Usa ka Butang nga Maestoryahan nga Imong Makaon
HINAM-IS? . . . HINAM-IS! . . . Nagplano ka ba ug usa ka panihapon alang sa mga bisita ug unya nangutana sa imong kaugalingon, ‘Unsay akong idalit nga hinam-is?’ Tingali kining kasagarang suliran nag-aghat kanimo sa pagsusi sa imong mga resipe ug sa tanan nimong mga libro sa pangluto aron mangita ug angayang hinam-is alang sa inyong salo-salo.
Gusto ba nimong sulayan ang fondue? Dili lang kay kini usa ka kinaiyanhong butang nga maestoryahan kondili dali ra ug sayon usab kining lutoon. Unsa may fondue? Sa yano kaayo, kini usa ka pagsagol sa pipila ka mga sangkap nga gipalanay sa usa ka kaserola. Unya, ang ubang pagkaon, nga atong nganlag “igtutuslob,” ituslob ngadto sa sinagol ug kaonon. Ang pulong nga fondue naggikan sa Pranses nga pulong nga fondre nga nagkahulogang “paglanay.” Pananglitan, sa usa ka tsokolateng hinam-is nga fondue, ang sinagol sa pagkatinuod maoy gipalanayng tsokolate, ug ang mga igtutuslob mao ang pastri ug preskong prutas.
Tsokolateng Hinam-is nga Fondue
Sa wala mao ang usa ka resipe sa tsokolateng hinam-is nga fondue. Kon wala pa nimo kini masulayi sukad, kini usa ka makalipayng sorpresa alang kanimo!
Palanaya ang tsokolate sa usa ka kaserola. Idugang ang nahibiling (mga) sangkap. Ukaya hangtod moespeso ang sinagol. Ibalhin ang sinagol ngadto sa kaserola para sa fondue, ug padayong inita kana ibabaw sa hinay nga kalayo.
Sa dili pa nimo ituslob ang igtutuslob sa fondue, tingali buot nimong sagolan kana ug duha ka kutsaritang matunaw-dayon-sa-tubig nga kape o un-kuwarto nga kutsaritang sinamon. Aron dili molagom ang mga prutas nga igtutuslob, wisiki kini ug duga sa limon nga gisagol sa tubig. Kon layaw ra kaayo ang sinagol nga tsokolate, dugangi pa ug tsokolate. Kon kini espeso ra kaayo, palayawa kana ginamit ang gatas.
Kon nagagamit ka ug usa ka elektrik nga kaserola para sa fondue o usa ka kaserola para sa fondue nga mahimong itak-ang sa lutoan, mahimong magluto ug magdalit ka ginamit ang samang kaserola. Ibutang ang kaserola para sa fondue diha sa tunga sa lamesa nga sayon rang makab-ot sa tanan. Ang usa ka kaserola paigo sa unom o walo ka tawo.
Kon may masalin nga sinagol, dili kana madaot kon ibutang sa repridyeretor ug mahimong usa ka ekselenteng adorno o pangpalami sa sorbetes.
Swiso nga Kesong Fondue
Gusto ba nimong sulayan ang kesong fondue? Sa tuo mao ang resipe alang sa pangpagana o sa pangunang potahe.
Bagnosi ang sulod sa kaserola sa gihiwaan nga daplin sa usa ka lusok nga ahos, unya ilabay ang ahos. Ibubo ang bino ug duga sa limon ngadto sa kaserola, ug inita kana ibabaw sa kasarangang kalayo. Motungha ang mga bula ug motabon sa ibabaw. Ayaw pabokala ang bino.
Sa usa ka panaksan sagola ang gawgaw o harina uban sa kinagod nga keso, ug ukaya.
Samtang padayong nagaukay sa sinagol nga bino, dugangi ug usa ka kumkom nga keso. Inigkalanay sa keso, dugangi ug laing kumkom sa keso, ug ukaya hangtod nga kini malanay. Padayon niining paagiha hangtod nga ang tanang keso matunaw. Kon gusto, timplahi ug puti nga siling pinulbos ug nutmeg o paprika ug dinugmok nga clove.
Ibalhin kana ngadto sa kaserola para sa fondue, ug itak-ang kana ibabaw sa ubos ngadto sa kasarangang kainit. Ang kada tawo adunay iyang kaugalingong taas ug gunitanan nga tenedor para sa fondue, plato, ug tenedor. Tusuka lamang ang usa sa mga igtutuslob ug ipahid kana nga paliyok o de-otso nga paagi diha sa fondue. Ibutang ang igtutuslob diha sa imong plato, ug kaona kana ginamit ang imong tenedor.
Kon ang fondue layaw ra kaayo, dugangi pa ug keso. Kon maespeso ra kaayo, isagol ang ininit nga bino. Kon ang sinagol mobulag, inita kana pag-ayo, batila kana ginamit ang usa ka batidor, ug unya pahinayi ang kalayo. Ang sinagol kinahanglang dili mobulag kon ukayon nimo kini ginamit ang igtutuslob sa matag panahon nga motuslob ka.
