Mga Misyonaryo mga Ahente sa Kahayag o sa Kangitngit?—Bahin 6

Paghimog Tinuod nga mga Disipulo Karong Adlawa

SI Jesu-Kristo nagsugo: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila.” (Mateo 28:19) Matud sa Everyman’s Encyclopedia nga kining maong sugo “gituman sa mga Kristohanon sa matag kapanahonan,” apan kini midugang, “usahay uban lamang sa diyutayng kadasig.” Ang librong The Missionary Myth misukna: “Natapos na ba ang kapanahonan sa pagmisyonaryo?”

Niadtong Enero niining tuiga, ang magasing Newsweek nagtaho: “Gidala ni Papa Juan Paulo II ang Romano Katolisismo ngadto sa kadalanan.” Ang magasin nagpatin-aw: “Nagpadala siyag 350 ka laykong mga ebanghelisador aron mangabig diha sa mga diskohan, sa mga supermarket ug sa mga estasyon sa tren sa ilalom sa yuta sa Roma. Ang eksperimentong programa gisugdan sa Miyerkoles Tingbadlis (Peb. 16). Kon kini molampos, mopadala ang papa ug mga ebanghelisador sa tibuok kalibotan​—usa ka aksiyon nga mohimo unta sa Katolikong mga misyonaryo nga moduaw sa balay ug balay gikan sa Buenos Aires ngadto sa Tokyo.”

Sa laing bahin, kaniadto pa nasabtan sa mga Saksi ni Jehova ang ilang obligasyong mag-ebanghelyo. (2 Timoteo 4:5) Tinuod, dili tanan ang nagwali ingong mga misyonaryo sa langyawng mga nasod. Apan sila makahimo​—ug ilang ginahimo​—ang pagwali bisan asa sila. Niining maong diwa, silang tanan mga misyonaryo.

Usa ka Espesyal nga Matang sa Tunghaan

Sa sayong bahin sa katuigang 1940, ang Watch Tower Society nagtukod ug usa tunghaan sa pagbansay sa eksperyensiyadong mga ministro aron moalagad ingong mga misyonaryo sa langyawng kayutaan diin dinaliang gikinahanglan ang tabang. Latas sa katuigan ang mga leksiyon gibag-o, apan wala gayod kini mosimang gikan sa panguna niining tumong nga mao ang pagpasiugda sa pagtuon sa Bibliya ug aron tumanon ang importanteng buluhaton nga pag-ebanghelyo.

Ang napiling ngalan alang sa bag-ong tunghaan maoy Gilead, nga sa Hebreohanon nagkahulogan ug “Pundok sa Saksi.” Sa pagtabang sa pagtapok ug usa ka pundok sa saksi alang sa kadungganan ni Jehova, ang Gilead nakadula ug hinungdanon kaayong papel sa pagtuman sa tibuok kalibotang pagwali nga buluhaton nga gitagna ni Jesus nga mahitabo sa atong adlaw.​—Mateo 24:14.

Midiskurso atubangan sa unang klase sa Tunghaang Gilead niadtong 1943, si Nathan H. Knorr, ang presidente kaniadto sa Watch Tower Society, miingon: “Kamo gihatagan ug dugang pagpangandam alang sa buluhaton nga susama sa kang apostol Pablo, Marcos, Timoteo, ug uban pa kinsa mibiyahe sa tanang bahin sa Empiryo sa Roma nga nagamantala sa mensahe sa Gingharian. . . . Ang inyong pangunang buluhaton mao ang pagwali sa ebanghelyo sa Gingharian gikan sa balay ngadto sa balay sama sa gihimo ni Jesus ug sa mga apostoles.”

Sa dihang nahuman ang pagbansay sa unang saring, ang mga graduwado niini gipadala ngadto sa siyam ka nasod sa Latin Amerika. Sa pagkakaron, kapin na sa 6,500 ka estudyante gikan sa kapin sa 110 ka nasod ang nabansay sa Tunghaang Gilead ug gipadala ingong mga misyonaryo ngadto sa kapin sa 200 ka kayutaan ug mga kaislahan.

