Ang Tanan Bang Relihiyon Makapahimuot sa Diyos?
Naghunahuna ka ba nga ang tanang relihiyon makapahimuot sa Diyos? Tingali ang tanang matang sa pagsimba nga sinati ka nagdasig ug maayong paggawi, labing menos sa pipila ka sukod. Apan igo na ba kana nga makapahimuot sa Diyos?
ANG pipila moingon, ‘Magmatim-os ka sa imong pagsimba, ug mahimuot na ang Diyos. Adunay maayo diha sa tanang relihiyon.’ Pananglitan, ang Relihiyong Bahai nagdawat niining hunahunaa hangtod sa punto sa paglakip diha sa ilang mga pagtulon-an sa siyam ka pangunang mga relihiyon sa kalibotan. Kining relihiyosong grupo nagtuo nga kining tanan nagagikan sa Diyos ug maoy mga bahin sa usa ka kamatuoran. Sa unsang paaging naingon kini niini?
Dugang pa, may katarongan kang mahibulong kon sa unsang paagi ang relihiyon makapahimuot sa Diyos samtang kini nagsugo sa mga membro niini sa pagbutang ug nerve gas diha sa publikong mga dapit, nga posibleng makapatay ug daghang tawo. Kana nga akusasyon gipasaka batok sa usa ka relihiyosong grupo sa Hapon. O ang Diyos ba nahimuot sa usa ka relihiyon nga nag-aghat sa mga sakop niini sa paghikog? Sa pipila ka tuig sa miagi, kana ang nahitabo sa mga sumusunod sa relihiyosong lider nga si Jim Jones.
Sa pagtan-aw ug balik sa unang mga panahon, tingali kita mangutana, Ang mga relihiyon ba nakapahimuot sa Diyos samtang sila nagaagni sa panaggubat, sama sa kaso sa Katloan ka Tuig nga Gubat, nga gisangka gikan sa 1618 ngadto sa 1648? Sumala sa The Universal History of the World, kadto nga relihiyosong gubat tali sa mga Katoliko ug mga Protestante maoy “usa sa labing makalilisang sa mga gubat sa kasaysayan sa Uropa.”
Ang relihiyosong mga Krusada gikan sa ika-11ng siglo ngadto sa ika-13ng siglo misangpot usab ug makalilisang nga pag-ula ug dugo. Sa unang Krusada, pananglitan, mapintasong gipamatay sa gitawag-kono nga Kristohanong mga tigkrusada ang mga molupyong Muslim ug Hudiyo sa Jerusalem.
Palandonga, usab, kon unsay nahitabo panahon sa Inkwisisyon, nga nagsugod sa ika-13ng siglo ug milungtad ug duolan sa 600 ka tuig. Libolibo ang gisakit ug gisunog hangtod nga namatay sa sugo sa mga lider sa relihiyon. Diha sa iyang librong Vicars of Christ—The Dark Side of the Papacy, si Peter De Rosa nag-ingon: “Sa ngalan sa papa, [ang mga inkwisitor] mao ang responsable sa labing mangilngig ug subsob nga pag-atake sa tawhanong dignidad sa kasaysayan sa [tawhanong] rasa.” Mahitungod sa Dominikano nga inkwisitor nga si Torquemada sa Espanya, si De Rosa miingon: “Natudlo sa 1483, siya mapintasong nagmando sulod sa napulog-lima ka tuig. Ang iyang mga biktima mikabat ug kapin sa 114,000 nga kanila 10,220 ang gisunog.”
Sa pagkatinuod, ang mga relihiyon sa Kakristiyanohan dili mao lamang ang sad-an sa dugo. Diha sa iyang basahong Pensées, ang Pranses nga pilosopo nga si Blaise Pascal miingon: “Ang mga tawo dili gayod mobuhat ug daotan sa bug-os ug sa malipayon kay sa dihang himoon nila kini tungod sa relihiyosong pagtuo.”
Nailhan Pinaagi sa Ilang mga Bunga
Sumala sa baroganan sa Diyos, ang pagkadalawaton sa relihiyon wala ipasukad sa usa lamang ka butang. Aron ang relihiyon dalawaton kaniya, ang mga pagtulon-an ug mga kalihokan niini kinahanglang nahiuyon sa iyang sinulat nga Pulong sa kamatuoran, ang Bibliya. (Salmo 119:160; Juan 17:17) Ang bunga sa inuyonan-sa-Diyos nga pagsimba kinahanglang nahiuyon sa mga sukdanan ni Jehova nga Diyos.
