Mga Batan-on Nangutana . . .

Sa Unsang Paagi Nako Mapauswag ang Akong mga Ilisan?

SI Robert desperado! Motambongay siya sa kasal sa iyang igsoong babaye ug wala gayod siyay ikasul-ob. Wala magpasabot nga si Robert anaa sa gitawag sa Bibliya nga “hubo nga kahimtang.” (Santiago 2:15) Apan ang matag adlaw nga sinina ni Robert yanong dili igo alang niining pormal nga okasyon.

Hinunoa, ang batan-ong si Angela dunay pagatambongang tulo ka sosyal nga okasyon, nga ang kada usa nagkinahanglag lahi nga estayl sa biste. Dili sama kang Robert, hinunoa, wala siya malisdi sa pagpangita ug haom nga biste nga isul-ob. Dili ingon nga si Angela dato. Siya nakatigom lamang ug paninugdang mga ilisan nga motugot kaniya sa pagbisteg maayo sa lainlaing okasyon.

Usa ka artikulo sa Woman’s Day nga magasin nag-ingon: “Ang mga sinina importante. Dako kinig ikatabang aron mobati kag maayo sa imong kaugalingon.” Ang imong gisul-ob dunay epekto usab sa panglantaw ug pagtratar sa uban kanimo. Nan, uban sa maayong katarongan giawhag kita sa Bibliya nga madayandayanan ug “mahapsay nga sinina, uban ang kaligdong ug pagkamabuot sa hunahuna.” (1 Timoteo 2:9) Kon ikaw usa ka Kristohanon, ang pagbaton ug haom nga mga ilisan angay nga hinungdanon alang kanimo.

Hinunoa, mahitabo ba nga bisan pa kon duna kay tokador nga puno kaayog sapot, usahay bation nimo nga wala kay isul-ob? Unsay suliran, ug unsaon nimo pagtul-id sa mga butang?

Ang Taas nga Bili sa Urog

Subsob ang suliran dili salapi kondili ang epekto sa pagkahimong naulipon sa kanunay nagabag-ong mga estayl ug mga urog sa kalibotan. Ang librong Youthtrends miingon nga “ang kalibotan sa negosyo nahibalo kon unsa ka dakong salapi ang gugolon sa mga batan-on alang sa mga tatak sa sapot.” Dinasig sa kahakog sa salapi, ang industriya sa sapot migamit sa madanihong magasin ug mga anunsiyo sa TV aron danihon ang mga batan-on nga mogasto​—ug mogasto, ug mogasto! Dugangan pa sa pagpit-os sa isigkaingon, ang estratehiya mosaler. Reklamo sa usa ka magtutudlo: “Ang tanan nagagasto ug dagkong mga kantidad alang sa mga sapot ug ang mga bata nga dili makaarang niana . . . magtrabaho human sa klase aron lamang makapalit ug may tatak nga karsones.”

Ang pagpaulipon sa urog dakog gasto ug hayan diyutay ra ang mahabilin kanimo nga kantidad aron gastohon sa mas praktikal nga mga sapot nga gikinahanglan gayod nimo. Mao nga ang Roma 12:2 nagahatag ug maayong tambag sa dihang kini nag-ingon: “Hunong na sa pagpaumol sumala niining sistemaha sa mga butang, apan mag-usab pinaagi sa pagbag-o sa inyong kaisipan.” Tinuod, ang mailhang nalahi dili kanunay sayon. Ang 16-anyos nga si Charlene miangkon: “Ang kabataan sa tunghaan motan-aw kanimo ingong kataw-anan sa dihang wala ka magbiste sama kanila.” Sa dihang tugotan nimo nga diktahan ka sa uban kon unsay imong buhaton, hinunoa, mahimo kang ilang ulipon. (Itandi ang Roma 6:16.) Usa ka batan-ong babaye nga ginganlag Johanna miangkon: “Mapikal ako tungod kay bation nako nga daw kanunay akong mamiste aron pahimut-an ang lain.”

Kini ba kanunay nga maalamon? Tagda, pananglitan, ang mga estayl sa sapot sa gang sa kanto, “hip-hop,” ug “grunge.” Daghan ang nagsul-ob niining maong mga estayl tungod lamang kay kini popular. Apan, kini halos nagapahayag sa kayugot ug pag-alsa. Ang pagsul-ob ba niini mohatag sa uban ug sayop nga pagsabot bahin kanimo? (Juan 15:19; itandi ang 2 Corinto 6:4.) Dili na hisgotan pa nga ang pamiste sama sa usa ka membro sa gang mahimong mopatay kanimo. Busa ang pipila ka tunghaan sa T.B. nagdili sa pagsul-ob ug mga sapot nga estayl sa mga gang. Ang leksiyon? Wala gayoy kapuslanan nga tugotan ang imong isigkaingon nga mobuot sa imong mga sapot, labaw na nga but-an ang imong kinabuhi. Inay nga mabalaka kon unsay makapahimuot kanila, “padayon nga tinoa kon unsa ang dalawaton sa Ginoo”!​—Efeso 5:10.

