Giapresyar ang mga Basahon sa Bibliya sa Kanhing Unyon Sobyet
Sinulat sa koresponsal sa Pagmata! sa Rusya
SAYO sa 1991 ang naglungtad kaniadto nga Unyon Sobyet gilangkoban sa Rusya ug sa 14 ka laing mga republika. Sukad niadto, ang mga republika nahimong independenteng mga nasod. Ugaling, ang Rusya mas daghan ug populasyon kay sa laing 14 ka nasod nga gitingob ug adunay kapin sa tulo ka pilo nga luna sa yuta kay kanila. Pagka-Septiyembre 1994, dihay 117,276 ka Saksi ni Jehova sa kanhing Unyon Sobyet nga nagpaambit sa mga kamatuoran sa Bibliya sa ilang mga silingan.
Sa pagkakaron daghang magasing Bantayanang Torre ug Pagmata! sa Ruso ang ginapatik kada bulan aron gamiton sa kanhing Unyon Sobyet. Dugang pa, daghang tract ug mga librong gahig hapin ang gipanagtag didto. Nga kining mga basahon sa Bibliya giapresyar pag-ayo dayag nga makita sa mga sulat nga nadawat sa sangang buhatan sa Rusya sa mga Saksi ni Jehova duol sa St. Petersburg.
Giapresyar ang Buloknong mga Magasin
Usa ka tawo nga taga-sentral Siberia misulat: “Sulagma gayod nga nakita nako Ang Bantayanang Torre nga gikuptan sa akong kauban sa trabaho. Ako siyang gihangyo nga pakit-on ko niana. Sa sinugdan mipasiplat lamang ako sa masanag, upat-ug-kolor nga mga hulagway. Unya mibasa ako ug dugang ug dugang pa . . . Una nako naamgohi, nabasa na nako ang tibuok magasin. Ang mga pangutana gisukna diha sa makaiikag, sadya, ug kolokabildong paagi.”
Laing lalaki nga taga-Siberia misaysay: “Sulagma lamang nga ako nakadawat ug usa ka isyu sa inyong magasin. Dili ko buot nga ulog-ulogan kamo, apan mao kini ang kinamaayohang impormasyon nga akong nabasa sukad mahitungod sa relihiyon.”
Usa ka nars nga taga-St. Petersburg, ang ikaduhang-kinadak-ang siyudad sa Rusya, misulat: “Daghang salamat sa kahibulongang serye sa mga artikulo sa Enero 8, 1995, nga Pagmata! bahin sa burnout. Kining mga artikuloha wala magwagtang sa akong mga suliran apan naghatag kanako ug pagpaluyo nga akong gipaabot ug gitinguha.”
Usa ka 17-anyos nga estudyante sa tunghaan misulat: “Mapasalamaton kaayo ako sa tanan nga nagpatik sa maong kahibulongang mga basahon. Sa dihang ang akong mga higala ug ako mibiya sa sinehan, nakita namo ang pipila ka magasin nga gibiyaan sa bakanteng lingkoranan. Amo kining gipunit. . . . Samtang ako nagbasa sa Ang Bantayanang Torre, dili ako makatuo sa mga butang nga akong gibasa. Ingon ba gayod niana ang umaabot? Karon ako nagabasa sa mga Ebanghelyo ug naningkamot sa pagsabot niini. Ang inyong mga magasin bug-os nga nagsaysay kon unsay giingon sa Bibliya.”
Usa ka 26-anyos nga lalaki miingon: “Mapasalamaton kaayo ako sa artikulong ‘Paghikog ba ang Sulbad?’ sa Abril 8, 1994, nga Pagmata! Tungod sa akong kiling ngadto sa depresyon ug sa nabatasan nga masturbasyon, daghang higayon nga naghunahuna akong maghikog. Apan ang Pulong sa Diyos ug mga pag-ampo kang Jehova nagpugong kanako sa paghunos sa akong kinabuhi. Kining artikuloha nagpalig-on sa akong pagtuo sa kaluoy sa Diyos ug sa akong pagtuo nga ang Diyos motabang kanako sa pagsagubang sa akong mga suliran. Nakita niya ang akong paghinulsol. Buot niyang mabuhi ako. Nagpasalamat ako kaniya tungod sa iyang pagpaluyo nga gihatag niya pinaagi niining artikuloha.”
