Yosemite National Park​—100 Anyos Na

ANG pagdrayb lang ngadto sa kabukiran gikan sa Merced, California, U.S.A. dili makaandam nimo sa kahibulongang talan-awon nga mosugat kanimo iniggawas sa tunil sa haywey. Dihadiha ikaw mahingangha sa gihabogon ug gidak-on sa Yosemite nga Walog, uban sa dagko kaayong mga bukid ug gansangong mga taluktok nga nangawankawan sa walog, nga sa kaugalingon maoy 1,200 metros ibabaw sa lebel sa dagat. Sa wala, ang El Capitan nagatuybo sa 1,100 metros; sa tuo mao ang tarongang Bridalveil nga busay, uban sa iyang 190 metros nga ambak; sa distansiya sa tuo mao ang dako kaayong bukid sa Half Dome, nga mopataas sa 2,698 metros. Kining talan-awona kalit kaayo ug matahom. Ang mga pulong mosantop sa alimpatakan: “Ang Bato [Jehova], hingpit ang iyang mga buhat.”​—Deuteronomio 32:4.

Milyonmilyong tawo gikan sa tibuok nga kalibotan nagapahimulos sa katahom ug kadako sa Yosemite National Park sukad nga gideklarar kini sa U.S. Congress niadtong 1890. Ingon kasayo sa 1864, ang Yosemite nga Walog gihatag sa Kongreso ngadto sa California ingong publikong parke. Karong adlawa, sa labing puliking panahon, ang mga tawo modagsa sa Yosemite. Apan kon ikaw gustog kamingaw, ikaw kanunay nga makaharong sa High Sierra ug lantawon ang bug-os nga talan-awon gikan sa tan-awanan sa usa ka agila.