“Usa ka Holocaust sa Panalapi”

SINULAT SA KORESPONSAL SA PAGMATA! SA NIGERIA

SUMALA sa usa ka taho sa UNICEF (United Nations Children’s Fund), ang bahin sa Sahara sa Aprika nag-antos sa “usa ka holocaust sa panalapi.” Halos katunga sa populasyon​—mga 220 ka milyong tawo​—ang nagkinabuhi sa tumang kakabos, nga dili makaarang sa pagtagana sa ilang labing pangunang mga kinahanglanon. Ang aberids nga molupyo maoy 20 porsientong mas kabos kay sa niadtong napulo ka tuig nga milabay.

“Sa edukasyon,” matud sa taho, “ang katuigang 1980 mahubit lamang ingong usa ka nawala nga dekada.” Ang gastos sa matag estudyante mikunhod ug un-tersiya, ug ang pagpalista sa tunghaang primarya mius-os gikan sa 79 ngadto sa 67 porsiento. Ang mga serbisyo sa pag-atiman sa panglawas nagkanihit usab sa daghang nasod sa Aprika, nga daghang klinika ang nanirado tungod sa pagkakulag trabahante ug medisina.

Ang taho naglista ug daghang hinungdan sa krisis sa ekonomiya sa kontinente, lakip na ang gastos sa militar, paghinay sa negosyo, ug dagkong mga utang, nga matud sa mga eksperto dili na gayod mabayran. “Ang Aprika dili makabangon,” matud sa taho sa UNICEF, kon “walay internasyonal nga paningkamot sa dakong sukod nga wala pa mahunahunai.”

Posible ba kining mahitabo? Ang Bibliya matinud-anong nag-ingon: “Ayaw ibutang ang imong pagsalig sa mga prinsipe, ni sa anak lalaki sa tawong yutan-on, nga kaniya walay kaluwasan.” (Salmo 146:3) Ang sulbad sa lalom-nga-pagkagamot nga mga problema sa Aprika dili magdepende sa mga kagamhanan sa tawo. Ang Gingharian sa Diyos ang makadalag dumalayong kahupayan​—dili lamang sa Aprika kondili sa tibuok kalibotan.​—Mateo 6:10.

[Picture Credit Line sa panid 31]

WHO/​OXFAM