Mahitungod sa samang artikulo sa Pagmata!, usa ka 15-anyos nga dalagita misaysay: “Kining magasina adunay dakong epekto sa akong kinabuhi. Sa dihang nag-edad ako ug otso anyos, misugod ako sa pagbati nga walay nagkinahanglan kanako. Ang akong mga ginikanan walay panahon sa pagpakigsulti kanako, ug gisulayan nako mismo ang pagsulbad sa akong mga suliran. Gipalain nako ang akong kaugalingon. Kanunay nakong gikaaway ang akong mga paryente. Unya misantop sa akong hunahuna ang paghikog. Pagkamalipayon gayod nako nga nakahibalag sa mga Saksi ni Jehova!”
Usa ka babaye sa Uropanhong bahin sa Rusya miingon: “Kanhi nadunggan nako ang panaghisgot sa Bibliya tali sa duha ka batan-ong mga lalaki sa usa ka hunonganan sa bus. Nainteres ako ug miduol kanila. Kining batan-ong mga lalaki naghatag kanako ug kopya sa Ang Bantayanang Torre. Uban sa kalipay ug kaikag, akong gibasa ang magasin, ug buot kong masayod ug dugang mahitungod sa Bibliya. Buot kong adunay kontak kaninyo pinaagi sa inyong mga magasin, ug buot kong regular nga mokat-on ug magtuon sa Bibliya.”
Ubang Basahon Giapresyar
Usa ka batan-ong babaye nga taga-Caucasus misulat: “Usa ka babaye ang misulod sa among opisina ug misugod sa pagsulti mahitungod sa usa ka asembliya. Nakita nako ang iyang kalipay ug kadasig, ug ako nainteres. Sa misunod nga adlaw gihatagan ko niya sa librong Ikaw Mabuhing Walay Kataposan sa Paraiso sa Yuta. Gibasa nako dayon kini uban ang dakong kahinam. Usa kini ka kahibulongang butang. Akong gibati nga human magsukarap sa kangitngit, akong nakaplagan ang ganghaan nga mitultol sa kahayag. Human mangita sa dugayng panahon, akong nakaplagan ang mga tubag sa tanan nakong mga pangutana sa usa lamang ka libro. Kini maoy kalipay nga imposibleng hubiton.”
Usa ka tawo sa Sentral Asia miingon: “Usa ako ka parokyano sa ebanghelistikanhong Maayong Balita nga Iglesya. Nakaamgo kami sa hilabihang kakulang sa espirituwal nga mga basahon. Dinalian kaming naghangyo kaninyo sa pagpadala kanamo ug mga libro, mga brosyur, ug mga pulyeto aron tun-an ug ipanagtag.”
Usa ka lalaki nga taga-Armenia, haduol sa Itom nga Dagat, misulat: “Nabasa nako ang brosyur nga Tinuod Bang May Pagtagad ang Diyos Kanato?, ug kadto nakaparepresko kaayo. Sa kataposan nakakaplag ako ug basahon nga motabang kanako sa pagtuon sa Bibliya. Maluluton akong naghangyo kaninyo sa pagpadala kanako ug mga libro aron tun-an.”
Usa ka babaye nga taga-Siberia miingon: “Usa sa mga Saksi ni Jehova miduaw sa among balay ug nagbilin ug kopya sa librong Ang Labing Bantogang Tawo nga Nabuhi Sukad. Bisan tuod usa ako ka ateyista sukad ako nagtungha, ang akong nabasa nakadasig kanako sa pagpalandong pag-ayo ug pagsugod sa pagtuon sa Bibliya.”
Usa ka inahan sa duha ka anak nagpahayag sa iyang pagkamapasalamaton alang niining samang libro mahitungod sa kinabuhi ni Jesu-Kristo ug misaysay: “Masabot kini sa mga bata ug makapainteres kanila. Nagpukaw kini ug dugang tinguha sa pagtuon sa Bibliya ug pagbasa sa relihiyosong mga basahon. Ang libro maayong pagkapatik ug pagkagama.”
Sa miaging tuig, 34,608 ka tawo sa kanhing Unyon Sobyet ang nagpakita sa ilang apresasyon sa ilang nakat-onan pinaagi sa pagpabawtismo. Hinaot nga ang binase-sa-Bibliya nga mga basahon nga gipatik sa mga Saksi ni Jehova bug-os ug dagayang ipanagtag niining bahina sa kalibotan, ug hinaot nga daghang linibo pa ang mosanong sa mga kamatuoran sa Bibliya nga unod niini!