Diha sa iyang Wali sa Bukid, si Jesu-Kristo nagpakita nga adunay mga manalagna nga bakak nga nagapangangkon nga naghawas sa Diyos. Si Jesus nag-ingon: “Pagbantay sa bakak nga mga propeta nga manganha kaninyo sa sapot karnero, apan sa sulod sila maoy manunukob nga mga lobo. Pinaagi sa ilang mga bunga mailhan ninyo sila. Dili gayod ang mga tawo mamupo ug ubas gikan sa sampinit o igos gikan sa kudyapa, dili ba? Sa ingon usab ang matag maayong kahoy nagapatunghag maayong bunga, apan ang matag daot nga kahoy nagapatunghag walay-pulos nga bunga; ang usa ka maayong kahoy dili makapamungag walay-pulos nga bunga, ni ang usa ka daot nga kahoy makapatunghag maayong bunga. Ang matag kahoy nga wala magapatunghag maayong bunga ginaputol ug ginasalibay ngadto sa kalayo. Nan, sa pagkatinuod, pinaagi sa ilang mga bunga inyong mailhan kanang mga tawhana.” (Mateo 7:15-20) Kining mga pulonga nagpakita nga kita kinahanglang magbantay sa espirituwal. Tingali naghunahuna kita nga dalawaton sa Diyos ug ni Kristo ang usa ka relihiyosong lider o grupo, apan mahimong masayop kita.
Hinungdanong Magbantay
Bisan pag nangangkon ang usa ka relihiyon nga giuyonan sa Diyos ug ang mga ministro niini nagbasa ug mga teksto sa Bibliya, kana wala magkahulogan nga usa kini ka matang sa pagsimba nga nakapahimuot sa Diyos. Ang mga lider niini tingalig mohimo pa ug kahibulongang mga butang nga morag ang Diyos naglihok pinaagi kanila. Bisan pa niana, ang relihiyon mahimong bakak gihapon, nga wala magpatunghag mga bunga nga dalawaton sa Diyos. Ang madyikerong mga saserdote nga Ehiptohanon sa mga adlaw ni Moises nakahimog kahibulongang mga butang, apan sila dayag nga wala makabaton sa pag-uyon sa Diyos.—Exodo 7:8-22.
Karong mga adlawa sama sa nangagi, daghang relihiyon nagpasiugda ug tawhanong mga ideya ug mga pilosopiya imbes magmaunongon sa kon unsa ang gipadayag sa Diyos nga mao ang kamatuoran. Nan, tukma gayod ang pasidaan sa Bibliya: “Pagbantay kamo: basin ug adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.”—Colosas 2:8.
Human naghisgot bahin sa maayo ug daotan nga bunga, si Jesus miingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit. Daghan ang moingon kanako nianang adlawa, ‘Ginoo, Ginoo, wala ba kami managpropesiya sa imong ngalan, ug nanghingilin ug mga demonyo sa imong ngalan, ug mihimog daghan gamhanang mga buhat sa imong ngalan?’ Apan unya akong ipahayag ngadto kanila: Wala ko gayod kamo hiilhi! Pahilayo gikan kanako, kamong mga mamumuhat sa kalapasan.”—Mateo 7:21-23.
Susiha ang Bunga
Nan, tin-aw nga hinungdanong tan-awon ang bunga sa usa ka relihiyon una pa mohinapos nga kini dalawaton sa Diyos. Pananglitan, ang relihiyon ba nag-apil-apil sa politika? Nan matikdi kining mga pulonga, nga natala sa Santiago 4:4: “Ang bisan kinsa . . . nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.” Dugang pa, si Jesus miingon bahin sa iyang tinuod nga mga sumusunod: “Sila dili bahin sa kalibotan, maingon nga ako dili bahin sa kalibotan.” (Juan 17:16) Ang relihiyon nga maayo sa mga mata sa Diyos dili mag-apil-apil sa mga politika niining kalibotana, nga “nahimutang diha sa gahom sa tuman-kadaotang usa,” ang dili-makitang espiritu nga linalang nga si Satanas nga Yawa. (1 Juan 5:19) Hinunoa, ang relihiyon nga giuyonan sa Diyos maunongong nagpaluyo sa iyang Gingharian ilalom ni Jesu-Kristo ug nagamantala sa maayong balita mahitungod nianang langitnong gingharian.—Marcos 13:10.
