Ang Pangagpas sa Materyal nga Kadagaya

SINULAT SA KORESPONSAL SA PAGMATA! SA TAIWAN

‘ANG salapi dili makapalit ug kalipay!’ Bisan tuod ang kadaghanang tawo kapin kun kulang mouyon sa maong pahayag, daghan kanila sa walay-hunong nagapangagpas gihapon ug materyal nga bahandi isip usa ka dalan ngadto sa mas malipayong kinabuhi. Ug nganong dili man? Kon buot sabton, mopatim-aw nga ang sulbad sa daghan kaayo sa mga suliran sa katawhan nahiluna sa materyal nga kalamposan ug kadagaya.

Handurawa lamang kon unsa ka lahi ang kalibotan kon ang matag lalaki, babaye, ug bata nagpahimulos sa kinabuhing may materyal nga kadagaya! Wala na unta ang mga kaulawan ug mga pag-antos sa minilyon nga nagpuyo sa mga barongbarong ug sa timawang mga dapit sa kalibotan. Wala na unta, usab, ang suliran sa pagkawalay-balay nga karon nagasakit sa matag nasod, dato ug kabos.

Ug komosta ang maayong panglawas, nga bililhon kaayo sa kalipay? Bisan pag kusog kaayo ang pag-uswag sa medikal nga siyensiya, mas daghan ug mas daghang tawo ang nakakaplag nga dili sila makaarang sa pagbayad sa medikal nga pag-atiman. Sa laing bahin, ang kagutmanan ug kakulang sa sustansiya mao gihapon ang matag-adlaw nga kasinatian sa minilyon. Kon ang kadagaya naglungtad pa sa tibuok kalibotan, ang tanan may higayon unta sa pagkinabuhig mas himsog, ug sa ingon mas malipayon, nga mga kinabuhi​—dili ba?

Bisan ang yuta mismo makabenepisyo. Sa unsang paagi? Ang kalikopan sa yuta karon ginadaot sa makamatayng makapahugaw nga mga substansiya, nga gipahinabo sa bahin sa pagsunog ug mga sugnod nga fossil. Bisan pa niana, usa ka katarongan nga gihisgotan sa dili pagsunod sa teknolohiya nga gikinahanglan aron magamit ang mas hinlong mga matang sa enerhiya mao nga labihan kini ka gastoso. Ang pagdaot sa bagang kalasangan, nga laing seryosong hulga sa ekolohiya, gipasangil usab ilabina sa ekonomikanhong mga hinungdan.

Sanglit ang materyal nga kadagaya maorag makasulbad sa atong daghan kaayong mga suliran ug makahupay sa tumang pag-antos, dili katingalahan nga dugay nang gilangkit sa mga tawo ang bahandi uban sa kalipay. Pananglitan, samtang ang mga taga-Kasadpan naandan nga motimbaya sa usag usa pinaagi sa pag-ingong “Malipayong Bag-ong Tuig!” sa Adlaw sa Bag-ong Tuig, ang mga Insek, panahon sa sumala-sa-bulan nga Bag-ong Tuig, sa naandan moingon nga “Kung hsi fa tsai” sa usag usa, nga nanghinaot nga sila ‘makaangkon ug bahandi!’ Oo, tino nga kita nagpuyo sa usa ka kalibotan diin ang katawhan mohatag sa pangagpas sa materyal nga kadagaya ug taas kaayo, kondili man kinatas-an, nga bili. Ang kalamposan o kapakyasan sagad gihukman sa gidaghanon sa materyal nga bahandi sa usa.

Bisan tuod ang pag-angkon ug pagpahimulos ug materyal nga mga butang dili gayod daotan sa kaugalingon, makagarantiya ba kini sa kalipay? Unsa ka dakong bili ang igahatag niana? Ang materyal nga kadagaya mao ba gayod ang yawi sa usa ka mas maayong kalibotan?