Laing Matang sa mga Misyonaryo

Ang unang mga artikulo niining maong seryal naghisgot bahin sa kalihokan sa mga misyonaryo sa Kakristiyanohan sa miagi. Daghan, sama niadtong gipadala sa Greenland, ang naghubad sa Bibliya o mga bahin niini ngadto sa lokal nga pinulongan. Apan, ang maong unang mga misyonaryo sagad may mga interes gawas sa pagtudlo sa mga tawo sa Bibliya.

Pananglitan, ang mga misyonaryo sa Kakristiyanohan sa Hapon nalangkit sa “edukasyonal nga mga institusyon ug mga tunghaan,” nagkanayon ang Kodansha Encyclopedia of Japan. Kini nag-ingon: “Daghang misyonaryo ang nahimong ilado pinaagi sa ilang pagkaiskolar.” Sila nahimong batid sa mga pinulongan o mga propesor, nga nagtudlog mga leksiyon sama sa literatura, pinulongan, kasaysayan, pilosopiya, mga relihiyon sa Sidlakang Asia, ug mga kasugiran sa Hapones. “Ang mga institusyon sa hinabang ug sosyal nga kaayohan maoy hinungdanong bahin usab sa misyonaryong buluhaton,” midugang ang ensiklopedia.

Ang pagwali sa ebanghelyo wala hatagig pangunang pagtagad sa mga misyonaryo sa kinatibuk-an. Kasagaran ilang gipasiugda ang pagtagbaw sa pisikal inay ang espirituwal nga mga panginahanglan. Ang pagpangagpas sa personal nga mga interes maoy ilang gitagad. Mao nga, ang usa ka misyonaryo sa Church of England nga gipadala sa Hapon niadtong 1889 sa pagkakaron mas naila ingong ang “amahan sa isport nga pagkatkat ug bukid sa Hapon.”

Ang nabansay-sa-Gilead nga mga misyonaryo dakog kalainan gikan niadtong sa Kakristiyanohan. Ang librong Mga Saksi ni Jehova​—Mga Magmamantala sa Gingharian sa Diyos, sa kapitulo 23, nagpahayag: “Ang mga misyonaryo nga graduwado sa Tunghaang Gilead nagtudlog Bibliya sa mga tawo. Inay magtukod ug mga simbahan ug magdahom nga ang mga tawo moduol kanila, sila nagduaw gikan sa balay ngadto sa balay . . . , dili aron pagaalagaran, apan aron moalagad.”

Unsay Nahimong Bunga?

Human sa mga siglo nga paghimog Kristohanong mga tinun-an sa Uropa, unsa ka malamposon ang mga misyonaryo sa Kakristiyanohan? Ang librong A Global View of Christian Missions nagatubag: “Ang gibanabanang 160 ka milyong tawo sa Uropa wala mangangkong sakop sa bisan unsang relihiyon. Taliwala niadtong nangangkong sumusunod gihapon sa Kristiyanidad pipila lang ang seryoso sa ilang relihiyon. . . . Dili gayod tinuod nga ang Uropa pagatawgong usa ka Kristohanong kontinente.”

Unsay ikasulti bahin sa kahimtang sa Asia? Ang Kodansha Encyclopedia of Japan nagatubag: “Ang opinyon sa katawhan mao nga ang Kristiyanidad giila gihapon ingong usa ka ‘langyawng’ tinuohan, . . . nga dili angay alang sa ordinaryong katawhang Hapones. . . . Ang Kristohanong kalihokan nagpabilin diha sa ngilit sa katilingbang Hapones.” Sa pagkatinuod, sa Hapon wala pay 4 porsiento sa mga tawo ang nangangkong mga Kristohanon, sa India wala pay 3 porsiento, sa Pakistan wala pay 2 porsiento, ug sa Tsina wala pay 0.5 porsiento.