Dalawaton ba sa Diyos ang usa ka relihiyon kon kini nagaaghat sa masa sa pagsupak sa balaod? Dayag ang tubag kon atong patalinghogan ang tambag ni apostol Pablo: “Padayon sa pagpahinumdom kanila nga magpasakop ug magmasinugtanon sa mga kagamhanan ug sa mga awtoridad ingon nga mga magmamando, nga magmaandam sa tanang maayong buhat.” (Tito 3:1) Siyempre, si Jesus nagpakita nga ang iyang mga sumusunod kinahanglang ‘mobayad sa mga butang ni Cesar ngadto kang Cesar, apan sa mga butang sa Diyos ngadto sa Diyos.’—Marcos 12:17.
Pananglit nagdasig ang usa ka relihiyon sa pagpakigbahin sa mga gubat sa mga nasod. Ang 1 Pedro 3:11 nag-awhag kanato sa ‘pagbuhat ug maayo’ ug sa ‘pagpangita sa pakigdait ug pangagpason kini.’ Sa unsang paagi nakapahimuot sa Diyos ang usa ka relihiyon kon ang mga sakop niini andam nga mopatay sa ilang isigkamagsisimba sa laing nasod diha sa panaggubat? Ang mga sakop sa relihiyon nga giuyonan sa Diyos nagpabanaag sa iyang pangunang hiyas—gugma. Ug si Jesus nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:35) Kana nga gugma lahi gayod sa mapintas nga pagdumot nga nagpasiugda sa mga gubat sa kanasoran.
Ang tinuod nga relihiyon makabag-o sa mga tawong makigubaton sa pagkahimong mga mahigugmaon sa kalinaw. Kini gitagna niining mga pulonga: “Ilang himoon ang ilang mga espada nga mga punta sa daro ug ang ilang mga bangkaw himoon nga mga galab. Ang nasod dili na mobakyaw sa espada batok sa laing nasod, ni makakat-on pa sila mahitungod sa gubat.” (Isaias 2:4) Imbes magpabuga ug mga pulong sa pagdumot, kadtong nagsunod sa matuod nga pagsimba mosunod sa sugo: “Higugmaon mo gayod ang imong silingan ingon sa imong kaugalingon.”—Mateo 22:39.
Kadtong nagsunod sa matuod nga relihiyon maningkamot sa pagkinabuhi sumala sa hataas nga mga sukdanan ni Jehova nga Diyos, nagadumili sa pagsunod sa imoral nga mga estilo-sa-kinabuhi. Ang Pulong sa Diyos nag-ingon: “Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw pagpahisalaag. Walay mga makihilawason, ni mga tigsimbag idolo, ni mga mananapaw, ni mga lalaking nahuptan alang sa dili-kinaiyanhong mga katuyoan, ni mga lalaking nakigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos. Ug gani ingon niana ang pipila kaninyo kaniadto. Apan kamo hinlo nang nahugasan, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos.”—1 Corinto 6:9-11.
Usa ka Panahon Alang sa Mahukmanong Aksiyon
Hinungdanong mailhan ang kalainan sa bakak nga pagsimba ug sa matuod nga relihiyon. Diha sa basahon sa Bibliya nga Pinadayag, ang kalibotanong imperyo sa bakak nga relihiyon nailhan ingong “Dakong Babilonya,” nga usa ka simbolikong bigaon “kang kinsa ang mga hari sa yuta nakighilawas.” Siya sad-an sa dugo ug nagkapot ug kopa nga bulawan nga “puno sa dulumtanang mga butang ug sa dili-hinlong mga butang sa iyang pagpakighilawas.” (Pinadayag 17:1-6) Walay butang nga dalawaton sa Diyos may kalabotan kaniya.
Panahon kini alang sa mahukmanong aksiyon. Alang sa sinserong mga tawo nga anaa gihapon sa Dakong Babilonya, ang atong mahigugmaong Maglalalang nagpadala niini nga panawag: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak.”—Pinadayag 18:4.
Kon buot mong sundon ang relihiyon nga nakapahimuot sa Diyos, nganong dili mangita pag dugang kahibalo bahin sa mga Saksi ni Jehova? Ang nag-uban nga tsart nagpakita sa pipila sa ilang mga pagtulon-an, lakip sa Kasulatanhong mga katarongan alang niini. Tan-awa ang imong Bibliya aron matino kon ang mga pagtulon-an sa mga Saksi nahiuyon ba sa Pulong sa Diyos. Susiha aron masuta kon ang ilang relihiyon nagpatungha ba ug matang sa bunga nga maoy imong madahom sa matuod nga pagsimba. Kon makita nimo nga kini nagpatungha sa mao nga matang sa bunga, nakaplagan mo ang relihiyon nga nakapahimuot sa Diyos.
