Gikan sa Among mga Magbabasa
Pagduladula sa Imoralidad Salamat sa artikulong “Mga Batan-on Nangutana . . . Pagduladula sa Imoralidad—Unsay Kadaot?” (Pebrero 8, 1994) Nagpakigdeyt ako sa usa ka ulitawo, ug gisultihan niya ako nga kon dili niya ako hagkan o hikapon, dili niya ikapakita kon unsa ka dako ang iyang gugma kanako. Nakahimo kami sa pakighilawas, ug duha ka semana sa ulahi, gikanselar niya ang among kasal. Akong gibati ang kayugot—ug gipahimuslan. Maayo untag wala ako mahimong hungog kaayo. Salamat sa pagpatik niining mga artikuloha, nga gikinahanglan gayod nako.
N. R., Tinipong Bansa
Kas-a ako nalangkit sa hinobrang pakighalok ug pakig-ugay, ug abi nako nga dili kadto daotan basta dili kami maagak ngadto sa pagpakighilawas. Kining artikuloha mitabang kanako sa pag-ila nga dili kita makabiaybiay sa Diyos ug nga siya nahibalo sa tanang butang.
T. J., Nigeria
Inigkatagbo nako sa mga sakop sa inyong relihiyon, modawat akog kopya sa Pagmata! Kana ang nahitabo sa Pebrero 8, 1994, nga isyu. Ang artikulo bahin sa imoralidad nakapahingangha kanako. Ang mga publikasyon sa akong kaugalingong Evangelical Lutheran Church dili mohisgot sa maong mga topiko, apan mas mohisgot pa sa mga homoseksuwal ug mga Lesbiyan. Sa inyong mga magasin gihisgotan ninyo ang mga ulohan nga gidili sa uban. Gidayeg ko ang inyong kaisog ug lig-ong pagtuo.
H. S., Alemanya
Salamat gikan sa kasingkasing sa artikulong “Mga Batan-on Nangutana . . . Asa Kutob ang ‘Paghinobra’?” (Oktubre 22, 1993) Ako nagapakigdeyt sa usa ka batan-ong Kristohanong ulitawo. Bisan tuod ang paghalok ug pag-ugay kasagaran na sa among komunidad, nagbutang kamig mga limitasyon sa usag usa sukad gayod sa sinugdanan. Dili sayon ang pagsunod sa matarong nga mga sukdanan ni Jehova, ug nakapaneguro ako nga daghan ang matabangan niining artikuloha.
P. S. F., Brazil
Bisan pag ako 26 anyos, ang “Mga Batan-on Nangutana . . .” nga mga artikulo bililhon kanako. Dugay na nakong gikalibgan kining linaing pangutana. Nalipay kaayo ako nga kining artikuloha nagasulti sa tino ug tin-aw kon asa kutob ang paghinobra!
V. V., Belgium
Mga Lamak Natandog ako sa pagsulat tungod sa artikulong “Mga Lamak sa Kalibotan—Ekolohikanhong Bahandi nga Gidaot.” (Enero 22, 1994) Ang mga hulagway mitabang sa pagpasiugda sa atong katungdanan nga atimanon ang kalalangan ni Jehova sa bug-os nga katahom niini. Ako nalipay nga ang Diyos sa dili madugay ‘magalaglag niadtong nagalaglag sa yuta.’—Pinadayag 11:18.
Z. C. B. S., Brazil
Ako usa ka bayongbayong. Gibasa nako ang artikulo ug nakaamgo nga ang kinaiyahan nagakaut-ot diha sa daghang bahin sa kalibotan. Akong nasabtan na karon nga bisan pag ang mga tawo maghisgot bahin sa pagkanahiusa sa ilang mga kalihokan, sila dili makaarang. Busa, buot kong buhaton ang akong maarangan sa pagtuon sa Bibliya aron ako maatua didto sa umaabot nga Paraiso sa Diyos.
Y. K., Hapon
Ang inyong artikulo maoy usa ka maayong panig-ingnan nga ang kahimuot sa pagbasa sa Pagmata! maoy dili lamang gumikan sa mga unod niini kondili gumikan usab sa komposisyon ug pagkasulat: ekselenteng mga letrato, hapsay ug hinlong mga layout. Salamat.
M. E., Canada
Naluwas sa Kampo Konsentrasyon Nadasig kaayo ako sa kasinatian ni Feliks Borys, “Gipanalipdan sa Pagtuo sa Diyos.” (Pebrero 22, 1994) Ang pagbasa niadto literal nga nakapanlimbawot sa akong balhibo, ug naningkamot ako sa pagpugong sa mga luha. Kini naghatag kanakog kusog sa paglahutay taliwala sa pagsulay.
A. C., Italya
Ang artikulo mitabang kanako sa pag-apresyar sa dugang pa sa gahom ni Jehova sa pagpanalipod niadtong nagabutang sa ilang pagsalig diha kaniya. Pagkamakapatandog ang pagbasa bahin sa kahibulongang paagi sa pagtubag ni Jehova sa mga pag-ampo ni Feliks Borys!
E. F., Sweden