Hoarfrost​—Kinsay Anaa sa Likod sa Pagkatahom Niini?

SA DIHANG ang hangin nga natuhop sa alisngaw sa tubig mabugnaw sa gabii, dili na kini makahawid sa tanang tubig. Ang sobrang tubig mahulog ingong yamog. Apan kon ang temperatura sa hangin mous-os pa ubos sa sukod sa pagyelo, ang sobrang tubig malunsay​—sa ato pa, laktawan niini ang yugto sa pagkahimong likidong yamog ug manibug-ok ingong yelo. Ang yelong mga kristal nga naporma daw plato ug kaamgid sa mga kristal nga yelo. Maipon diha sa mga bildo sa bintana sa mga balay, kini sila gikahibudngan tungod sa ilang maanindot nga geometriko ug lace nga mga desinyo. Tinuod gayod nga matahom.

Apan adunay laing mas maanindot nga mga porma sa yelong mga kristal nga nailhang hoarfrost. Kini sila maoy unom-ka-kilid nga haw-ang nga mga bangkaw nga yelo nga manuybo pataas, ug kon matigom sa gawas, kini sila mahimong maanindot nga mga pasundayag ug tukmang tawgong mga bulak nga yelo. Sayo sa usa ka masidlak nga buntag sa Yosemite National Park, California, kining mga bulak nga yelo nakit-ang nanuybo ibabaw sa mga bato diha sa katubigan sa Merced River nga nagaagay paingon sa Yosemite Valley. Maanindot usab kaayo, ug nagama sa pisikal nga mga balaod nga gitukod sa Maglalalang sa uniberso. “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”​—Pinadayag 4:11.