Kon mopili ka ug dili-alkoholikong pangunang sagol alang sa imong fondue, himoa ang yanong keso nga sarsang resipe. Sagola ang upat ka kutsarang mantekilya ug upat ka kutsarang harina. Lutoa ang sinagol ibabaw sa hinay nga kalayo. Dugangi ug duha ka tasang bugnawng gatas, inanayng pabukala, ug lutoa ang sinagol sulod sa duha ka minutos. Inanayng idugang ang usa ug tunga sa tasang lamian kaayong keso (kinagod) ug ukaya hangtod kana malanay. Timplahi ug asin ug siling pinulbos. Ituslob ingon sa gibatbat sa ibabaw.
Usa ka Matam-is nga Panapos
Sa sunod nga higayon nga atubangon nimo ang suliran bahin sa hinam-is, tingali mohukom kang sulayan ang tsokolateng fondue. O alang sa panihapon, tingali idalit nimo ang karneng baka nga fondue.
Sa walay duhaduha kining tunawanang kaserola sa maayong mga lami mahimong kinaham kaayo nimo ug sa imong mga higala sa dugay nga panahon. Ang kamadanihon niini naggikan sa komon nga kaserola. Ang tanan motuslob, nga nagapatungha ug usa ka mainit nga atmospera sa paghigalaay, nga mao ang pangunang sangkap niining butang nga maestoryahan nga imong makaon!—Tinampo.
[Kahon sa panid 22]
Resipe Alang sa Tsokolateng Hinam-is nga Fondue
6 onsas nga tab-ang nga tsokolate
1 1/2 tasang asukar
1 ka tasang krema
1/2 sa tasang margarina o mantekilya
1/8 sa kutsaritang asin
o yanong:
12 onsas nga dili-kaayo tam-is nga tsokolate
mga piraso sa tsokolate o tam-is nga tsokolateng pangluto
1/2 sa tasang katunga-krema ug katunga-gatas
Pastri nga mga igtutuslob:
Angel food keyk, ladyfingers, donat, gipormag-cube nga pound-keyk
Igtutuslob nga mga Prutas, pagpili ug usa o ang tanan:
Mga mansanas, saging, serales, datiles, ubas, kahel, melon, kapayas, melokoton, peras, pinirasong mga pinya, estroberi
[Kahon sa panid 23]
Resipe Alang sa Swiso nga Kesong Fondue
1 ka lusok nga ahos, gitunga
1 1/2 sa tasang dry, puti nga bino
1 ka kutsarang duga sa limon
1 1/2 ngadto sa 2 ka kutsarang gawgaw o harina
16 onsas nga kesong Swiso, kinagod (o kombinasyon sa Swiso ug Gruyère)
2 ngadto sa 3 ka kutsarang kirsch (mahimong dili isagol)
Puti nga siling pinulbos ug nutmeg o paprika ug clove, kon maoy gusto
Igtutuslob:
2 ka pirasong kagumkom nga tinapayng Pranses (o tinapayng Italyanhon o gahing mga roll) nga gihiwa ngadto sa 1 ka pulgadang mga cube, ang matag usa adunay bahin sa crust
Linutong manok, hamon, pasayan
Hilaw o linuto nga mga utanon
[Kahon sa panid 24]
Mga Sarsang tuslobanan:
Sarsang Horseradish
3 ka kutsarang linuto nga horseradish
1 ka tasang dairy sour cream
1 ka kutsaritang duga sa limon
1/8 sa kutsaritang paprika
Sagola ang mga sangkap
Mayones ug Curry nga Sarsa
1/2 sa tasang mayones
1/2 sa tasang dairy sour cream
1 ka kutsaritang duga sa limon
1 ka kutsaritang pinulbos nga curry
Sagola ang mga sangkap
Asin ug sili sumala sa gusto
Sarsang Mustasa
3 ka kutsaritang linuto nga mustasa
2 ka kutsarang tinadtad nga sibuyas
1 ka tasang dairy sour cream
Sagola ang mga sangkap
Asin ug sili sumala sa gusto
Resipe Alang sa Karneng Baka nga Fondue
2 ka librang walay-tambok nga karneng baka, lumo, o walay-bukog nga unod sa dapidapi
mantika gikan sa utanon
Pahinumdom: Ang kaserola para sa fondue kinahanglang hinimo sa tinunaw nga puthaw, tumbaga, o asero. Ang seramik nga mga kaserola dili luwas alang sa fondue nga adunay mantika. Init ra kaayo ang mantika, ug mabuak ang kaserola
[Hulagway sa panid 23]
Tsokolateng hinam-is nga fondue
[Hulagway sa panid 24]
Swiso nga kesong fondue