Nahibulong Ka ba Sukad?

TUNGOD sa ginatos ka relihiyon, mga sekta, ug mga kulto sa kalibotan karong adlawa, sa unsang paagi posible nimong mailhan ang relihiyon nga giuyonan sa Diyos? Daw sama kini sa pagpangita ug dagom diha sa pundok sa dagami. Apan kinahanglan bang susihon nimo ang matag usa sa mga dagami? Dili. Magamit nimo ang paagi sa pagpagawas. Ang Pulong sa Diyos, ang Bibliya, nagasilbing usa ka batobalani nga motabang kanimo sa pag-ila nianang “usa ka pagtuo.”​—Efeso 4:5.

Sa miaging isyu niining magasina, ilalom sa “Nahibulong Ka ba Sukad?” (Enero 8, 1994, panid 13), among gihisgotan ang isyu bahin sa dili-mamatay nga kalag. Pinaagi sa paggamit sa Biblikanhong pangatarongan, among gipamatud-an nga ang tawo walay dili-mamatay nga kalag nga gipanalanginan o nag-antos human sa kamatayon. (Ecclesiastes 9:​5, 10; Ezekiel 18:4) Pinaagi nianang yanong kamatuoran, atong mapagawas ang bisan unsang relihiyon nga nagatudlo nga ang tawo adunay dili-mamatay nga kalag. Nagbilin kana sa diyutay na lang kaayong relihiyon diha sa atong pagpangita sa usa nga giuyonan sa Diyos. Busa atong ipadapat ang pipila pa ka pangutana nga makatabang kanato sa pagpamenos pa sa lista, pinaagi lamang sa pagtan-aw ug pagpangatarongan sa mga teksto sa Kasulatan nga gihisgotan sa ubos.

1. Ang matuod ba nga pagsimba magbayaw, maghimaya, ug hilabihang magpasidungog sa tawhanong relihiyosong mga lider, nga maghatag pa gani kanila ug dili-kasulatanhong mga titulo?​—Salmo 96:​5-7; Mateo 23:​6-12; 1 Corinto 3:​5-9.

2. Ang matuod ba nga relihiyon usa ka nagtinguhag-ganansiya nga negosyo, aron ang mga lider niini magkinabuhi sa kaluho?​—Mateo 6:​19-21; Santiago 2:​1-4; 5:​1-3.

3. Ang matuod ba nga relihiyon nganlan pinasikad sa usa ka pagtulon-an (sama sa Baptist, Pentecostal), sa geograpikanhong sinugdanan niini (sama sa Romano, Southern, Iglesya sa Inglaterra), sa dili-hingpit nga mga magtutukod niini (Luther, Calvin, Wesley) o sa matang sa pagmando nga gigamit niini (sama sa Presbeteriano, Episcopal, Kongregasyonal)?​—Isaias 43:​10, 12; Buhat 11:26.

4. Ang matuod ba nga pagsimba maningkamot sa pagtago o pag-ilis sa gipadayag nga ngalan sa Diyos?​—Isaias 12:​4, 5; Mateo 6:9; Juan 17:26.

5. (a) Unsaon pag-isip sa matuod nga relihiyon ang Bibliya? (Salmo 119:105; Lucas 24:​44, 45; Roma 15:4; 2 Timoteo 3:​14-16) (b) Unsaon pag-isip niini ang gitawag nga tapos-Bibliyang mga pinadayag?​—Galacia 1:​8, 9.

6. Sa unsa ug kang kinsa itumong sa matuod nga mga magsisimba ang pagtagad alang sa kaluwasan?​—Salmo 27:1; Mateo 6:33; Roma 16:​25-27; 1 Corinto 15:​27, 28; Pinadayag 11:15.

7. Unsang matanga sa panggawi ang angayng ipatungha sa matuod nga relihiyon ingong resulta sa mga pagtulon-an niini?​—Mateo 22:​37-40; Efeso 4:​23-29; itandi ang Galacia 5:​19-21 sa 5:​22, 23.

8. Ang tibuok-kalibotang panag-igsoonay sa matuod nga mga magsisimba sa Diyos malangkit ba sa makapabahing politika ug nasyonalismo?​—Daniel 2:44; 7:14; Juan 18:36; Roma 16:17; 1 Corinto 1:10.

9. Ang pagsimba ba nga giuyonan sa Diyos magtugot sa pag-apil sa mga gubat ug rasanhon o tribonhong mga pagpamatay?​—Exodo 20:13; Isaias 2:​2-4; Juan 13:​34, 35.

10. Kinsa karong adlawa sa tibuok kalibotan ang nagpakita ug tinuod nga Kristohanong gugma? Kinsa ang wala mabahin gumikan sa politika, rasa, o nasyonalismo? Wala maghimaya sa tawhanong mga lider? Wala magpahimulos sa katawhan alang sa bahandi ug posisyon? Wala moapil sa mga gubat? Adunay Biblikanhong ngalan? Nagpasiugda sa pagmando sa Gingharian sa Diyos ingong permanenteng solusyon sa mga suliran sa katawhan?​—Isaias 43:​10, 12.

