Gikan sa Among mga Magbabasa
Kaguol Daghan kaayong salamat sa artikulong “Ang Hunahuna sa Bibliya: Tabang Alang sa Inyong Kaguol.” (Marso 8, 1994) Di pa dugay ang akong bana, nga usa ka ansiano sa Kristohanong kongregasyon, namatay sa usa ka aksidente. Dili ikabatbat sa mga pulong ang kaguol nga nasinati nako ug sa among tulo ka anak. Pagkadakong panalangin ang pagbasa sa artikulo ug ang pagkasabot nga ang mga pagbati nga among nasinatian maoy normal!
N. S., Tinipong Bansa
Tulo ka tuig kanhi nga ang akong inahan, ug tulo ka bulan kanhi nga ang akong amahan, namatay. Bisan tuod segurado ang paglaom sa pagkabanhaw, ang pagkabulag nga gipahinabo sa kamatayon masakit gihapon. Ang inyong artikulo nagpalihok kanako nga isentro pag-ayo ang pagtagad diha sa paglaom sa Gingharian ug padayong mag-alagad sa Diyos nga matinumanon.
K. S., Hapon
Namatay ang akong amahan niadtong miaging bulan. Walay mga pulong nga ikabatbat sa kaguol sa usa ka anak babaye. Ang inyong artikulo tukma gayod sa panahon ug nakatabang kanako nga dili moangka, bisan pa sa kasakit nga akong gibati.
A. P. L., Brazil
Mga Kartuning Buot ko kamong pasalamatan sa artikulong “Makadaot ba ang Mapintas nga mga Kartuning sa TV?” (Disyembre 8, 1993) Ako otso anyos ug nagtan-awan ako niadto niining maong mga kartuning. Apan sa dihang nabasa nako ang inyong magasin, akong naamgohan nga ang maong mga kartuning dili maayo, ug karon wala na ako motan-aw niana.
L. T., Italya
Bag-ong Panahon Bag-o lang nakong natapos pagbasa ang Marso 8, 1994, nga Pagmata! bahin sa “Ang Bag-ong Panahon—Moabot ba Kini?” Nalangkit ako sa mga grupo nga nagapalandong, sa pagpauswag sa kaugalingon, ug sa mind dynamics sa ulahing bahin sa katuigang 1960 ug sayo sa katuigang 1970. Nangita ako sa usa ka butang nga motagana sa akong mga panginahanglan apan wala makakaplag niana. Unya ang akong asawa nakigkita sa mga Saksi ni Jehova, ug ako milingkod ug namati sa usa ka pagtuon nga gihimo sa akong asawa ug sa mga Saksi ni Jehova. Nakaplagan nako ang kamatuoran! Nabawtismohan ako ug karon nakapribilehiyo sa pag-alagad ingong misyonaryo dinhi sa Ghana. Salamat niining magasina. Adunay daghan pa nga nangita usab sa usa ka butang.
D. D., Ghana
Bisan tuod ang Bag-ong Panahon nga kalihokan maoy usa ka sangkad nga ulohan, inyong gikobrehan ang lainlaing mga bahin niana diha sa makapainteres nga paagi sa diyutay lang kaayong mga pulong! Giapresyar nako kon giunsa ninyo paglain kadtong mga butang nga nalangkit sa Bag-ong Panahon nga kalihokan nga dili kay dili kasulatanhon sa ilang kaugalingon, sama sa panglawas, musika, ug mga butang sa kalikopan. Ang serye gisulat sa sensitibong paagi aron dili makapasakit nga wala-kinahanglana, apan wala kana maglikay sa pagsulti sa tin-awng mga kamatuoran nga kinahanglang madunggan sa mga tawo. Ang akong igsoong babaye interesado sa mga pilosopiya sa Bag-ong Panahon, ug padad-an ko siya ug kopya niining isyuha.
R. H., Tinipong Bansa
Pag-init sa Yuta Nagsulat ako ingong reaksiyon sa kahon nga “Pag-init sa Yuta ug ang Malarya,” nga migula maylabot sa seryeng “Kalibotan nga Walay Sakit—Posible Ba?” (Disyembre 8, 1993) Ako usa ka siyentipiko nga nagtrabaho diha sa natad sa ekolohiya, ug nagakalisod ang pagpangahas nga barogan ang isyu bahin sa pag-init sa yuta. Tinuod nga ang nagauswag nga temperatura mahimong dahomon nga may epekto diha sa tanang matang sa mga komunidad sa mga mananap. Apan kon kaha naglungtad o wala ang pag-init sa yuta, lisod kaayong maneguro. Ang panukiduki nga ginahimo anaa sa usa ka peligroso kaayong estadistikanhong pasukaranan. Ang pipila ka siyentipiko nagtuo gani nga ang nagauswag nga lebel sa carbon dioxide sa atmospera sa pagkatinuod magpabugnaw sa nawong sa yuta!
K. O., Inglaterra
Ang teoriya sa pag-init sa yuta gihisgotan pag-ayo sa among Septiyembre 8, 1989, nga isyu, ug tinuod nga kana may pagkakontrobersiyal. Busa ang among mubong artikulo dili usa ka pagpaluyo niining maong teoriya kondili usa ka balidong pasidaan kon unsay mahitabo kon ang pag-init sa yuta aktuwal nga mahitabo.—ED.