Human sa mga siglong kalihokan sa misyonaryo sa Kakristiyanohan sa Aprika, unsay kahimtang didto? Sa usa ka taho bahin sa tigom sa mga obispo sa Aprika nga gihimo niining tingpamulak sa Roma, ang Alemang magasin nga Focus nagtaho: “Ang mga relihiyon sa Aprika dili na mahukman ingong paganong idolatriya. Ang opisyal, apan wala pa iluwat, nga dokumento nagbutang sa ‘tradisyonal nga mga relihiyon sa Aprika’ sa ang-ang nga takos ug importanteng mga kaparis. Ang ilang mga membro takos pagatamdon. Ang konsilyo miila nga ang mga relihiyon nga kaniadto gihukman ingong nagtuo sa mga anting-anting ‘sagad nagagahom sa estilo sa kinabuhi sa bisan labing kombinsidong Katoliko.’”a

Human makagugol ug mga siglo sa paghimog Kristohanong mga tinun-an sa kayutaan sa Amerika, unsa ka malamposon ang mga misyonaryo sa Kakristiyanohan? Ang librong Mission to the World nagtubag: “Ang ‘Latin Amerika’ takos gihapon sa titulong ‘ang napasagdan nga kontinente’ bisan pa sa dakong pag-uswag sa misyonaryong kalihokan niining ulahing mga dekada.” Bahin sa Tinipong Bansa, ang Newsweek nagpahayag nga ang ulahing mga surbi “nagpadayag nga samtang mikaylap ang relihiyon sa yuta sa Amerika, diyutay lamang ang seryosong nagtagad niini. . . . Katunga sa mga tawo nga nagsulti sa mga tigsurbi nga sila nagsimba kon Dominggo wala magtug-an sa tinuod. . . . Hapit un-tersiya sa mga Amerikano nga 18 anyos ug kapin pa dunay bug-os sekular nga panglantaw . . . Disenuybe porsiento lamang . . . ang regular nga nagatuman sa ilang relihiyon.”

Sa pagsumaryo, sa ilang mga paningkamot nga mamenosan ang mga suliran sa kawalad-on, dili maayong panglawas, ug kakulang sa edukasyon, ang mga misyonaryo sa Kakristiyanohan, ingong usa ka grupo, nagpaluyo sa tawhanong mga laraw nga sa kinamaayohan niini naghatag lamang ug temporaryo ug diyutayng kahupayan. Ang tinuod Kristohanong mga misyonaryo, sa laing bahin, nagtultol sa mga tawo ngadto sa natukod nga Gingharian sa Diyos, nga maoy modala sa dumalayon ug hingpit nga kahupayan. Dili lamang mamenosan niini ang mga suliran; kini mosulbad niini. Oo, ang Gingharian sa Diyos modala sa katawhan ug hingpit nga panglawas, tinuod nga kasegurohan sa ekonomiya, walay kataposang kahigayonan sa mabungahong buluhaton alang sa tanan, ug kinabuhing walay kataposan!​—Salmo 37:9-11, 29; Isaias 33:24; 35:5, 6; 65:21-23; Pinadayag 21:3, 4.

Tingali ang mga misyonaryo sa Kakristiyanohan mopunting ngadto sa nangangkong mga Kristohanon kinsa motambong panalagsa sa relihiyosong mga serbisyo ingong pamatuod nga sila nakahimog “mga tinun-an sa katawhan sa tanang kanasoran, nga nagbawtismo kanila.” Apan ang mga kamatuoran nagpakita nga kining maong mga misyonaryo napakyas sa pagtudlo niining mga bawtismado ‘sa pagtuman sa tanang mga butang nga gisugo ni Jesus.’​—Mateo 28:19, 20.

Hinunoa, ang kalihokang pagpanudlo sa matuod nga mga Kristohanon magpadayon ngadto sa bag-ong kalibotan sa Diyos. Kini mokaylap aron maabot ang milyonmilyong binanhaw nga kinahanglang tudloan sa mga dalan sa Diyos. Dayon, nga walay satanikong pagsalga, ang mga Kristohanon makabaton ug makalilipay nga pribilehiyo nga magpadayon sa paghimog mga tinun-an​—sama sa ilang ginahimo sulod sa mga dekada.

[Footnote]

[Kahon sa panid 24]

Kon sa Unsang Paagi Sila Nakatabang sa mga Tawo

Ang mosunod maoy mga komento niadtong nakabaton ug kaayohan gumikan sa tabang sa nabansay-sa-Gilead nga mga misyonaryo.

“Nahingangha ako sa ilang pagkamalahutayon, sa pag-agwanta sa mga butang nga lahi kaayo gikan sa ilang yutang natawhan: klima, mga pinulongan, mga kustombre, pagkaon, ug mga relihiyon. Apan sila nagpabilin sa ilang mga asaynment, ang pipila hangtod gani sa kamatayon. Ang ilang maayong batasan sa pagtuon ug kainit sa pag-alagad nakatabang kanako sa pag-ugmad sa samang mga butang.” —J. A., India.

