Walsingham—Kontrobersiyal nga Sagradong Lugar sa Inglaterra
SINULAT SA KORESPONSAL SA PAGMATA! SA BRITANYA
ANG Walsingham, usa ka matahom nga baryo sa Norfolk County, Inglaterra, nagadawat ug kutob sa 100,000 ka peregrino sa usa ka tuig nga nagaduaw sa mga sagradong lugar sa Nuestra Senyora sa Walsingham. Ang usa ka sagradong lugar gipaluyohan sa Romano Katoliko, ug ang lain gipaluyohan sa Church of England. Kini ang nakaagak sa usa ka kontrobersiyal nga kahimtang.
“Ang National Pilgrimage sa Walsingham maoy usa ka masakit nga kasinatian sa katuigang dili pa dugay,” misulat ang usa ka klero sa Church of England diha sa Church Times. “Ang prosesyon sa mga peregrino . . . gisugat ug makusog ug masuk-anong mga singgit sa . . . nagkadaghan ug organisado kaayong mga panon sa mga tigprotesta.”
Nganong may pagprotesta? “Ang ginahimo dinhi ubos sa ngalan sa Kristiyanidad walay kalainan sa paganismo,” miingon ang mga tigprotesta batok sa sagradong lugar sa Church of England, “usa ka dayag nga insulto sa Kamatuoran, usa ka dulumtanan sa panan-aw sa Diyos ug usa ka daotan nga insulto sa atong protestante nga panulondon.”
Sa Inglaterra, ang relihiyon talagsa ra nga makapukaw ug samang mainit nga mga pagbati. Unsay anaa sa Walsingham nga nakamugnag kusganong mga pagbati? Usa ka pagsubli sa kasaysayan bahin sa mga sagradong lugar motabang kanimo sa pagsabot.
Protestante Kontra Katoliko
Sa wala pa ang Repormasyon sa ika-16 nga siglo, ang Inglaterra kaniadto maoy Romano Katoliko ug magarbohon sa daghang sagradong lugar. Ang usa sa labing karaan mao kanang anaa sa Walsingham, ang labing dakong sagradong lugar ni Birheng Maria sa nasod. Kini nagsugod sa tuig 1061 sa dihang ang senyora sa kasa solariaga sa Walsingham nagtukod ug usa ka balay sa baryo. Sumala sa sugilambong, ang mga detalye sa pagtukod niini gihatag pinaagi sa usa ka panan-awon, nga ginaingon nga kaamgid sa balay sa Nasaret diin si Maria, ang inahan ni Jesus, nagpuyo. Sa Edad Media, kining sagradong lugar ni Maria naila sa tibuok-kalibotan.
Ang mga hari ug ordinaryong mga tawo managpanon sa Walsingham. Unsay nakadani kanila? Gawas sa kahoy nga larawan ni Maria uban sa masuso nga si Jesus diha sa iyang tuhod, ang mga indulhensiya ug mga relikyas mapalit, ug ang mga sakit gikataho nga nangaayo didto. Ang mga peregrino makakita usab sa “milagro” sa Walsingham, usa ka ampulya nga giila nga nasudlan sa miuga nga mga tulo sa gatas ni Maria. Ang ubang mga bisita nagtuo nga ang unod niini maoy mga tisa lamang o puti nga tingga, samtang si Erasmus, ang eskolar sa Bibliya, nagduhaduha sa pagkatinuod sa relikyas, diin alang sa uban daw samag dinugmok nga tisa nga tan-awon nga gisagolag klara sa itlog.
Nganong ang ingon ka dungganong repormador nga sama kang Erasmus miadto sa Walsingham? Tingali aron makatuman sa usa ka panaad. Bisag iyang gibatbat ang sagradong lugar sa tanang detalye, “ang iyang makantalitahong sinulat sa bug-os nga debosyon pulos pagpanaway,” nagkanayon ang The Catholic Encyclopedia. Si Erasmus misulat “sa makantalitahon ug walay-pagtuo nga paagi,” miingon ang manalaysay nga si Frederic Seebohm, nga midugang nga walay ebidensiya “nga siya mismo maoy usa ka magsisimba sa Birhen o magtutuo nga may epekto ang mga pagduaw ngadto sa iyang sagradong lugar.”
Sa panahon sa Repormasyon gikuha sa bag-ong natukod nga Church of England ang relihiyong Romano Katoliko. Sa tuig 1538, ang sagradong lugar sa “Witch of Walsingham,” nga maoy pagtawag kaniya sa maong panahon, giguba sa mando ni King Henry VIII, ang lider sa mibulag nga iglesya, ug ang luna gibaligya. Ang estatuwa, usa ka gidumtan nga simbolo sa pagsimbag idolo, gidala gatosan ka kilometro ngadto sa Chelsea sa London ug didto gisunog atubangan sa katilingban.
Gisundog sa mga Protestante ang mga Katoliko
Sayo niining sigloha, hinunoa, gipasig-uli sa Church of England ang Nuestra Senyora sa Walsingham—ingong usa ka sagradong lugar sa Protestante! Sa 1921 usa ka kinulit nga kopya sa orihinal nga estatuwa ang gitaod sa simbahan sa parokya sa Walsingham, ug ang unang modernong mga peregrino miabot usa ka tuig sa ulahi. Samtang nagkapopular ang maong sagradong lugar, nagkadako usab ang kasuko sa pipila ka membro sa simbahan. Sa Mayo sa matag tuig, sa dihang isuroy ang estatuwa diha sa mga karsada sulod sa 30-ka-minutos nga prosesyon, ang ubang mga membro masuk-anong nagprotesta sa idolatriya.
Sa 1934, ang mga Romano Katoliko nagtukod sa Walsingham ug ilang Nasodnon Sagradong Lugar sa Nuestra Senyora. Kini nga sagradong lugar nasudlan sa ikaduhang kopya sa orihinal nga imahen sa inahan ug anak ug nahimutang diha sa karaang Slipper Chapel. Mao kini ang dapit diin ibilin sa mga peregrino kaniadto ang ilang mga sapatos aron magtiniil nga maglakaw ngadto sa orihinal nga sagradong lugar sa baryo. Makaiikag, ang target sa mga tigprotesta gitumong lamang sa sagradong lugar sa Church of England, diin matud pa nila maoy usa ka pagpalambo sa pagsimba kang Maria ug usa ka pagsalikway sa panulondon sa relihiyong Protestante.
Apan aduna bay laing katarongan sa mainit nga pagbatok sa mga tigprotesta? Daghan ang nagtuo nga aduna. Ang “mga protesta dugang nga nahimong pagprotesta batok sa homoseksuwal ning bag-o pa,” mitaho ang The Independent, usa ka mantalaan, “nga ang ilabinang gitumong mao ang homoseksuwal nga mga elemento.” Kini nagpasabot sa usa ka pundok sa kalalakin-an sa Church of England, ilabina ang mga klerigo, kinsa sa miaging pipila ka tuig naghimo sa ilang tinuig nga kombensiyon sa Walsingham. Nganong nangabot sila? Ang usa ka regular nga peregrino mikomento: “Kini maoy usa ka tigom kabahin sa homoseksuwal.”
Sa matin-aw, ang maong okasyon, nga dulot nga nalangkit sa idolatriya ug karon may homoseksuwal nga bahin, kinahanglang likayan sa matuod nga mga Kristohanon.—1 Corinto 6:9; 10:14; 1 Juan 5:21.