Gidayeg sa Tigbalita sa Kiev ang mga Saksi
SI Oleksa Kurpas nakadayeg kaayo sa kombensiyon nga gihimo sa mga Saksi ni Jehova sa Kiev, Ukraine, niadtong Agosto 5 ngadto sa 8, 1993. Siya misulat sa Democratic Ukraine [Ukrainian: Demokratéchna Ukraïna] sa Kiev niadtong Agosto 10:
“Ang Republican Stadium [Ukrainian: Respublikánski stadion] wala pay ingon kadaghang tumatambong sulod sa dugayng panahon . . . Hunahunaa ang 64,000 ka tawo (taliwala kanila ang libolibong mga langyaw) nga nagpuyo sa mga hotel, nagduaw sa mga tindahan, nanakay sa publikong mga sakyanan. . . . Ang kombensiyon sa mga Saksi ni Jehova hataas ug kalidad. Ang mga mamumulong sipa nga gipalakpakan (sama sa unang mga panahon), ug ang mga luha midagayday sa akong mga aping.
“Dili tanang tawo ang nahibalo bahin niining relihiyona. Lahi sa Ortodoksong pagtuo, ang mga Saksi ni Jehova nagtuo nga si Jesu-Kristo mao ang Anak sa Diyos, ug ang balaang espiritu mao ang puwersa sa Diyos, o gahom, (sa ato pa, sila dili modawat sa pagkausa sa tulo diha sa Santisima Trinidad). Sila nagtudlo nga walay impiyerno. Tapos sa makalilisang nga paghukom, ang kalibotan himoong usa ka paraiso, diin ang mga tawong matarong magpuyo ug ang mga makasasala mamatay. Ang mga sumusunod niining pagtuoha nagahatag sa pamilya sa ilang pangunang pagtagad. Kini maoy usa ka butang nga balaan, ang tinuod nga pasikaranan sa mga butang, ang labing matahom ug labing mainitong butang sa kalibotan. Sila adunay mahigalaon kaayong tinamdan sa ilang igsoong mga lalaki ug babaye (ug ang labaw pang talagsaon—ngadto sa mga tawo nga lain ug pagtuo). Wala pa ako makakita ug butang nga sama niini. . . .
“Ang labing makaiikag nga butang nahitabo sa Sabado, Agosto 7. Niining adlawa sa Internasyonal nga Kombensiyon sa mga Saksi ni Jehova, ang wala pay sama nga gidaghanon ang nabawtismohan, nga mao, 7,402. Alang niining talagsaon ug hinungdanong paagi, unom ka mahipos dagkong mga biawan ang gipahimutang diha sa lumbaanan sa Estadyum. Kan-uman ka hamtong sa espirituwal nga mga lalaki ang mihimo sa bawtismo pinaagi sa paglusbog sa tubig niining bag-ong mga magsasangyaw sa maayong balita. Mikabat ug 2 ka oras ug 15 minutos ang tibuok nga seremonyas. . . .
“Ang bag-ong mga tinun-an naglinya diha sa lima ka seksiyon sa estadyum ug gisugat ug mga palakpak sa mga Saksi ni Jehova nga nanambong sa kombensiyon. Ang gidaghanon sa nabawtismohan sa Kiev milabaw sa kanhing gidaghanon sa 1958 [nga 7,136], sa internasyonal nga kombensiyon sa New York. Sa katibuk-an, uban sa maayo nagalihok nga organisasyon sama sa nabatonan sa mga Saksi ni Jehova, kining relihiyosong kalihokan sa haduol nga umaabot tinong makadanig daghang Ortodoksong mga kalag nga nagpabilin nianang pagtuoha sa dugay nang panahon.
“Hinaot pasayloon ako sa mga lider sa lainlaing relihiyosong mga relihiyon, apan kon dili nila hunongon kining binuang nga mga panag-away taliwala sa ilang kaugalingon, mawad-an silag ginatos ka libong relihiyosong katawhan. Kining kombensiyona nagpakita nga ang pagkab-ot sa kalinaw ug harmoniya taliwala sa katawhan sa lainlaing nasyonalidad ug gikan sa lainlaing mga nasod posible gayod.”
[Hulagway sa panid 24]
Pipila sa 7,402 nga nabawtismohan sa Kiev, Ukraine, nga kombensiyon