Gikan sa Among mga Magbabasa
Edukasyon Bag-o lang ako migraduwar gikan sa usa ka unibersidad sa Nigeria ug misipyat lag 2 porsiento aron makuha ang taas nga mga marka. Daw nahugno ako. Busa sa dihang inyong gipatik ang artikulong “Pagbutang sa Edukasyon sa Dapit Niini” (Agosto 22, 1994) ug gipakita nga ang edukasyon dili angay agpason aron lang manghawod sa tunghaan, misugod ako sa pagkakita sa mga butang sa hustong dapit niini. Samtang giaghat ako sa akong mga propesor sa pagkuhag postgraduate nga mga kurso, akong gibalanseg maayo ang mga butang sumala sa lamdag sa akong nakat-onan.
G. J., Nigeria
Ako 14 anyos ug nailalom sa daghang pagpit-os sa pagpadayon sa hataas nga edukasyon. Pinaagi sa tabang sa inyong artikulo, nakahukom ako kon unsay buot nakong buhaton. Buot kong mahimong usa ka payunir [bug-os panahong ebanghelisador], ug kon gikinahanglan ko ang dugang pagbansay aron makatrabaho, gusto kong motungha sa usa ka bokasyonal nga tunghaan ug mokuhag potograpiya.
H. O., Tinipong Bansa
Mipili ako nga dili mokuha ug dugang edukasyon. Palabihon kong gamiton kanang maong panahon sa pagtudlo sa uban bahin sa atong Maglalalang. Kasagarang mahingangha ang mga tawo tungod kay daghan akog nahibaloan bahin sa lainlaing ulohan. Sila mangutana, “Nag-eskuyla ka ba sa kolehiyo?” Ako silang sultihan nga nakat-onan nako kini gikan sa Bibliya ug sa literatura nga gitagana sa Watch Tower Society.
M. L., Tinipong Bansa
Gipakita sa inyong artikulo ang panginahanglan sa pagkonsiderar sa bentaha ug disbentaha sa dugang edukasyon. Gibati ko ang panginahanglan nga motungha pag-usab apan walay tinguha nga pasagdan ang espirituwal nga mga kalihokan. Akong gisaysay ang akong eskedyul sa Kristohanong mga tigom sa kalihim sa tunghaan, ug iyang gihikay ang akong mga klase aron ako makatambong sa tanang tigom.
M. F. S., Brazil
Sudlanan nga Mas Huyang? Salamat kaninyo alang sa malamdagong artikulong “Ang Hunahuna sa Bibliya: Ang ‘Sudlanan nga Mas Huyang’—Usa ka Insulto sa mga Babaye?” (Oktubre 8, 1994) Angay basahon kining artikuloha sa matag lalaki, tungod kay nindot kaayo ang pagkasaysay niini.
G. B., Tinipong Bansa
Wala gayod nako masabtig tin-aw ang ekspresyon sa Bibliya sa 1 Pedro 3:7 bahin sa mga babaye ingong ‘sudlanan nga mas huyang.’ Nagtuo gayod ako nga ang mga babaye maoy mas ubos nga mga linalang, ug nagdako ako nga nakakita nga walay pagtahod nga gitratar sa mga lalaki ang mga babaye. Apan kadtong artikuloha nakatul-id sa akong kaisipan.
T. C., Tinipong Bansa
Kaatbang nga Sekso Salamat kaayo alang sa inyong mga artikulong “Mga Batan-on Nangutana . . .” nga “Nganong Lisod Iwakli Gikan sa Akong Hunahuna ang Kaatbang nga Sekso?” ug “Sa Unsang Paagi Iwakli Ko ang Kaatbang nga Sekso Gikan sa Akong Hunahuna?” (Hulyo 22, 1994; Agosto 8, 1994) Nalipay ako sa pagkahibalo nga dili ako buang, sanglit sukad sa nag-edad ug 12 aduna akoy kusganong mga pagbati sa kaila nakong batang lalaki. Ang ikaduhang artikulo nakatabang kanako sa paghunong ug paghunahuna kaniya kanunay. Gitug-an nako kini sa edarang Kristohanong igsoong babaye sa akong kongregasyon, ug iya akong gitabangan.
P. Z., Tinipong Bansa
Ang bahin sa masturbasyon nakaigo gayod kanako. Nagtuo ako nga ang masturbasyon makatabang kanako sa pagpalong sa kainit sa seksuwal nga kailibgon, apan makapasamot lamang hinuon kini. Nag-ampo ako nga pasayloon ako ni Jehova tungod sa pagkalangkit niining dulumtanang buhat.
P. M., Tinipong Bansa
Ang artikulo miabot sa hustong panahon alang kanako. Sa tunghaan ang numero-unong ginaestoryahan mao ang sekso. Adunay usa ka dalaga sa tunghaan nga tigtambongan sa kongregasyon nga akong ginatambongan. Nakita nako siya nga intelihente kaayo, hawod, ug maanyag. Ang artikulo nakatabang kanako sa paglikay sa paghunahuna kanunay kaniya ug sa pagpangita kaniya.
M. F., Alemanya