Ang Kabituonan Adunay Mensahe Alang Kanimo!

INGON sa gipakita sa nag-unang mga artikulo, bisan pa sa himaya nga gipadayag sa mga bituon, ang tawo angay lamang magtagad kanila kon unsa gayod sila​—walay kinabuhing mga butang nga gibutang sa kalangitan sa Maglalalang alang sa iyang katuyoan. Sila dili pagasimbahon. Ingong bahin sa kahibulongang kalalangan ni Jehova ubos sa iyang mga balaod, ang mga bituon maoy alang sa ‘pagpahayag sa himaya sa Diyos’ ug sa samang panahon nagasilbing tinubdan ug kahayag alang sa tawo samtang siya nagatuman sa katuyoan sa Maglalalang alang kaniya.​—Salmo 19:1; Deuteronomio 4:19.

Sa Bibliya atong mabasa: “Dili pagahikaplagan diha kaninyo si bisan kinsa nga . . . nagapanagna, usa ka salamangkero o bisan kinsang nagpangitag mga tilimad-on o usa ka barangan, o usa ka maglalamat o nagakonsulta sa espiritista o propesyonal nga mananagna sa mga hitabo o usang nagpakisusi sa mga patay. Kay ang tanan nga nagahimo niining maong butang maoy dulumtanan kang Jehova.” (Deuteronomio 18:10-12) Si Isaias nag-ingon: “Patindoga [ang imong mga magtatambag], karon, ug paluwasa sila kanimo, kadtong mga magsisimba sa kalangitan, sa nagatan-aw sa lihok sa mga bituon . . . Tan-awa! Sila mahisama sa tuod.”​—Isaias 47:13, 14.

Kon Unsay Atong Makat-onan Gikan sa mga Bituon

Hinuon, ang walay kinabuhing mga bituon adunay ikasulti kanato kon kita andam nga maminaw. Si Edwin Way Teale nagsulat: “Ang mga bituon nagasulti bahin sa pagkawalay-hinungdan sa tawo diha sa hataas walay kataposang panahon.” Oo, sa dihang maamgohan nato nga kadaghanan sa mga bituon nga nakita sa atong mga mata sa kagabhion nga tin-aw ang panahon nakita na sa atong katigulangan mga siglo sa miagi, dili ba kini makapaubos kanato? Dili ba kita mataha sa Halangdong Usa nga naglalang kanila “sa sinugdan” ug sa ulahi naglalang sa mga tawo? Si Haring David sa Israel matinahurong nagsulat: “Sa magtan-aw ako sa imong kalangitan, sa buhat sa imong mga tudlo, sa bulan ug sa mga bituon nga imong giandam, unsa ba ang mamatay nga tawo nga ikaw matinagdanon man kaniya, ug ang anak sa tawo nga ikaw nagduaw man kaniya?” Ang kalangitan angay untang makapaubos kanato ug magtukmod kanato sa pagsusi kon unsay ginahimo nato sa atong mga kinabuhi.​—Genesis 1:1; Salmo 8:3, 4.

Sa usa ka higayon si David nag-ampo: “Tudloi ako sa pagbuhat sa imong kabubut-on, kay ikaw mao ang akong Diyos.” (Salmo 143:10) Ang talaan sa kinabuhi ni David nagpaila nga ang iyang pag-ampo gitubag. Nakakat-on siya sa pagbuhat sa kabubut-on sa Diyos ingon sa mabasa diha sa Iyang Kasugoan. Nakakat-on usab siya sa katuyoan sa Maglalalang alang sa katawhan, ug siya nagsulat bahin niana. “Sa makadiyut na lamang, ug ang daotan mawala na . . . Apan ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait. . . . Pahilayo gikan sa daotan ug buhata ang maayo, ug magpuyo sa panahong walay kataposan. . . . Ang mga matarong mismo magapanunod sa yuta, ug sila magapuyo niana sa walay kataposan.” Uban sa kahibalo nianang maong katuyoan mitungha ang kaakohan: “Magpahilayo gikan sa daotan ug magbuhat ug maayo.”​—Salmo 37:10, 11, 27-29.

Ang mga bituon adunay susamang mensahe alang sa tanang katawhan. Nga wala magsimba kanila o “magkonsulta” kanila, atong makita ang gugma, kaalam, ug gahom sa Maglalalang nga gibanaag diha kanila. Ang pagtuon ug astronomiya, ingong kaatbang sa astrolohiya, kinahanglang magsilsil ug kataha diha sa atong mga kasingkasing. Apan labaw pa niana, wala ba kana magpatubo sa atong pangandoy nga makakat-on ug dugang labot sa Diyos? Siya naghatag sa iyang Pulong, ang Bibliya, alang nianang maong katuyoan. Kon imong nasabtan kining maong mensahe gikan sa mga bituon, makakat-on ka kon unsay gitagana ni Jehova alang sa katawhan ug, labing hinungdanon, kon sa unsang paagi makig-ambit ka sa mga panalangin nga iyang giandam alang kanila. Kon ikaw adunay mga pangutana labot sa Diyos ug sa katuyoan sa kinabuhi, ayawg panuko sa pagpakigkita sa mga Saksi ni Jehova sa inyong dapit, o pagsulat sa kinaduolang adres nga gipaila sa panid 5.

[Hulagway sa panid 8]

Ang mga bituon makatudlo kanato ug pagkamapaubsanon