Mga Batan-on Nangutana . . .

Nganong Maghisgot Bahin sa Diyos?

“Ang tanan adunay iyang kaugalingong relihiyon. Dili nimo angay pugson ang uban sa pagtuo sa imong ideya bahin sa Diyos.”​—14-anyos nga si Racish, Guyana.

“Nagpanuko akong makighisgot bahin sa Diyos tungod kay maulaw ako nga biaybiayon.”​—17-anyos nga si Rohan, Guyana.

“Kinahanglang hisgotan nato ang Diyos tungod kay siya ang atong Maglalalang ug utang nato kaniya ang atong kinabuhi.”​—13-anyos nga si Marco, Alemanya.

PAMATIAG maayo ang panag-estoryahay sa usa ka grupo sa mga batan-on ug malagmit makasulti ka niining makapasubong konklusyon: Kasagaran, ang Diyos tinong dili popular nga ulohan sa panagkabildohay sa mga batan-on. Paghisgot ug isport, sinina, kinaulahiang mga pelikula, o ang kaatbang nga sekso ug kasagarang makasugod ka ug bibong panagkabildohay. Hinunoa, sulay daw paghisgot bahin sa Diyos ug mokalit lang dayon ug kahilom ingon sa daw may mihaklap nga mabagang gabon.

Ang ubang batan-on yanong dili motuo sa Diyos. Tingali sila mangatarongan nga sanglit dili sila makakita kaniya, wala gayod siya maglungtad​—ang paghisgot bahin kaniya daw pag-usik lang ug panahon. Bisan pa, tinong diyutay ra ang ateyista taliwala sa mga batan-on. Sumala sa surbi sa Gallup, mga 95 porsiento sa mga batan-on sa T.B. nagtuo sa Diyos. Sa pagkamatuod, miingon si Gallup: “Ang Diyos sumala sa pagsabot sa daghang batan-on dili maoy usa ka hanap lisod-sabton nga prinsipyo, kondili maoy usa ka personal nga Diyos nga makakita sa ilang mga lihok ug moganti o mosilot kanila sumala sa ilang binuhatan.” Nan, nganong daghan kaayong batan-on ang nanukong makighisgot sa ilang pagtuo?

Kon Nganong ang Pipila Nagpugong

Daghan ang nagtuo nga dili maayong pamatasan ang paghisgot bahin sa mga pagtuo ug mas maayong itago na lang sa kaugalingon ang relihiyosong mga hunahuna. Ang ubang mga batan-on daw maulaw bisan sa paghunahuna sa paghisgot bahin sa Diyos. ‘Dili gayod kini maayong hisgotan tali sa mga batan-on,’ sila mangatarongan.

Bisag unsa ang hunahuna sa imong mga higala, unsay imong baroganan niining isyuha? Kining pangutanaha hinungdanon ilabina kon gimatuto ka ingong usa sa mga Saksi ni Jehova. Ngano? Tungod kay ang pagpamatuod, ang pagsulti ngadto sa uban bahin sa Diyos, mao ang dugokan mismo sa maong pagtuo!​—Isaias 43:9, 10; Mateo 24:14.

Bisan pa, kay nawad-ag kadasig tungod sa kasuko nga usahay ilang maatubang, ang ubang batan-ong mga Saksi dili makigbahin sa buluhatong pagsangyaw sa publiko​—o nakigbahin lamang tungod sa pag-agda sa ilang mga ginikanan. Ang uban nakigbahin nianang buluhatona apan sa tago nanghinaot nga walay makakita kaniya nga mga higala sa eskuylahan. Sa eskuylahan, gitago sa uban ang ilang relihiyosong mga pagtuo. Kasagaran tungod kini kay nahadlok sila nga biaybiayon sa mga kauban sa klase. “Nahadlok ako nga makighisgot bahin sa Diyos,” miangkon ang batan-ong si Ryan, “tungod kay bugalbugalan ako sa akong mga kauban sa klase ug wala akoy kaisog sa pagpadayon sa panagkabildohay.”

Unya adunay uban nga nagpugong usab tungod kay nahadlok nga dili sila bug-os makaabot sa pagkinabuhi sa mga sukdanan sa Bibliya. Sanglit nadani sa “mga tinguha nga iya sa pagkabatan-on,” sila nangatarongan nga mas maayo pang dili sila magpaila ingong mga Kristohanon ingkaso makahimo silag daotan.​—2 Timoteo 2:22.

