nila diha sa album sa mga letrato. Ang akong superbisor natingala nga siya nakakuha sa kasinatian dili lamang sa usa ka Saksi kondili sa usa nga nailhan sa akong pamilya! Gipaambit nako kaniya ug sa uban diha sa trabahoan ang among mga letrato ug ang kasinatian sa umagad ni Sister Arnold, si Max Liebster, nga migula sa Ang Bantayanang Torre sa Abril 1, 1979.
J. K., Tinipong Bansa