Nahibulong Ka ba Sukad? Ang Bibliya Nagtubag

Ang mosunod maoy pipila sa mga teksto nga gihisgotan uban sa mga pangutana sa panid 20:

1. “Gusto nila ang labing inilang dapit sa mga panihapon ug ang unahang mga lingkoranan diha sa mga sinagoga, ug ang mga pangatahoran diha sa mga tiyanggihan ug nga pagatawgong Rabbi sa mga tawo. Apan kamo, ayaw kamo pagpatawag nga Rabbi, kay usa ang inyong magtutudlo, samtang tanan kamo mga igsoon. Dugang pa, ayaw ninyo tawgang amahan ang bisan kinsa dinhi sa yuta, kay usa ra ang inyong Amahan, ang langitnong Usa. Ni magpatawag kamo nga ‘mga pangulo,’ kay usa ang inyong Pangulo, ang Kristo. Apan ang labing dako taliwala kaninyo kinahanglan nga maoy inyong alagad. Ang bisan kinsang nagabayaw sa iyang kaugalingon ipaubos, ug ang bisan kinsa nga nagapaubos sa iyang kaugalingon pagabayawon.”​—Mateo 23:​6-12.

2. “Hunong na sa pagpanigom alang sa inyong kaugalingon ug mga bahandi ibabaw sa yuta, diin ang anunugba ug taya nagapang-ut-ot, ug diin ang mga kawatan nagapanglungkab ug nagapangawat. Hinunoa, pagtigom alang sa inyong kaugalingon ug mga bahandi sa langit, diin walay anunugba ni taya nga magaut-ot, ug diin ang mga kawatan dili manglungkab ug mangawat. Kay kon asa ang imong bahandi, maatua usab ang imong kasingkasing.” (Mateo 6:​19-21) “Umari, karon, kamong mga tawong dato, panghilak, nga managtiyabaw tungod sa mga kaalaotan nga nagasingabot kaninyo. Ang inyong bahandi nangadugta, ug ang inyong panggawas nga mga bisti nahimong kinutkot sa anunugba. Gikaon sa taya ang inyong bulawan ug pilak, ug ang ilang taya mahimong ingon sa usa ka saksi batok kaninyo ug mokaon sa inyong unod nga mga bahin.”​—Santiago 5:​1-3.

3. “‘Kamo mao ang akong mga Saksi,’ miingon si Jehova, ‘ang akong alagad nga akong napili, aron kamo makaila ug motuo kanako, ug kamo makasabot nga ako mao sa gihapon.’” (Isaias 43:10) “Una didto sa Antioquia nga ang mga tinun-an pinaagig iya-sa-Diyos nga pagtultol gitawag nga mga Kristohanon.”​—Buhat 11:26.

4. “Pasalamati si Jehova, kamong katawhan! Sangpita ang iyang ngalan. Ipahayag taliwala sa katawhan ang iyang mga buhat. Isulti nga ang iyang ngalan gibayaw. . . . Gipahibalo kini sa tibuok yuta.” (Isaias 12:​4, 5) “Amahan namo sa mga langit, balaana ang imong ngalan.”​—Mateo 6:9.

5. (a) “Sukad pa sa pagkagamayng bata ikaw nahibalo na sa balaang mga sinulat, nga makapahimo kanimong maalamon alang sa kaluwasan pinaagi sa pagtuo nga may kalabotan kang Kristo Jesus. Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong.” (2 Timoteo 3:​15, 16) (b) “Bisan pa kon kami o usa man ka anghel gikan sa langit maoy magpahayag kaninyo ug butang ingon nga maayong balita nga nahisaylo sa kon unsay among gipahayag kaninyo ingong maayong balita, ipahimo siyang tinunglo.”​—Galacia 1:8.

6. “Padayong pangitaa nga una ang gingharian ug ang iyang pagkamatarong, ug kining tanang ubang mga butang idugang kaninyo.” (Mateo 6:33) “Ang gingharian sa kalibotan nahimong ang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.”​—Pinadayag 11:15.

7. “‘Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini ang kinadak-an ug unang sugo. . . . ‘Higugmaon mo gayod ang imong silingan ingon sa imong kaugalingon.’ Niining duha ka sugo nahisang-at ang tibuok Balaod, ug ang mga Propeta.” (Mateo 22:​37-40) “Ang bunga sa espiritu mao ang gugma, kangaya, pakigdait, taas-nga-pailob, kalulot, pagkamaayo, pagtuo, kalumo, pagpugong-sa-kaugalingon. Batok sa maong mga butang walay balaod.”​—Galacia 5:​22, 23.

8. “Si Jesus mitubag: ‘Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga tig-alagad makig-away unta aron dili ako ikatugyan ngadto sa mga Judio. Apan, ingong mao, ang akong gingharian dili gikan niini nga tinubdan.’”​—Juan 18:36.

9. “Dili ka magpatay.” (Exodo 20:13) “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”​—Juan 13:​34, 35.

10. “‘Kamo mao ang akong mga saksi,’ miingon si Jehova, ‘ang akong alagad nga akong napili, aron kamo makaila ug motuo kanako, ug kamo makasabot nga ako mao sa gihapon. . . . Busa kamo mao ang akong mga saksi,’ miingon si Jehova, ‘ug ako mao ang Diyos.’”​—Isaias 43:​10, 12.