Gikan sa Among mga Magbabasa
Pamilya Nakigbisog sa mga Nazi Ako 90 anyos ug nagatuon uban sa mga Saksi ni Jehova. Nabasa nako ang artikulong “Oh, Jehova, Hupting Maunongon ang Akong Dalagita!” (Septiyembre 22, 1993) Naghisgot kana bahin sa Saksing mga ginikanan ug ilang anak babaye kinsa, bisan nailalom sa grabeng pagdaogdaog ni Hitler, nakigbugno ug maisogong nakigbisog sa paglaban sa mga pagtulon-an ni Jehova. Mihilak ako samtang ako nagbasa. Ako determinadong mokat-on sa mga pagtulon-an ni Jehova uban sa seryoso pang tinamdan.
S. T., Hapon
Kining kasinatiana nakatandog kaayo kanako. Si Simone Arnold Liebster bata pa kaayo nga babaye, nga wala ang iyang mga ginikanan ug nabilanggo sa usa ka tunghaan sa pagpanton tungod sa iyang pagkamasinugtanon kang Jehova. Pagkakahibulongang panig-ingnan sa pagtuo!
M. C. L. S., Brazil
Ang pagsalig kang Jehova ug ang gugma, kadungganan, ug kusog nga niana siya ug ang iyang mga ginikanan nagkinabuhi nakapahunahuna nako pag-usab sa akong relasyon kang Jehova. Napaubos ako, ug kana nakatabang nako sa pagpabili sa espirituwal nga bahandi sa kamalahutayon ug pagtuo.
V. B., Australia
Kamingaw Nabasa nako ang mga artikulo bahin sa kamingaw (Septiyembre 22, 1993) katulo o kaupat ka beses. Kamo nagsugyot nga ang usa kinahanglang mosayaw, moawit, ug molihok nga malipayon. Apan wala ninyo hisgoti kon sa unsang paagi ang kemikal nga kadili-timbang makapahinabo sa usa nga magbaton ug mga pagbati sa paghikog.
P. C., Tinipong Bansa
Ang mga artikulo wala itumong niadtong nag-antos sa grabeng depresyon o mga kiling sa paghikog, nga sa kasagaran nagkinahanglan ug linaing pag-atiman. Hinunoa, sila gitumong ngadto niadtong nag-antos sa temporaryong mga pagbati sa kamingaw tungod sa makaguol nga kahimtang, sama sa kamatayon sa mga minahal. Ang materyal bahin sa depresyon gipatik sa among Oktubre 22, 1987, nga isyu ug usab sa bahin nga “Mga Batan-on Nangutana . . .” niining isyuha.—ED.
Amihanang Kahayag Nalingaw ako sa inyong artikulong “Misteryosong mga Sumasakay sa Langitnong Kahanginan” (Septiyembre 22, 1993) bahin sa aurora borealis. Apan napakyas kamo sa pagpunting nga ang mga kahayag makita usab gikan sa amihanan ug sidlakang mga bahin sa Scotland. Aduna ganiy awit bahin sa ‘amihanang kahayag sa karaang Aberdeen’!
G. S., Scotland
Salamat sa dugang impormasyon.—ED.
Pagpanalipod sa Ihalas nga Kahayopan Ako presidente sa usa ka lokal nga organisasyon nga nagpakabana sa kalikopan. Maayo kaayong makakita ug serye sa tukmang mga artikulo bahin sa kalikopan. (“Kinsay Manalipod sa Atong Ihalas nga Kahayopan?,” Nobyembre 8, 1993) Akong gibarogan sulod sa katuigan nga kon dili pa tungod sa Diyos, kita nangamatay na unta.
M. S., Tinipong Bansa
Ang Diyos naghimo gayod sa yuta nga dali rang maulian sa kadaot, nga sa way duhaduha maoy hinungdan nganong kana nakabarog sa paningkamot sa tawo sa paglaglag niana. Hinuon, sa kataposan, ang Iyang sulbad mao ang “paglaglag niadtong nagalaglag sa yuta.” (Pinadayag 11:18)—ED.
AIDS Nalingaw kaayo ako sa mga artikulo bahin sa AIDS diha sa seryeng “Mga Batan-on Nangutana . . .” (Agosto 22, 1993, Septiyembre 8, 1993) Ako 20 anyos ug kanhi naulaw sa kamatuoran nga ako usa ka ulay. Apan human mabasa kadtong mga artikuloha, naamgohan nako nga ang akong pagkaulay maoy gasa gikan kang Jehova.
L. K., Tinipong Bansa
Ang pagpasabot nga ang heteroseksuwal nga kontak anaa sa samang kategoriya sa riyesgo sa homoseksuwal nga kontak maoy sayop. Ang tanang panukiduki nagpakita nga ang mga homoseksuwal adunay kinatas-ang riyesgo nga matakdan ug HIV.
J. S., Tinipong Bansa
Ang panukiduki nagpakita nga ang nga homoseksuwal anaa gayod sa mas dakong riyesgo sa impeksiyon sa HIV. Bisan pa niana, ang nga eksperto nag-ingon nga ang impeksiyon pinaagi sa heteroseksuwal nga kontak nagauswag sa makapalisang nga gikusgon. Ug sumala sa usa ka tigpamaba sa Food and Drug Administration sa T.B., ang kababayen-an “ang labing kusog nagauswag nga bahin sa populasyon nga natakboyan sa HIV ning nasora.” Dili kay sala kana kanunay sa kababayen-an; daghan ang natakboyan pinaagi sa mahilayong nga bana.—ED.