“Nakadayeg ako sa pagkauntop sa panahon sa misyonaryo nga nagdumalag pagtuon kanako. Nagpakita siyag talagsaong pagpugong sa kaugalingon sa pagsagubang sa akong mga pagpihig ug pagkawalay-hibangkaagan.”​—P. T., Thailand.

“Kami sa akong asawa nakadayeg sa kaputli nga gipakita sa mga misyonaryong Saksi. Ang ilang kalihokan nakaimpluwensiya kanamo sa paghimo sa bug-os panahong pag-alagad ingong among tumong, ug karon nalipay kami nga nahimong mga misyonaryo usab.”​—A. C., Mozambique.

“Ang akong kinabuhi nahimong makikaugalingon. Ang pagkahibalag sa mga misyonaryo nakahatag sa gikinahanglan nakong pagdasig sa pag-usab niana. Nakita ko kanila ang dili taphaw kondili tinuod nga kalipay.”​—J. K., Hapon.

“Ang mga misyonaryo sa Kakristiyanohan nagkinabuhig haruhay nga mga kinabuhi. Ang mga binatonan maoy manghinlo sa balay, magluto, manglaba, mag-atiman sa tanaman, ug momaneho. Nakuratan ako sa pagkakita sa mga misyonaryo sa Gilead nga episyenteng nagbuhat sa ilang kaugalingong buluhaton sa balay, samtang nagtabang usab sa lokal nga mga tawo sa pagkat-on bahin sa Gingharian sa Diyos.”​—S. D., Thailand.

“Ang mga misyonarya nagbisikleta aron maduaw ang mga tawo bisan pag miinit ang temperatura ngadto sa kapin sa 46 grado Celsius. Ang ilang pagkamaabiabihon ug pagkawalay pinalabi, ingon man sa ilang kamalahutayon, nakatabang kanako sa pagkaila sa kamatuoran.”​—V. H., India.

“Ang mga misyonaryo wala mobating mas labaw. Sila mapaubsanong nagpasibo sa lokal nga mga tawo ug sa dili maayong mga kahimtang sa pagkinabuhi. Sila mianhi aron moalagad, busa wala gayod sila magreklamo apan dayag nga kanunayng malipayon ug kontento.”​—C. P., Thailand.

“Wala nila sambogi ang kamatuoran sa Bibliya. Bisan pa niana, wala nila ipabati sa lokal nga mga molupyo nga sayop ang tanang bahin sa ilang tradisyonal nga kultura o nga kinahanglang sagopon nila ang mga paagi sa Kasadpan. Wala gayod nila ipabati sa uban nga sila ubos o walay katakos.”​—A. D., Papua New Guinea.

“Dili sama sa mga misyonaryo sa Kakristiyanohan, siya andam nga molingkod sa salog nga nagbanday ang mga tiil, estilo Koreano, samtang nagtuon kami sa Bibliya. Andam siyang motilaw sa among Koreanong mga pagkaon. Ang pagmahal nga akong gibati alang kaniya nakatabang kanako sa pag-uswag.”​—S. K., Korea.

“Diyes anyos ang akong edad ug mogawas sa tunghaan sa udto. Dapiton ako sa usa ka misyonaryo nga ubanan siya matag hapon sa pag-alagad sa kanataran. Gitudloan niya ako ug daghang prinsipyo sa Bibliya ug napasilsil kanako ang tinuod nga apresasyon alang sa organisasyon ni Jehova.”​—R. G., Colombia.

“Ila akong gitudloan nga magpabilin sa mga asaynment, nga himoon kon unsay gikinahanglan nga himoon nga walay reklamo. Gipasalamatan ko si Jehova ug si Jesu-Kristo gikan sa kinahiladman sa akong kasingkasing tungod sa pagpadala kanamo sa mga misyonaryo.”​—K. S., Hapon.

[Hulagway sa panid 23]

Nabansay-sa-Gilead nga mga misyonaryo gikan sa 16 ka nasod nag-asoy sa ilang mga eksperyensiya sa usa ka bag-o pang kombensiyon