Ang uban dili maghisgot bahin sa Diyos tungod kay gibati nila nga kulang sila ug katakos. Mao kini ang giingon sa disenuybe anyos nga si Wilton: “Nalisdan ako paghisgot bahin sa Diyos ngadto sa akong mga kauban sa trabaho tungod kay gibati ko nga dili ako makadepensa sa mga butang nga akong isulti bahin kaniya. Gibati ko nga kon pangutan-on nila ang akong mga pagtuo, dili ako makatubag ug maayo.”

Usa ka Kristohanong Obligasyon

Dili ba kaha nga ikaw nagpugong sa paghisgot bahin sa Diyos tungod sa samang mga katarongan? Kon mao, wala ka mag-inusara. Ang ubang batan-on nakigbisog batok sa samang mga pagbati. Hinuon, daghan ang nakasabot nga, bisan pa sa tanang butang nga makaluya kanila sa paghimo niana, adunay kusganong mga katarongan sa pagpakighisgot bahin sa Diyos. Unsa ang pipila niini?

Maayong pagkapahayag kini sa batan-ong si Marco, nga gihisgotan sa sinugdan, sa dihang siya miingon nga ang Diyos “maoy atong Maglalalang ug utang nato kaniya ang atong kinabuhi.” (Pinadayag 4:11) Oo, ang kinabuhi maoy usa ka bililhong gasa. Ang salmista nag-ingon bahin sa Diyos: “Kanimo anaa ang tuboran sa kinabuhi.” (Salmo 36:9) Kay nakadawat niining maong gasa, dili ba angay nga ipakita nimo ang imong pasalamat niana?

Ang usa ka paagi sa pagpakita ug pagkamapasalamaton mao ang pagdayeg kang Jehova nga Diyos sa atubangan sa uban. Siya ang Gigikanan sa adlaw, sa bulan, sa ulan, sa hangin nga atong ginahanggab, ug sa pagkaon nga atong ginakaon. (Buhat 14:15-17) “Ang matag maayong gasa ug matag hingpit nga hatag maoy gikan sa itaas,” matud pa sa tinun-ang si Santiago. (Santiago 1:17) Gipasalamatan ba nimo ang Diyos niining mga gasaha? (Colosas 3:15) Aduna pa bay mas maayong paagi sa pagpahayag sa imong mga pasalamat kay sa pagpakighisgot bahin sa Diyos?​—Lucas 6:45.

Sa pagkamatuod, ang Diyos nagsugo kanato sa pagsulti bahin kaniya. Ang iyang Anak, si Jesu-Kristo, nagsugo sa mga Kristohanon: “Busa panglakaw kamo ug paghimog mga tinun-an sa katawhan sa tanang kanasoran.” (Mateo 28:19, 20) Ang mga batan-on wala mahigawas sa responsibilidad sa pagpakigbahin niining buluhatona. Ang salmista nagsugo: “Dayega si Jehova . . . kamong batan-ong mga lalaki ug kamo usab nga mga ulay, kamong tigulang nga mga lalaki uban sa batang mga lalaki. Padayega sila sa ngalan ni Jehova, kay ang iyang ngalan lamang ang hataas uyamot. Ang iyang himaya labaw sa yuta ug langit.” (Salmo 148:7, 12, 13) Apan ayawg tan-awa kining buluhatona nga usa ka palas-anon. Sa pagkamatuod, usa kini ka pribilehiyo​—mahimo ka gayod nga usa “sa mga isigkamamumuo sa Diyos.”​—1 Corinto 3:9.

Komosta kon gibati gayod nimo nga dili kuwalipikado? Ingon usab niana ang gibati ni propetang Jeremias sa panahon sa Bibliya. “Oh, Soberanong Ginoong Jehova!” siya miingon. “Ania karon sa pagkamatuod ako dili mahibalo nga mosulti, kay ako usa lamang ka bata.” Unsay tubag ni Jehova? “Ayaw pag-ingon, ‘Ako usa lamang ka bata.’ Kay kang bisan kinsa ikaw paadtoon ko, ikaw moadto; ug bisan unsa nga isugo ko kanimo, igasulti mo.” (Jeremias 1:6, 7) Uban sa tabang ni Jehova gihimo gayod kana ni Jeremias sulod sa 40 ka tuig!

