Mga Misyonaryo—Angay Unsa Unta Sila?

ANG pulong “misyonaryo” makapukaw ug kusganong mga pagbati. Sa pipila ka tawo, kini nagadasig ug pagdayeg, nga nagapahinumdom sa mga indibiduwal sama kang Mother Teresa o kang anhing Albert Schweitzer.

Sa kasukwahi, ang reaksiyon sa uban mao ang kawalay kaikag, kapungot, o gani kasuko sa dihang hisgotan ang mga misyonaryo. Alang kanila ang pulong misyonaryo nagpasabot ug mental nga pagmaneobra ug nagapukaw sa mga handumanan sa kolonyalismo.

Bahin sa mga misyonaryo, ang haom nga pangutana mao, Sila ba mga ahente sa kahayag o mga ahente sa kangitngit?

Unsay Misyonaryo?

Ang misyonaryo gihubit ingong “usa ka tawong adunay misyon,” o sa laing pagkasulti, nagahimo ug “usa ka ministeryo nga gisugo sa usa ka relihiyosong organisasyon aron ipakaylap ang pagtulon-an niini o himoon ang makitawhanong buluhaton.”

Ang pasikaranan sa Kristohanong misyonaryong buluhaton gipahiluna ni Jesu-Kristo sa dihang gisugo niya ang iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran.” Kini nagkinahanglan sa pagwali sa Kristohanong mensahe sa tibuok kalibotan.​—Mateo 28:19.

Si Jesus mismo usa ka misyonaryo, nga gipadala sa iyang Amahan, si Jehova, gikan sa langit ngadto sa usa ka langyaw nga asaynment, ang yuta. (Filipos 2:5-8) Makataronganon, ang usa ka Kristohanong misyonaryo kinahanglang mosunod pag-ayo sa panig-ingnan nga gipakita ni Jesu-Kristo. Usa ka unang-siglong misyonaryo nga ingon gayod niana ang gibuhat mao si apostol Pablo, nga nahimong modelo aron sundogon sa nagsunod nga Kristohanong mga misyonaryo.​—1 Corinto 11:1.

Bisan tuod mabination sa sosyal nga mga suliran nga nagsakit sa katawhan, wala kana unaha ni Jesus pagsulbad samtang dinhi pa sa yuta. Ang paghimo niadto magpahinabo lamang ug temporaryong kahupayan. (Juan 6:26, 27; 12:8) Aduna pay laing butang nga labawng importante. “Tungod niini ako gipakatawo, ug tungod niini ako mianhi sa kalibotan,” giingnan ni Jesus si Pilato, “aron ako manaksi sa kamatuoran.” Ang bili sa pagkabaton ug kahibalo bahin sa maong kamatuoran kinahanglang ipasiugda ug maayo, ingon sa gisulti ni Jesus una niana sa pag-ampo: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3; 18:37.

Ang mga misyonaryo ba sa Kakristiyanohan nakasundog pag-ayo sa panig-ingnan nga gipakita ni Jesus? Napamatud-an ba nila nga sila mga ahente sa kahayag sama kaniya, nga nagabanaag sa kahayag sa Pulong sa Diyos, diin ang kahibalo niana motultol ngadto sa kinabuhing walay kataposan? O ila bang gibiyaan ang mga tawo diha sa kangitngit? Ang tubag niining mga pangutanaha angay nga makapainteres kanatong tanan tungod kay ang bunga nga napatungha sa nag-angkong Kristohanong mga misyonaryo latas sa kasiglohan makabulig kanato sa pag-ila sa tinuod nga relihiyon, maingon man sa bakak nga relihiyon. Mao nga ang Pagmata! nalipay sa pagpahibalo nga kining maong ulohan kobrehan niini sa bug-os sa mosunod nga lima ka isyu.

Nakab-ot ba sa mga Misyonaryo ang mga Sukdanan?

Ang mga misyonaryo nakahimog bililhong tabang sa pagpakaylap sa mensahe ni Kristo. Pananglitan, ang pipila nakahubad sa Bibliya ngadto sa lokal nga mga pinulongan, sa ingon nakapaarang sa mga tawo sa pagbasa niini sa ilang kaugalingon.

Ugaling, karong adlawa, mopatim-aw nga ang pipila ka misyonaryo mibati nga ang pagtagana sa sosyal nga mga panginahanglan angay nga isipon nga mas importante kay sa mga paningkamot sa pagwali o paghubad. Usa ka artikulo sa Time nga magasin nga nag-ulohang “Ang Bag-ong Misyonaryo” nag-ingon: “Taliwala sa mga Protestante, nausab ang pagtagad ngadto sa mas aktibong pagkalangkit sa paninugdang ekonomikanhon ug sosyal nga mga suliran sa katawhang gisulayan sa pag-abot sa mga misyonaryo.” Kon bahin sa mga Katoliko, ang pangulo sa mga misyong Heswita nga gipadala gikan sa Tinipong Bansa nag-ingon nga ang pagpakig-ambit sa Kristohanong mga pagtulon-an “nahimong ikaduhang dapit sa pag-alagad sa katawhan.” Ug ang usa ka kalihim sa Katolikong misyon nangatarongan: “Kaniadto, ang among tumong gitawag nga pagluwas sa mga kalag. . . . Karon, salamat sa Diyos, kami nagtuo nga ang tanang tawo ug tanang relihiyon nagakinabuhi na sa grasya ug gugma sa Diyos ug pagaluwason sa kaluoy sa Diyos.”

Kini ba nagkahulogan nga dili na kinahanglang itudlo ang Pulong sa Diyos sama sa gihimo ni Jesus?

Aduna pa bay Panginahanglan?

Niadtong 1985 mga 18,000 ka panimalay sa Hamburg, Alemanya, gitawagan sa telepono sa gatosan ka boluntaryo sa gitawag sa usa ka mantalaan ug “tiningob nga pagmisyonaryo pinaagi sa telepono.” Dayag nga kini diyutayg resulta. Sa miaging Disyembre ang The European misulat: “Ang Protestanteng simbahan sa Alemanya . . . nakasinatig pag-us-os sa gidaghanon sa tigsimba nga kapin sa 500,000 sukad niadtong 1991.”

Ang nagakunhod nga gidaghanon sa membro wala lamang mahitabo sa mga simbahan sa Alemanya. Minilyong katawhan sa tibuok kalibotan ang mitalikod sa relihiyon, nga wala na mag-isip niini nga kinahanglanon sa kinabuhi sa reyalistikong kapanahonan sa katuigang 1990. Apan ang kahibalo bahin sa Kristiyanidad hinungdanon aron kita magmalamposon sa pag-atubang sa kangitngit sa kalibotan karon ug aron mapalig-on pinaagi sa paglaom sa usa ka mas maayong kalibotan sa umaabot. Ang sugo ni Jesus sa paghimog mga tinun-an sa katawhan sa tanang kanasoran maoy usa ka balidong paagi sa pagtagana sa usa ka dinaliang panginahanglan.

Katuyoan ni Jesu-Kristo nga ang Kristohanong mga misyonaryo mahimong mga ahente sa kahayag, dili mga ahente sa kangitngit. Nakab-ot ba sa mga misyonaryo sa Kakristiyanohan ang sukdanan? Unsang sumbanan ang ilang gisunod?

[Picture Credit Line sa panid 3]

Culver Pictures