Pagtagad sa Imong mga Panginahanglan

Sa dihang makalingkawas ka gikan sa pagharihari sa uso ug urog, mahimo nimong sugdan ang pagtigom ug mga ilisan alang sa imong aktuwal nga mga panginahanglan. Pananglitan, kadaghanan sa imong panahon gigugol sa tunghaan. Kon ang imong tunghaan nagbaod ug uniporme o nagasunod sa usa ka estriktong lagda sa pamiste, ang imong mga kapilian maoy limitado. Apan sa daghang tunghaan gitugot ang kaugalingong pagpili, ug naandan na ang kaswal nga pamiste.

Sa maong kahimtang, hayan dili maalamon nga himoon ang imong kaugalingon nga talagsaon pinaagi sa pagsul-ob ug amerikana ug korbata o estaylis nga sayal. Gusto nimong tan-awong kaswal nga dili usab mahimong maurogon o padoy. Usa ka dalagita nga ginganlag Millie mihimo niana. Samtang sa tunghaan iyang gilikayan ang paghingapin sa urog. Kon ang imong kahimtang maoy susama, hayan gikinahanglan usab nimo ang pipila ka kaswal nga karsones, mga polo, o blusa diha sa imong mga ilisan. Kon lisod ang salapi, ang pagbaton ug pipila niining mga butanga igo na.​—Itandi ang Lucas 10:42.

Ang pagmentinar sa imong pangtungha nga sapot sa makasaranganong gidaghanon hayan mohatag kanimo ug igong salapi aron matagan-an ang ubang mga panginahanglan. Pananglitan, duna ka bay trabaho sa gawas sa balay o sulod sa panimalay? Nan nagkinahanglan ka ug pipila ka durable, lig-ong mga sapot. Ang haom nga sapot hayan kinahanglanon usab alang sa mga isport ug ubang mga kalihokan sa dula. Bisan tuod nindot ang pagsul-ob sa may tatak nga mga purol, pang-ibabaw, ug mga gomang sapatos, makaplagan nimo nga ang pipila ka baratohong mga sapot maoy susamang magamit.

Kon ikaw usa sa mga Saksi ni Jehova, buot usab nimong tagdon ang imong panginahanglan sa haom nga sapot nga isul-ob sa Kristohanong mga tigom, tungod kay ang kaswal nga sapot dili haom alang sa pagsimba. Sa kayutaan diin ang estayl-Kasadpan nga biste gisul-ob, ang batan-ong mga lalaki mosul-ob ug pangpormal nga karsones, taas-ug-bukton nga polo, korbata, ug amerikana. Ang batan-ong mga babaye kasagaran mosul-ob ug bestida o sayal ug blusa. Ang susamang biste masul-ob usab diha sa pultahan ngadto sa pultahan nga pagwaling buluhaton. Kon unsa ka daghan sa maong mga sapot ang imong mapalit magdepende sa imong badyet. Ikalipay, ang imong sinina dili kinahanglang daghan o kinaulahian sa urog. Kini kinahanglang hindik ug hinlo.

Si Jesu-Kristo mitambong ug usa ka kasal, ug mahimo ka usab nga dapiton sa pagtambong sa usa ka sosyal nga okasyon. (Juan 2:​1, 2) Kon ang pagsul-ob ug pormal nga biste alang sa maong mga okasyon maoy naandan, nan makataronganon nga magbaton ug andam nga pipila ka haom nga mga sapot. “Nakaeksperyensiya ako nga wala mabisteheg haom alang sa okasyon, ug dili kini makapahimuot,” angkon ni Johanna. Ang pagpanag-iya ug labing menos usa ka ismarting biste makapalingkawas usab kanimo sa kapit-os ug sa gasto sa dalidali nga pagpamalit.

Pag-imbentaryo

Hayan ikaw mohimo sa gitawag sa magsusulat nga si Jean Patton nga pag-awdit sa tokador. (Color to Color) Ukaya ang imong mga sinina, lakip sa mga butang nga gitipigan. Hayan imong madiskobrehan ang mga sapot nga imo nang nakalimtan. Sa samang panahon, imong kuhaon ang mga butang nga guot na kanimo o kadtong dili na nimo gusto.