Mao usab sa mga Kristohanon karong adlawa, ‘ang atong pagkaigong kuwalipikado nagagikan sa Diyos.’ (2 Corinto 3:5) Bisan kon kinaiya mo nga maulawon, hilomon, ang Diyos makatabang kanimo sa pagbaton ug kaisog sa pagsulti. Sulod sa Kristohanong kongregasyon adunay mga tagana nga makatabang kanimo nga mahimong ‘mas igong kuwalipikado’ ingong magtutudlo sa Pulong sa Diyos. Kon gibati nimo nga nagkinahanglan kag pila ka personal nga tabang, nganong dili makigsulti sa usa sa mga magtatan-aw sa kongregasyon? Basin ang gikinahanglan mo lang mao ang paghimog usa ka programa sa personal nga pagtuon sa Bibliya o makig-uban sa usa nga mas eksperyensiyado.

Kon Unsay Imong Mahimong Himoon

Ang pagpakigsulti bahin sa Diyos makahatag kanimo ug tinuod nga pagbati sa kalamposan. Sa usa ka katarongan, daghan sa imong mga higala nagapangitag mga tubag sa mga problema sa kinabuhi, nga nanginahanglan gayod ug tabang. Sila kulang ug pagtultol ug walay klarong panan-aw sa umaabot. Sila nangutana, ‘Nganong ania kita dinhi? Asa kita paingon? Nganong puno kaayog suliran ang kalibotan?’ Ingong usa ka Kristohanon, aduna kay mga tubag, ug malagmit anaa ka sa mas maayong kahimtang sa pagpahayag sa maong kahibalo ngadto sa imong mga higala. Sanglit pareho kamog edad, mas andam silang makigsulti kanimo kay sa usa ka hamtong.

Tinuod, usahay makaatubang ka ug pagsalikway. Apan makakita ka usab ug mga tawo nga modawat sa mensahe sa Bibliya. Usa ka batan-ong Saksi naglingkod sa usa ka bus nga nagbasa sa iyang personal nga kopya sa librong Mga Pangutanang Gisukna sa mga Batan-on​—Mga Tubag nga Mosaler.a Usa ka batang lalaki nga naglingkod tapad kaniya misugod sa pagbasa uban kaniya. “Pagkanindot niining libroha!” miingon ang batang lalaki. “Pagkadaghang gihisgotan niining libroha bahin sa Diyos. Kadaghanan sa mga tawo dili interesado sa relihiyon.” Gipahimuslan sa batan-ong Saksi kining higayona sa dugang paghisgot bahin sa ngalan sa Diyos.

Tinuod, sa dihang imong ipailaila ang imong kaugalingon ingong usa ka Kristohanon, obligado ka nga mogawi sa ingon. (1 Pedro 2:12) Apan ang maayong Kristohanong panggawi makadugang sa pagkahimong tinuod sa imong mensahe. Tagda ang kasinatian sa usa ka batan-on nga ginganlag Eric. Nakadayeg siya sa maayong panggawi sa batan-ong mga Saksi sa iyang eskuylahan. Kini nakapukaw sa iyang interes sa pagtuon ug dugang pa bahin sa Diyos. Nasugdan ang usa ka pagtuon sa Bibliya uban kaniya, ug karon siya usa na ka bawtismadong Kristohanon nga nag-alagad sa hedkuwarter sa kalibotan sa mga Saksi ni Jehova sa New York.

Ang pagpakigsulti bahin sa Diyos makatabang usab kanimo! Mahimo usab kining usa ka panalipod. Kon mahibalo ang imong mga kauban nga ikaw usa sa mga Saksi ni Jehova, tahoron ka sa kadaghanan. Tingali dili ka na nila pugson sa pagpakigbahin sa paghimog daotan sa dihang mamatikdan nila nga ikaw adunay hataas nga mga sukdanan sa pamatasan ug nahibalo nga malagmit sangyawan hinuon nimo sila agig pagsanong.

Siyempre, wala kini magpasabot nga sa matag panahong mosulti ka kinahanglang mokutlo ka ug mga teksto. Ikapakita mo gihapon ang imong interes sa mga isport, mga sinina, o musika ug gustong makig-estorya bahin niining mga butanga matag karon ug unya. Apan timan-i: “Gikan sa kadagaya sa kasingkasing ang baba mosulti.” (Mateo 12:34) Kon ang gugma sa Diyos anaa gayod sa imong kasingkasing, natural lamang nga gusto nimong makigsulti bahin kaniya. Sa umaabot nga isyu, among hisgotan ang pila ka paagi nga mahimo nimo kini nga epektibo.

[Footnote]

[Picture on page 15]

Maulaw ka ba nga makit-an sa imong mga kauban sa eskuylahan kon ikaw nagapakigbahin sa buluhatong pagsangyaw sa publiko?