Usa ka Panagtagbo sa Gabii sa Tanzania
HUMAN sa internasyonal nga kombensiyon sa mga Saksi ni Jehova sa Kenya, mahinamong gisugdan namo ang among kaugalingong panaw ngadto sa Tanzania.
Una kaming mihapit sa Nasodnong Parke sa Lanaw Manyara. Nahingangha kami sa nagkadaiyang ihalas nga kahayopan—mga unggoy nga asul, mga impala, cape buffalo, mga zebra, ug daghan pa. Handurawa ang pagsud-ong sa usa ka lanawng pinuntikan ug mga hippopotamus. Handurawa nga ginatan-aw nimo ang usa ka giraffe nga naningaon sa pikas nga tampi, ang usa ka leyon sa halayong kasagbotan, ug ang panon sa mga wildebeest sa unahan niana.
Pagkaabot sa Ngorongoro Crater, misuhol kamig usa ka giya ug miabang ug four-wheel-drive nga sakyanan alang sa usa ka adlawng panaw ngadto sa caldera (ang lungag sa nalusnong bolkan). Ang biyahe agi sa libaongong dalan nagdala kanamo ug mga 600 metros gikan sa ngilit paubos ngadto sa salog sa lungag. Pagkatalagsaon sa talan-awon! Ang ihalas nga kahayopan nakatag sa tibuok luag nga kapatagan. Nanglakaw ang mga panon sa mga wildebeest nga samag nanglalin. Daghan kaayo ang mga zebra, mga hartebeest, ug mga Thomson’s ug Grant’s gazelle. Sa usa ka dapit nga among gihunongan, usa ka balhiboong leyon nagpahulay sa landong sa among sakyanan, nga wala magtagad nga kami nagtan-aw ibabaw gayod kaniya. Sa ulahi mihunong kami aron motan-aw sa itom nga rhino sa halayo ug sa ihalas nga mga elepante sa duol nga naningaon sa mga kahoy. Samtang kami nagsakay pabalik sa ngilit, nahinumdoman namo ang labihan ka daghang talagsaong mga hayop. Duna bay wala namo makita?
Aw, oo, ang Aprikanhong leopardo. Apan ang paglaom sa pagkakitag usa sa kamingawan halos usa ka panghanduraw. Ang letratistang si Erwin Bauer miingon: “Ang mga turista mangita sa mga leopardo uban sa hingaping kadasig ug kakugi, labing menos sa bahin tungod kay kanang mga hayopa labihan ka lisod nga hikit-an, labi na nga maletratohan. Kadaghanang magpapanaw sa naandang mga panaw dili gani makapasiklap sa maong hayop. Sulod sa 15 nako ka panaw, akong nakita ang katibuk-ang walo ka leopardo, nga usa lang ang diha sa duol aron maletratohan.”—International Wildlife.
Sa pagtikyop sa kagabhion kami may laing suliran sa among mga kaisipan. Gikanselar ang mga reserbasyon sa usa ka sak-anan, mao nga gikinahanglan nga kami mangitag sak-anan. Tungod niadto kami nakaagi sa dili-sementadong karsada sa hingpit nga kangitngitan. Sa kalit nakuratan ang duha kanamo sa atubang nga lingkoranan. Ang may pagkabrawon ug dagway milukso ngadto sa mga silaw sa among pangunahang mga suga. Sa kalit mihunong kami ug nakatig-ik sa katingala!
Didto mismo sa among atubangan ang usa ka hamtong nga leopardo! Kon kadtong didto sa lingkoranan sa luyo mibating nabentahaan, kalit kanang natapos. Mikalit ug dagan ang leopardo ngadto sa daplin sa tuo—ug nagpabiling walay-lihok. ‘Unsay akong buhaton?’ siya daw namalandong didto nga nadan-agan ug nakit-an namong tanan. ‘Modasmag, o motalikod sa usa ka wala-hiilhing “kaaway” ug mosulay pagkalagiw ngadto sa kabugangan?’
Si Adrian, usa sa among mga kauban, mao ang labing duol, nga usa ra ka metros gikan sa maong matahom nga linalang nga nag-aliwasa sa kusog ug andam molukso. “Dali, ambi ang plas sa kamera,” siya mihagawhaw samtang gisakmit ang bug-os awtomatiko niyang kamera. Gikan sa luyo dihay gihunghong nga mga pasidaan, “Ayawg langas.” Ang kamera giandam dayon ug nakuha ang usa ka letrato, apan daw pakyas kay ang plas napunting sulod sa sakyanan. Samtang gihulat nga mosiga ang plas sa kamera, gihinay pagpaubos ni Adrian ang iyang bentana. Ang leopardo nagpabilin sa gilay-ong mga usa ka bukton, nga ang tumoy sa iyang ikog giwilikwilik, nga sidlak ang iyang mga mata.
Apan sa pagkakuha namo sa ikaduhang letrato, siya mihukom kon unsay buhaton. Ang matahom kaayong leopardo milukso paingon sa kalibonan ug nahanaw. Dako kaayo ang kakisaw sulod sa among sakyanan! Usa ka kasinatiang dili mahikalimtan, usa ka kasinatiang labihan ka tagsaon sumala sa gisulti sa mga giya kanamo sa ulahi. Sa dihang kadtong ikaduhang letrato misangpot nga nindot kaayo, nabatonan namo kana aron magpamatuod sa among mga memorya niadtong kulbahinam nga panagtagbo sa gabii sa Tanzania.