[Kahon sa panid 5]
KON UNSAY GITUOHAN SA MGA SAKSI NI JEHOVA
PAGTULON-AN BIBLIKANHONG BASEHANAN
Ang ngalan sa Diyos mao si Jehova Exodo 6:3; Salmo 83:18
Ang Bibliya mao ang Pulong sa Diyos Juan 17:17; 2 Timoteo 3:16, 17
Si Jesu-Kristo mao ang Anak sa Diyos Mateo 3:16, 17; Juan 14:28
Ang katawhan dili sulagmang mitungha Genesis 1:27; 2:7
apan gilalang
Ang tawhanong kamatayon maoy tungod Roma 5:12
sa sala sa unang tawo
Ang kalag mohunong sa paglungtad Ecclesiastes 9:5, 10; Ezequiel 18:4
inigkamatay
Ang impiyerno mao ang komon nga Job 14:13; Pinadayag 20:13,
lubnganan sa mga tawo King James Version
Ang pagkabanhaw mao ang paglaom sa Juan 5:28, 29; 11:25; Buhat 24:15
mga patay
Gihatag ni Kristo ang iyang Mateo 20:28; 1 Pedro 2:24;
yutan-ong kinabuhi ingong lukat 1 Juan 2:1, 2
alang sa mga tawong masinugtanon
Ang mga pag-ampo kinahanglang Mateo 6:9; Juan 14:6,13, 14
itumong ngadto lamang kang
Jehova pinaagi ni Kristo
Ang kasugoan sa Bibliya labot 1 Corinto 6:9, 10
sa moralidad sundon gayod
Ang mga larawan kinahanglang Exodo 20:4-6; 1 Corinto 10:14
dili gamiton diha sa pagsimba
Ang espiritismo kinahanglang Deuteronomio 18:10-12; Galacia 5:19-21
pagalikayan
Ang dugo kinahanglang dili Genesis 9:3, 4; Buhat 15:28, 29
ipasulod sa lawas sa usa
Ang matuod nga mga sumusunod Juan 15:19; 17:16; Santiago 1:27; 4:4
ni Jesus dili bahin sa kalibotan
Ang mga Kristohanon magapanaksi, Isaias 43:10-12;
magwali sa maayong balita Mateo 24:14; 28:19, 20
Bawtismo pinaagi sa bug-os nga Marcos 1:9, 10; Juan 3:22;
pagtuslob sa tubig nagsimbolo Buhat 19:4, 5
sa pagpahinungod sa Diyos
Ang relihiyosong mga titulo Job 32:21, 22; Mateo 23:8-12
dili-kasulatanhon
Kita nagkinabuhi sa Daniel 12:4; Mateo 24:3-14;
“panahon sa kataposan” 2 Timoteo 3:1-5
Ang presensiya ni Kristo Mateo 24:3; Juan 14:19;
dili-makita 1 Pedro 3:18
Si Satanas ang dili-makitang Juan 12:31; 1 Juan 5:19
magmamando niining kalibotana
Laglagon sa Diyos ang karong Daniel 2:44;
daotang sistema sa mga butang Pinadayag 16:14, 16; 18:1-8
Ang Gingharian sa Diyos ilalom Isaias 9:6, 7; Daniel 7:13, 14;
ni Kristo maoy magmando sa Mateo 6:10
yuta diha sa pagkamatarong
Usa ka “gamayng panon” magmando Lucas 12:32;
sa langit uban ni Kristo Pinadayag 14:1-4; 20:4
Ang uban nga giuyonan sa Diyos Lucas 23:43; Juan 3:16;
makadawat ug kinabuhing Pinadayag 21:1-4
walay kataposan diha sa paraiso nga yuta
[Hulagway sa panid 4]
Libolibo ang gipamatay sa panahon sa Inkwisisyon
[Hulagway sa panid 6]
Ang mga Krusada misangpot ug makalilisang nga pag-ulag dugo
[Hulagway sa panid 7]
Ang matuod nga relihiyon mailhan sa maayong bunga niini
[Picture Credit Line sa panid 2]
Cover: Garo Nalbandian