Sunod, paghimog listahan sa imbentaryo, tingali giorganisar kini ngadto sa pangunang mga piraso (mga amerikana, mga terno, mga bestida, mga dyaket, isport nga mga dyaket), pangsuportar nga mga piraso (mga blusa, mga sweater, taas-ug-bukton nga mga polo), ug mga pahiyas (mga bandana, bakos, guwantes, kalo, sapatos, bag, korbata). Ang maong listahan makatabang sa pagpalutaw kon unsang mga butang ang gikinahanglan nimo aron makompleto ang imong mga ilisan.

Maalamong Pagpamalit

Sa pila ka kayutaan ang bag-ong sapot maoy kaluho. Ang mga batan-on maningkamot sa pag-amping sa ilang mga sapot ug mentinahon kini nga may igoigong kahindik ug kahinlo. Apan, unsa man kon ikaw anaa sa kahimtang nga makapalit ug pipila ka bag-ong mga sapot? Sa iyang librong Working Wardrobe, si Janet Wallach mipahayag nga ang “usa ka babaye makadaginot ug panahon ug salapi kon siya mopalit ug mga sapot nga dunay katuyoan.” Tinuod usab kana sa batan-ong mga lalaki. Malagmit, limitado ang imong badyet, busa kinahanglang imong kuwentahon ang bili sa bisan unsa nga imong paliton. (Itandi ang Lucas 14:28.) Hayan kana magkahulogan sa pag-iban sa imong mga palaliton, nga magpabilin sa mas kinahanglanong butang. Ang maayong kinaugalingong lagda mao ang paggasto sa kadaghanan sa salapi sa mga sapot nga pirme nimo isul-ob.

Ang The Better Business Bureau A to Z Buying Guide mihatag niining tambaga: “Tigoma ang imong mga ilisan nga nag-agad sa usa ka paninugdang grupo sa kolor, sama sa asul ug abohon o maron ug itom. Pilia ang pangunang mga sapot sa maong mga kolor, ug tipigi ang magilakong mga kolor nga moterno sa mga pang-ibabaw, blusa, ug mga pahiyas.” Ang sapot nga neyutral ug kolor magpabiling maurogon sa dugay nga panahon. Pinaagi sa pagpabilin sa paninugdang mga kolor, dali ka rang makaeksperimento ug makamugna ug bag-ong mga terno.

Ang Proverbio 14:15 nagaingon: “Ang mabinantayon nga tawo magatan-aw pag-ayo sa iyang paglakaw,” ug ang pagbaton ug usa ka tinong plano alang sa imong pagpamalit makatabang kanimo nga makalikay sa gastosong pagpalit nga wala sa plano. “Kanunay nakong dala ang lista nako sa palaliton sa dihang mamalit ako,” matud sa usa ka batan-ong babaye. Usab, hinumdomi nga sa kadugayan mas maayo ang maayong kalidad kay sa gidaghanon sa gipamalit. Ang de-kalidad nga sapot mahimong modurar ug daghang tuig. “May mga sweater pa ako nga akong gisul-ob niadtong tin-edyer pa,” matud sa usa ka batan-ong babaye. Ugaling, ang tatak sa pagkatinuod dili garantiya sa kalidad, nga mas matino ug maayo pinaagi sa maampingong pagsusi sa sapot mismo.a

Magmahimong konserbatibo kon bahin sa estilo. Ang tradisyonal nga sapot o terno sa lalaki halos kanunay nga nunot sa estayl. Ang maurogong mga estayl dali rang malaos. Sa iyang librong Conservative Chic, si Amelia Fatt mipahayag: “Ang konserbatibong sapot mas sayon nga gamitan ug dugang pahiyas, mas sayon nga dugangan sa sunod tuig, usa ka mas maayong panggasto.”

Ayawg kalimti nga ang imong mga ginikanan dunay daghang tuig nga eksperyensiya sa pagpamalit ug sapot. Ang pipila sa inyong mga gusto mahimong modiperensiya ug usa ka kaliwatan, apan hayan magkauyon kamo bahin sa mga pangunang butang nga labaw kay sa imong maamgohan. “Ang akong inahan mitabang kanako ug sa akong igsoong babaye sa pag-ugmad ug maayong pagpili ug sapot,” hinumdom ni Angela. Uban sa panahon ug pailob, hayan ikaw usab makahimo sa pag-ugmad sa usa ka haom, mapuslanong mga ilisan. Tingali dili ka na moingon pag-usab, ‘Wala akoy ikasul-ob!’

[Mga footnote]

[Hulagway sa panid 19]

Imbentaryoha una ang imo nang nabatonan